“Нүхт тур” ХХК МИАТ-т катерингийн үйлчилгээг давуу эрхтэйгээр үзүүлсээр иржээ

Өнгөрсөн долоо хо­но­гийн пүрэв гарагт Бээ­жин­гээс ирсэн МИАТ-ийн онгоцны зорчигч хүүхэд хоолны хордлогод орсон нь тус компани үйлч­лүү­лэгчиддээ хэр анхаа­рал тавьдаг болохыг нь илтгэж өглөө. Үнэн хэрэгтээ хэдэн хүн онгоцны хоолноос хордсоныг бүү мэд.

МИАТ “Олон улсад хүлээн зөвшөөрөгдсөн мон­­голын үндэсний агаарын тээвэрлэгч байх” хэ­мээн алсын хараагаа то­дор­хойлж, “Найдвартай, ча­нар­тай, үр өгөөжтэй агаарын тээврийн үйлчил­гээ­гээр мон­­голыг дэлхийтэй хол­босон үндэс­ний тэр­гүүлэгч ком­пани байна” гэж зорилт тавин ажилладаг.

Гэвч тус компани Мон­голыг дэлхийтэй хол­босон үндэсний тэргүүлэгч байх гэдэг нь ёстой л үлгэр мэт санагдах болов. Учир нь саяхан МИАТ-ийн онгоцоор эх орондоо хөл тавьсан биш тэдний үйл ажиллагаа до­голдсон хэвээр байгааг мэдэрлээ.

Мэдээж өнгөрсөн долоо хоногт хоолны хордлогод орсон хүүхдийн тухай бид мэдэж байгаа болохоос биш олон нийт мэдэгдээгүй хэчнээн хүн байсныг тоо­цоолох аргагүй. Тэгээд ч эх орноосоо МИАТ-ийн онгоцоор аялаад гадны улс, орнуудад буунгуутаа хордлогод орсноо мэдэж, ажил, хичээлээ тасалж, эмчилгээ хийлгэсэн тухай мэдээлэл бишгүй олон байдаг.

Хамгийн гол нь монгол­чууд маань “Хүний газар, хол явахдаа хэрүүл хий­гээд яах вэ” гэх уужуу сэтгэлээр ханддаг нь өдгөө хүний аминд хүргэхэд бэ­лэн болгоод байгаа хэрэг.
Өөрөөр хэлбэл МИАТ-ийн онгоцоор зорчигчид нохой идэх нь байтугай тоож шиншлэхээргүй хоол, зуу­шаар “дайлуулсаар” байна.

Хатаж, хорчийсон өргөст хэмх, улаан лооль болон майонезоор амталсан салат өгч байгаа нь зорчигчдын эрүүл мэндэд сөрөг нөлөө үзүүлж байна. Өргөст хэмх, улаан лооль хатаж, хорчийсон нь хадгалалтын горим зөрчигдсөнийг бэлхнээ харуулж байхад өндөгний хольц бүхий майонезтой бүтээгдэхүүнээр “дайлж” байгаа нь бүр ч их аюул дагуулахгүй гэх баталгаа алга.

Нэг үе МИАТ-ийнхэн аюулгүй ажиллагааны горим алдсанаас болж иргэд “Өглөө энд, орой диваажинд” хэмээн даажигнан, үйлчлүүлэхээс эмээдэг байсан. Тэгвэл өдгөө өгч буй зууш, хоолноос нь болж орчлонгоос одох вий гэж айдаг боллоо.

Мэдээж олон улсын нислэгийг дан ганц МИАТ үйлддэггүй учраас зорчигчид бусад авиа компанийн катерингийн үйлчилгээ үзүүлдэг компаниудад ам сайтай байдаг нь ч аргагүй юм. Жишээлбэл “Korean Air”-иар үйлчлүүлэхэд зорчигч хүүхдүүдийн насны онц­логт тохирсон хоолоор дайлж, бүр нислэгийн хугацаанд тэднийг уйдаахгүйн тулд зургийн хэрэгсэл зэргээр бэлэг барьдаг. Тэгвэл манай улсын үндэсний агаарын тээвэрлэгч МИАТ-ийн хувьд эсрэгээрээ.

Уг нь тэдний үйл­чилгээнд тусгай хоолны цэс гэж бий. Гэвч түү­нийгээ нислэгийн тийзээ захиалахдаа хамт бичүүлэх “үүрэгтэй” юм билээ. Уг нь бол зорчигчид тийзээ бичүүлэхэд тухайн хүний нас нь тодорхой учраас МИАТ-т заавал хоол захиалах бус, тэд өөрсдөө энэ удаагийн нислэгээр бага насны хүүхэд явах учраас хоолыг нь эртнээс катерингийн үйлчилгээ үзүүлэгч компанидаа мэ­дүүлсэн байх учиртай аж.

Харамсалтай нь тэдэнд үйлчлүүлэгчиддээ анхаарал хандуулах энгийн соёл байддаггүйгээс өнөөг хэр нь хүүхдүүд болон на­санд хүрэгчдийн хоолыг тусгайлан бэлтгэх гэсэн ойлголт огт байдаггүй.
Хамгийн сонирхролтой нь онгоцны үйлчлэгч нарт хоол нь чанарын шаардлага хангахгүй байгаа тухай дуулгахад “Бид энэ талаар цааш нь дамжуулъя” гэхээс өөрийг хариулж мэдэхгүй бөгөөд хоол, зууштай холбоотой гомдол МИАТ-т тасрахгүй байсаар өнөөг хүрчээ.

МИАТ-ийн зорчигчдод хоол, зууш бэлтгэн ний­лүүлдэг буюу катерингийн үйлчилгээ үзүүлэгч нь “Нүхт тур” ХХК. Тэд МИАТ-т маш олон жил энэхүү үйлчилгээг үзүүлж буй давуу эрхтэй компани болж хувирчээ. Уг нь өнгөрсөн жил он удаан жил эрх мэдэлт­нүүдийн мөнгөний уурхай болсон МИАТ-ийн идээ бээрийг шахах үед “Нүхт тур”-ын асуудал хөндөгдөж байсан. Түүгээр ч зогсохгүй яг нэг жилийн өмнө Зам тээврийн яамны Төрийн нарийн бичгийн дарга Б.Батзаяа МИАТ-ийн удирд­­лагуудад “Нүхт тур” компанитай хийсэн гэрээг цулах, тэрхүү гэрээнээс үүдсэн хохирлыг хууль, хяналтын байгууллагад хандан нэхэмжлэх, цаа­шилбал, эрх мэдлээ хэт­рүүлсэн зохих албан ту­шаалтнуудыг шалгуулах арга хэмжээ авахыг шаардаж байсан.

Гэтэл энэ асуудал ту­хайн үедээ томоохон “акулууд”-ын хэрэгт дараг­дан нам гүм болсон бай­даг. Уг нь МИАТ катерингийн үйлчилгээ үзүүлэгч компаниа сонгох­доо жил бүр тендер зарлаж шалгаруулах учиртай.

Харамсалтай нь “саа­лийн үнээ” болгон ашиг­лахад садаа болохуйц тендер зэргийг зарлаж, ажил удах сонирхолтой албан тушаалтан МИАТ-т байдаггүй аж. Тиймээс л өөрсдөө ч катерингийн үйл­чилгээ үзүүлэх боломж­той хэрнээ заавал “Нүхт тур” компанитай гэрээлж, мөнгө угааж буй хэрэг.

“МИАТ” ХК нь 1998 онд өөрийн хөрөнгөөр Кате­рингийн зориулалт бүхий барилга барьж, олон улсын нислэгийн зор­чигчдын хоол бэлтгэх цехтэй бол­сон. Ингэснээр тэд харин ч ашигтай ажиллаж ирсэн тухай баримт олон бий. Гэвч 2009 оноос гэнэт “Нүхт тур” ХХК-тай хамтран ажиллах гэрээ байгуулсан байдаг. Гэхдээ хоёр жилийн хуга­цаатай байгуулсан тэр­хүү гэрээгээ МИАТ-ийн ТУЗ-ийн хурлаар ч эцэслэн шийд­вэр­лүүлэлгүйгээр үйл ажил­лагаагаа явуулж байсан байдаг.

Үнэн хэрэгтээ “Нүхт тур” тийм л эрхтэн дархт­нуудын мэдэлд байдаг юм билээ. Тийм ч учраас өнөөг хүртэл МИАТ-ийн зорчигчдыг нохойн хоолноос дор зүйлээр хооллож, ашиг хүртэж суугаа биз. Хоол нэртэй хороор бусдын эрүүл мэндэд заналхийлж буй МИАТ болон “Нүхт тур” компани хоорондын хууль бус үйлдлүүдийн талаар бид эргэн сурвалжлах болно.

Б.Төгөлдөр

Эх сурвалж: