Ажил хэргээс болж нэгийгээ гэмтээхгүйгээр зодолдох нь байх ёстой эрүүл систем

МАН-ыг тойрсон цаг үеийн асуудлаар МАН-ын зөвлөхүүдийн танхимын нарийн бичгийн дарга Ж.Саулетэй ярилцлаа.

-Зөвлөхүүдийн танхим бай­гуулагдаад удаагүй байгаа. Энэ танхимын үйл ажиллагааны чиглэл нь юу вэ. Ямар хүмүүс багтаж байгаа вэ?

-Миний хувьд зөвлөхүүдийн танхимын нарийн бичгийн дарга гэж явж байгаа. Энэ танхим маань XXVII Их хур­лаас гарсан намын дар­гын дэргэдэх шинэ бүтэц. Тан­хим маань манай намын хуу­чин дарга, ерөнхий нарийн бич­гийн дарга болон төрийн гурван өндөрлөгийн албан ту­шаалыг хашиж байсан 16 хү­нээс бүрд­сэн. Орон тооны бус үйл ажил­лагаатай зөвлөхүүд гэсэн үг. Тэд маань цаг үеийн асууд­лаар хуралдаж, намын даргад зөвлөдөг.

Тухайлбал улстөрийн намын тухай хууль, ахмадуудын талаар төрөөс баримтлах бодлого гэх мэтээр намын дарга, удирдах зөвлөлд зөвлөгөө өгдөг. Үүнд Ерөнхийлөгч асан Н.Багабанди, намын дарга асан С.Баяр, Сү.Батболд, УИХ-ын дарга байсан Д.Дэмбэрэл, Хууль зүйн сайд асан Ц.Нямдорж, Ерөнхий сайд асан Д.Содном гээд монгол төрийн “акулууд” багтдаг.

-Сүүлийн өдрүүдэд намын хуучин дарга нар болох С.Баяр, Сү.Батболд болон Байгаль орчны сайд асан Д.Цогтбаатар нарыг намын анхан шатны бай­гууллагаас хассан тухай мэ­дээлэл гарсан. Энэ талаар тайл­барлахгүй юу?

-Сүүлийн хэд хоног ийм яриа хэвлэлүүдээр гарах бол­сон. Намын одоогийн болон хуучин удирдлагууд хоорондоо зөрчилдөөнтэй, фракц, бүлэг болж хуваагдсан зүйл огт байхгүй. С.Баяр даргын хувьд гадаадад байгаа. Удахгүй ирнэ. Өөрөө нэгэн цагт намын дарга байсан хүний хувьд энэ хэцүү цаг үед зөвлөгөөгөө өгөөд, тус­лаад явж байгаа. Сү.Батболд дар­гын хувьд өмнөх Засгийн газрыг ахалж байсан мөн намын дарга байсныхаа хувьд мөн л одоогийн даргатай хамтраад ажиллаж байна. Д.Цогтбаатар дарга бол одоо намын удирдах зөвлөлийн гишүүн.

Манай намын лидерүүд энэ цаг үед харин ч улам нягтарч, цаашид 2016 онд яаж ажиллах вэ гэдэг дээр анхаарч ажиллаж байна. Түүнээс биш гадуур яриг­даад байгаа шиг намын ши­нэ, хуучин удирдлагуудын хооронд ямар ч асуудалгүй. С.Баяр, Сү.Батболд дарга нар монголын төрд хийсэн зүйлтэй, хэлэх үгтэй лидерүүд шүү дээ. Нэг ёсондоо манай намын брэнд болсон хүмүүс. Одоо байгаа на­мын дарга нартай таарамжгүй гэх зэрэг асуудал байхгүй. Бид үүнийг зохион байгуулаад байгаа эх сурвалжийг таа­маглаж бай­гаа. Энэ бол дарга нарыг хага­ралдуулах гэсэн нэг төрлийн явуулга гэж харж байна. Ирэх сонгууль МАН бүр хүчирхэг бо­лоод ороод ирэх вий гэдгээс сэр­гийлж, хагаралдуулж, ли­дерүү­дийг хар­луулах зорилготой.

Тухайлбал өчигдөр /уржиг­дар/ л гэхэд “Өнөөдөр” сонин дээр УИХ дахь намын бүлгийн дарга С.Бямбацогт, намын дарга М.Энхболд, ерөнхий нарийн бичгийн дарга Ж.Мөнхбат на­рын зургийг тавьж байгаад янз бүрийн зүйл бичсэн байна лээ. Бид хэвлэлийн эрх чөлөө гэдэг үүднээс түүнд асуудал үүсгээгүй. Үүнийг хэвлэлийн эрх чөлөө гэж ойлгож байгаа. Тэд өөрсдийнхөө өнцгөөс хараад л бичсэн байх. Гэхдээ бага ч гэсэн үндэслэлтэй зүйл бичих хэрэгтэй.

Ер нь яаж ч бодсон на­мын анхан шатны нэгж дээд шатны удирдлагуудтай зөвшил­цөхгүйгээр хасна гэ­дэг зүйл байхгүй. С.Баяр зөв­лөхүү­дийн танхимын гишүүн, Сү.Батболд УИХ-ын гишүүн, харин Д.Цогт­баатар бол намын удирдах зөв­лөлийн гишүүн. Тэгэхээр хасна гэсэн ойлголт байхгүй.

-Саяхан МАН-ын гишүүд МАХН-д олноороо элсэж байна гэсэн яриа гарсан. Үнэ­хээр та­най намын гишүүд, дэм­жиг­чид МАХН-д элсээд байгаа юм уу?

-Манай намын гишүүдийг хэ­дэн зуугаараа өөр намд элсэж байна гэж хэсэг шоудсан. Гэтэл тэр 300 хүн, мөн өнгөрсөн гурав­дугаар сарын 1-нд МАН, АН-аас нийлсэн 700 хүн МАХН-д элсэнэ гэж яриад байсан. Тэдгээр нь хаана байна. Тийм зүйл бо­лоо­гүй шүү дээ. Манай намаас гуравдугаар сарын 1-нд тийшээ 700 байтугай долоон хүн явсан гэдгийг би лав мэдэхгүй. Одоо хүртэл намын дарга дээр “би намаасаа гарлаа” гээд ирсэн хүн алга. Энэ ч гэсэн намыг дотор нь хуваах, АН-тай сөргөлдүүлэхээр ядсан л арга шүү дээ.

-Эдгээр сенсаациас болоод олон нийт МАН дотооддоо ха­гаралдаж эхэллээ гэсэн ойл­голттой болчихлоо. Таны хувьд энэ бүхний ард хэн байгаа гэж гадарлаж байна. Тэгэхээр энэ асуудал цааш даамжирвал ямар арга хэмжээ авах вэ?

-Мэдээж энэ мэтээр цаашид давраад байвал бид дуугаралгүй яах вэ. Гэхдээ ингэж худлаа хэ­лээд байгаа нь миний хувьд их олзуурхууштай санагдаж байгаа. С.Баяр, Сү.Батболд на­рыг намаас хасчихлаа гэхэд хэн итгэх юм бэ. Энэ бол шоу. Нэг ёсондоо ард түмнийг доромжилсон хэрэг. Ер нь намар нэг хэсэг БШУ-ны дэд сайд Б.Ургамалцэцэгийг хүн зодлоо гэж хэсэг шуугисан. Энэ бол инээдтэй хэрэг. Б.Ургамалцэцэг шиг жижигхэн бүсгүйд зо­дуулдаг эр хүн гэж юу байх вэ дээ. Үүнтэй л адилхан.

-УИХ-ын гишүүн Д.Сумъяа­базарыг нийслэлийн МАН-ын хороон даргын суудалд са­­наархаж байна. Бараг л Ц.Сандуйгаас булаах нь гэж яриад байгаа. Үүнд тайлбар өгөхгүй юу?

-Харин тийм. Ийм мэдээлэл гарч бас нэлээн хүчтэй яригдаж байгаа. Удахгүй нийслэлийн МАН-ын хорооны хурал болно. Үүнтэй холбоотойгоор гаргасан яриа, бас л нэг төрлийн явуулга. Түүнээс биш УИХ-ын гишүүн Д.Сумъяабазар, Ц.Сандуй дарга хоёр дотно най­зууд. Би ойр дотно байдаг хүний хувьд хэлэхэд тэд хэзээ ч муу­дал­­цах­гүй гэдгийг хэлэх байна. Өнөөдөр Д.Сумъяабазар гишүүн нийслэлийг хариуцсан нарийн бичгийн даргын алба хашиж байгаа.

Үүнийг хийж байгаа хүмүүс өөрсдөө дарга болох гээд ийм зүйл хийж байгаа. Түүнээс биш тэр хоёр хэзээ ч хоорондоо зөр­чилдөхгүй найзууд. Д.Сумъяа­базар гишүүн тэр даргын сууд­лыг булаацалдахгүй. Ц.Сандуй дарга ч албан тушаал, сандал, ши­рээтэйгээ зууралдаад суух хүн биш. Хоёулаа ажлаа сайн хийж байгаа залуухан дарга нар. Нийслэлийн ажил маш сайн явж байгаа. Энэ залуу дарга на­рыг ч гишүүд, дэмжигчид сай­хан хүлээж авсан.

-Сүүлийн үеийн хурал, зөв­­­лөгөөнүүдэд танай намын ги­­шүүд, дэмжигчид нэлээн ши­рүүн байгаа. Бүр гар зө­рүүл­сэн тохиолдол ч гарсан гэж яригдаад байна. Энэ юунаас болж байгаа вэ?

-Хэдийгээр тийм яриа байгаа ч би өөрийн нүдээр хараагүй. Хэвлэлд бичигдсэнийг л унш­сан. Би улстөрд эрчүүдтэй олон жил ажилласан. Эрчүүд, залуу­чууд хоорондоо ганц, хоёр удаа гар зөрүүлэх нь байх л зүйл. Гадаадад парламентынхаа тан­химд барилцаж аваад, зодол­доод, бүр гутлаа хүртэл тайлаад шидэж л байдаг шүү дээ. Харин манайд энэ төрлийн асуудлыг их дэвэргэх юм. Хэрэв тийм зүйл болсон бол манай намд дотоод ардчилал байгааг харуулж бай­на. Ажил хэргээс болж нэг­ний­гээ гэмтээхгүйгээр зодол­дох нь байх ёстой эрүүл систем.

Би ч гэсэн даргадаа хэлэх зүйл байвал чөлөөтэй хэлээд шүүм­­жилчихдэг. Би олон дар­гын цэрэг байсан. Тэдэнд хэлэх зүйлээ хэлчихдэг л байлаа. Тэд ойлгодог. Энэ бол эрүүл тогтолцоо.

Харин АН-ыг хараад байхад Н.Алтанхуягийн өөдөөс ширүүн харж, дориун дуугардаг хүн бай­гаа юм уу. Дандаа худлаа манж­лаад, гараа өргөөд байж болохгүй. Бараг л “Н.Алтанхуяг дарга аа та түм бум наслаарай” гэж хэлээд байгаа юм шиг санагддаг.

Гэхдээ АН-д Ж.Батзандан. Р.Амаржаргал, М.Батчимэг зэ­рэг хэлэх үгээ хэлдэг, шударга хүмүүс бий. Мөн жигүүр гээд гараад ирсэн. Гэхдээ сүүлийн үед бүгд чимээгүй болчихлоо. Тэгэхээр тэднийг жинхэнэ до­тоод ардчилалгүй нам юм биш үү гэж хараад байгаа. Манайх бол залуучууд, эмэгтэйчүүд, ахмадууд гээд бүгд чөлөөтэй үгээ хэлдэг. Гэхдээ захирах, за­хирагдах ёсоо баримтлана. Саяхан л гэхэд “Шинэчлэлийн хо­роо” гээд залуучууд гарч ирээд намыг нураах шахлаа шүү дээ. Бид тэдний санал бодлыг бүгдийг сонсож, хүлээж авсан.

М.Санчир

Эх сурвалж: