Лондонгийн олимпийн хүрэл медальт, чөлөөт бөхийн дэлхийн аварга, МУГТ С.Батцэцэг хань М.Батбаатартайгаа З.Дүвчин багшийн удирдлага дор хамтран бэлтгэл хийх болсноор танилцаж байсан гэдэг. Өдгөө С.Батцэцэгийг эх орныхоо нэрийг дэлхийн тавцанд мандуулж явахад ханийнх нь ач, тус их бий хэмээн олон хүн шагшдаг юм билээ. Шаггүй сайн барилдчихдаг түүний нөхөр М.Батбаатар  Төв аймгийн Баян-Чандмань сумын наадамд зодоглон сумын заан болсон байна. Түүнчлэн 3000 морь нэгэн зэрэг уралдаж Гиннесийн номд бичүүлэх түүхэн өдөр хосуудад Булган аймгийн Булган сумын алдарт уяач Дамбийн Маньбадар сум, аймагтаа олон айраг түрүү авсан хурдан хүлгийнхээ дээжээс бэлэглэжээ.
С.Батцэцэг Монголын чөлөөт бөхийн түүхэнд 32 жилийн дараа олимпоос хүрэл медаль хүртсэн гурав дахь эмэгтэй тамирчин төдийгүй 20 насандаа чөлөөт бөхийн Дэлхийн аваргаас алтан медаль хүртсэн анхны Монгол эмэгтэй хэмээн түүхийн хуудаснаа нэрээ мөнхөлсөн Монгол түмний бахархалт хүмүүсийн нэг билээ. Түүний амжилтын түүхийг үргэлжлүүлж саяхан жүдогийн ДАШТ-нээс ОУХМ М.Уранцэцэг анх удаагаа аварга болж, Монголын эмэгтэй жүдоч болоод чөлөөт бөхийн тамирчид дэлхийн тавцанд аваргалж, улсынхаа тугийг мандууллаа.
Сүүлийн үед ч амжилтаа бататган олон тэмцээн уралдаанд оролцоод байгаа дэлхийн аварга маань энэ сард болох Чөлөөт бөхийн ДАШТ болоод ирэх олимпод ард түмнийхээ итгэл найдварыг тээж явна.