Эрээн хотод байрлах энэхүү Монгол цэнгээний газарт ч бас охид биеэ үнэлдэг

Томилолт

Өмнөх сурвалжлага

Улаан дэнлүүний гудамж хөл хөдөлгөөн ихтэй. Энд тэндгүй хүүхэн сонирхсон эрчүүд “Гүүняа хэд вэ” хэмээн яг л бараа худалдан авах гэж  байгаа наймаачин шиг аяглах нь сэтгэл жихүүцүүлэв.

Манай хөтөчийн машинд суусан час улаан өнгийн богино даашинз, өндөр өсгийтээр гоёсон 20 орчим насны бүсгүй биднийг харснаа гэнэт хашгирахыг завдав. Сурвалжлагч би ч учир явдлаа тайлбарласны эцэст цөөн хором ярилцлаа. Тэд өөрсдийг нь худалдаалдаг хүмүүсийг “ээж” хэмээн нэрлэдэг бөгөөд ярилцлага өгөхийн өмнө ээжийгээ дуудна гэж нэлээд сүрийг үзүүлсэн юм.

Тэрбээр БНХАУ-д сурдаг гэх бөгөөд мөнгө олохоор амралтаараа биеэ үнэлж байгаа учраас зургаа авахуулж, нэрээ бичүүлэхгүй гэсэн тохироотойгоор цөөн үг солив.

-Одоо хэдэн настай вэ. Яагаад биеэ үнэлэх замыг сонгов?

-Би яг биеэ үнэлэгч биш шүү дээ. Тайванийн их сургуульд сурдаг. Мөнгөний хэрэг гарахаар нь амралтаараа энд ажиллаж байна.

-Мэдээж ажиллаж байна гэдэг чинь биеэ үнэлж байна гэсэн үг биз дээ?

-Мөнгө авч байгаа юм чинь унтах нь тодорхой л доо. Уг нь тэтгэлгээр Тайванийн их сургуульд суралцахаар ирсэн. Гэтэл хагас жилийн дүн тааруу тэтгэлэгтээ хамрагдаж чадаагүй. Мэдээж гэрийнхэн маань надад итгэж явуулсан болохоор тэтгэлгээсээ хасагдсан гэж хэлж чадаагүй. Гэтэл байрны мөнгө, хоолны мөнгө гээд мөнгөний хэрэг гарсан. Тэгээд Тайваньд сурдаг найз маань мөнгө олох арга байна гээд энийг зааж өгсөн. Надтай ижилхэн шалтгаантай олон охин байгаа.

-Юу гэсэн үг вэ?

-Оюутны амралтаар биеэ үнэлэх охидын тоо эрс нэмэгддэг гэж ээжүүд ярьж байна билээ. Бүгд л сургалтын төлбөрөө олох, мөнгөгүйгээсээ болж энэ замыг сонгодог юм шиг байна лээ.

-Тэгээд мөнгөө олж чадаж байна уу?

-Чадалгүй яахав. Хүүхэн авахаар ирж байгаа хүмүүс ихэвчлэн монгол охид авдаг. Ер нь монгол охид эрэлттэй байдаг.  Тэгэхээр мөнгийг бол хангалттай олж байна. Ямартай ч есөн сар хүртэл ажиллаж хэдэн төгрөг хураагаад сургуульдаа явна.

-Тэгээд олсон орлогоосоо эзэн гээд байгаа хүмүүстээ өгнө биз дээ?

-Тийм. Биднийг худалддаг хүмүүсийг “ээж” гэж нэрлэдэг. Бид олсон хөлснийхөө 40 хувийг “ээж”-дээ өгдөг. Тэгсэн ч ашигтай байдаг.

-Өвчин авах, жирэмсэн болохоос айхгүй байна уу?

-Хамгаалалт хэрэглэдэг учраас айлт байхгүй.

-Хэрэглүүлэхгүй бол яах вэ?

-Үгүй ш дээ. Харин ч хамгаалалт хэрэглэхийг шаарддаг. Яагаад гэхээр энд биеэ үнэлж байгаа охидууд хэдэн зуун хүнтэй унтаж байгаа. Тийм болохоор өөрсдөө элдэв өвчин авахаас их айдаг. Тиймээс хамгаалалтыг яс хэрэглэдэг.

-Чи найз залуутай юу?

-Байгаа. Бид хоёр дөрвөн жил үерхэж байна. Намайг ирэхийн өмнө хадмууд маань бэр гуйсан. Очоод хуримаа хийнэ дээ.

-Хэрвээ мэдчихвэл яана. Энд таньдаг хүнтэйгээ таарахгүй юу?

-Заримдаа жаахан айх л юм. Энд ажилладаг нэг охин найз залуудаа Эрээнд ажил хийлээ гэж хэлээд ирчихсэн биеэ үнэлж байгаад найз залуугийнхаа найзтай таарсан. Тэгэхээр таньдаг хүнтэйгээ таарах эрсдэл өндөр. Жаахан айдастай л байдаг. Ер нь Эрээнд ажил хийлээ гэсэн охидуудын 80 хувь нь энд биеэ үнэлдэг дээ.

-Чамд ахиад мөнгөний хэрэг гарвал яах вэ?

-Хүн нэг л алдвал тэр чигтээ буруу гишгэдэг юм байна. Би одоо бэлэнчлэх, амар хялбар аргаар мөнгө олох аргад орчихлоо шүү дээ. За мөнгөгүй болохоор  ингээд хурдан хугацаанд их мөнгө олох боломжтой шүү гэсэн сэтгэлгээ суучихсан. Гэхдээ л сургуулиа төгсөөд хурдан нутаг руу явахыг хүсч байна.

-Энд ер нь хэчнээн монгол охин байгаа вэ?

-Сайн мэдэхгүй юм. Яг энэ гудамжинд бол 400-500 охин бий.

Тэд Монголд мөнгө олох боломж бага. Цалин бага болохоор энд ажилладаг байх гэсэн таамаг төдий зүйл ярьснаар биднээс салсан юм. Тэнд түүний найзууд олон бий. Эгч нь дүүгээ, найзууд нэгнийгээ уруу татан авчирч биеэ үнэлэх тохиолдол мэр сэр бий гэдгийг ч ярилцлага өгсөн бүсгүй нуугаагүй юм. Зарим эх сурвалжийн хэлснээр, “Улаан дэнлүү”-ний гудамжны монгол охидын зарим нь хар тамхи хэрэглэж мансуурдаг болоод удаж буй гэх. Бүр Хөх хотын танхай бүлгийнхэнтэй эхнэр нөхөр болсон тохиолдол ч бий гэнэ.  Зарим охид хүүхдээ, эгч дүүгээ дагуулан Эрээнийг  зорин ирж амьдарч буй эмгэнэлтэй тохиолдлууд ч бий гэв.

Монголын улаан загалмайн нийгэмлэгийн ХДХВ/ДОХ-ын халдварын эсрэг төслийн багийнхан өмнөд хөрш буюу хятадад дунджаар 6000 гаруй охид, хүүхнүүд биеэ үнэлдэгээс 1600 орчим нь Эрээн хотод тогтмол биеэ үнэлдэг гэсэн  судалгаа гаргажээ. Өөрөөр хэлбэл, уншигч та бидний хамтдаа зочилсон дээрх Улаан дэнлүүний гудамжинд Монголын  олон арван охин  хятад эрсийн өвөрт шургалж, нэгээс нөгөөгийн өвөр дамжин яваа нь Монгол Улсын эмгэнэл биз ээ.

Б.Чимэг | Гэрэл зургийг Ш.Гантуул

Эх сурвалж: Eagle.mn