Дундговь аймгийн Засаг дарга С.Сүхбаатар Мэргэжлийн хяналтын газрын улсын байцаагч Р.Цэрэндоржийг өрөөндөө дуудаж, хууль ёсны үүргээ гүйцэтгэсний нь төлөө хууль ёсны бус аргаар шаардлага тавьсан гэх үү, үүрэгдсэн гэх үү, ямар боловч биед нь гар хүрч, танхайрчээ.

Хэдхэн хоногийн өмнө аймгийн ИТХ-ын дарга шийдвэр гаргаж, Хулд сумын Түймэрт цагаан дахь жоншны бичил уурхайд ажлын хэсэг томилон ажиллуулсан юм. Уг ажлын хэсэг Тагнуулын хэлтсийн даргаар ахлуулсан бөгөөд бүрэлдэхүүнд нь Цагдаагийн хэлтэс, Мэргэжлийн хяналтын газар, Хүүхэд, гэр бүлийн хөгжлийн хэлтэс зэрэг хэд хэдэн байгууллагын холбогдох алба хаагчид багтжээ.

Хулд суман дахь жоншны уурхайд иргэд нөхөрлөлийн зохион байгуулалтад орж, анх гар аргаар жонш олборлож эхэлсэн боловч өнөөдрийн байдлаар тус уурхайд хүнд даацын машин, экскаватор олноор ажиллаж, бичил уурхайн горимоор ажиллах нөхцөл нэгэнт үгүй болоод байгаа юм.

Бичил уурхайд зөвшөөрөгдөх хүчин чадлаас хэтэрсэн хүнд даацын машин механизм ажиллаж байгаа гэдгээс эхлээд яаж шийдвэрлэж, хэрхэн ажиллуулбал зохилтой талаар оновчтой шийдэл байнга шаардагдаж байгаа Түймэрт цагааны уурхайг өнгөрсөн хавар хэсэг хугацаанд үйл ажиллагааг нь зогсоогоод байсан ч  гурван сар гаруй өмнө дахин нээсэн юм.

Холбогдох байгууллагуудын алба хаагчдаас бүрдсэн ажлын хэсгийг очиход уурхайн нөхцөл байдал өмнөхөөс хүндэрсэн, тэр ч байтугай 15 настай хүүхдүүд ажиллаж байсан зөрчил ч гарсан байна. Хуулийн зүйл заалтаар авч үзвэл нэг бус хэд хэдэн зөрчил энд нэгэнт үүсчихсэн учраас зөрчлийг арилгатал түр хугацаанд уурхайн үйл ажиллагааг зогсоох шийдвэрийг ажлын хэсэг гаргажээ.

Улсын байцаагчийн зодуулах шалтгаан ердөө л энэ бөгөөд “Би хууль зөрчөөгүй. Төрийн хяналт шалгалтын хуулийн 19.7, Ашигт малтмалын тухай хуулийн 66.5 дахь заалтын дагуу уурхайд аюултай нөхцөл үүссэн тохиолдолд үйл ажиллагааг зогсоох улсын байцаагчийн эрх үүргийн дагуу ажилласан” хэмээн Засаг даргад тайлбарласан байна. Гэвч тэрээр надаас гадуур дур мэдэн шийдвэр гаргасан хэмээн улсын байцаагчийг дарамталжээ.

Юу болсон талаар улсын байцаагч Р. Цэрэндорж ярихдаа “Засаг дарга өрөөндөө дуудахаар нь ороод очтол юу юугүй таглаатай аяга аваад өөдөөс шидсэн. Юу болж байна аа, дарга гэхэд хүрч ирснээ шанаадсан. Дараа нь гарын хуруугаа сарвайлгаж байгаад нүүр рүү хоёр удаа хүчтэй ёворч, эцэст нь хуруугаараа нүд хатгасан” гэв.

Биед нь гар хүрээд зогсохгүй ажлаас чинь хална гэж дарамталжээ. Тэр ч байтугай Мэргэжлийн хяналтын газрын даргыг орлож байгаа улсын байцаагч Д.Мөнгөнцэцэгийг бас дуудаж, эмэгтэй хүн тэвчихийн аргагүйгээр хараасан байна.

Ажил үүргээ гүйцэтгэсний төлөө ийм утгагүй дарамтад өртсөндөө гайхаж байгаагаа улсын байцаагч залуу хэлж байгаа бөгөөд энэ тухай асуудлыг Улсын Мэргэжлийн хяналтын Ерөнхий газарт тавина гэв.

Хамгийн сонирхолтой нь Засаг даргыг танхайрах үед уурхайгаас жонш худалдаж авдаг компанийн захирал дэргэд нь байсан бөгөөд юуны учир захирлын дэргэд төрийн алба хаагчийг ийнхүү дарамтлав гэдэг асуулт ургаж байгаа юм.