С.Баяр шиг л амьдармаар байна. Гэхдээ хүйсээ солиод эрэгтэй болоод биш л дээ. Эмэгтэйгээрээ гэхдээ С.Баяр шиг. Бод л доо. Тэр туйлын сонирхолтой нэгэн.

“Элсний 13”-ын дэмжлэгээр нэг л өдөр гэнэт томорчихсон. Энэ тухай нь УИХ-ын гишүүн, Нийгмийн хамгаалал, хөдөлмөрийн сайд асан Л.Одончимэд ихэд тодорхой бичсэн байсан. Тэндээс харах нь ээ С.Баяр өөрийн хүчээр Ерөнхий сайд, МАН-ын дарга болчихоогүй гэнэ. Монгол Улсаас ОХУ-д суугаа Элчин сайдаар ажиллаад үүрэгт хугацаагаа дуусгачихсан байхад нь Л.Одончимэд гишүүн зорилго тавин уулзаад “Чи МАН-ын дарга болчих” гэж. Нөгөөх нь шууд “За” гээд л болчихсон. Тэгээд л МАН-ын дарга болсон даруйдаа шөнө нь нэг зүүд зүүдэлсэн бололтой юм. Утга нь “Би ер нь давхар Ерөнхий сайд болохгүй бол болохгүй нь ээ” гэх гар бариад бугуу барих ухаан. Тэр бүхнийг нь үл ойлгох ард түмэнд С.Баяр нэг л өөр залуу. Нүдний шилтэй, хямсгар, гоё ярьж гоё уудаг. Залуу бүсгүйтэй нэр холбогдох нь хүртэл сайхан. Эрч хүчтэй, эрийн тэнхээтэйнх нь илрэл гээд л. Тэр ч битгий хэл “Петро Чайна” компанийн байранд хятадуудаас зөрж, тэднийг дуугүй болгож байгаад архи уусан нь хүртэл мундаг. Энэ үедээ Оюутолгойн хөрөнгө оруулалтын гэрээг баталж, тасарчихсан Ерөнхий сайдаар тархинд буух нь тэр. Тэр битгий хэл өргөдлөө өгч, Ерөнхий сайдын албыг шууд С.Батболдод “өвлүүлсэн” нь хүртэл гайхамшиг. “Хэн ч эрх мэдлээс ийм хурдан сайн дураараа салж байгаагүй. Энэ бол эр зориг юм. Эд мөнгөний шуналгүй хүн юм” гэсэн магтаал хэвлэлээр ч тэр, ард олны дунд ч хөвөөстэй. Эцэс сүүлдээ Америк дахь байраа 1,1 сая ам.доллараар зарахаар болж. “Ерөнхий сайд байсан хүнд ийм хөрөнгө байлгүй яахав”… Тийм ээ, С.Баяр ийм мундаг. Түүн шиг амьдрахсан. Алдаа нь хүртэл ариун цагаан болж харагдаад л. Авсан байшин нь хүртэл зүй ёсных болж хүлээн зөвшөөрөгдөөд л. Архи уух нь мужик гэнэ… Яавал С.Баяр шиг амьдрах вэ гэж.

Г.ЭНХЛЭН

Эх сурвалж: www.nud.mn