Манайдаа гайгүйд тооцогдох репперүүдийн нэг болох Quiza ирэх сонгуульд АН-аас нэр дэвшихээр болсноо албан ёсоор зарлаад байгаа билээ. Харин мань хүн өнөөг хүртэл урлагаар явахдаа өөрийн жинхэнэ нэрээ дурьдаж байсан нь үгүй байх. Тэгэхээр ард түмэн эсвэл залуучууд түүнийг Quiza нэрээр нь л мэднэ. Нэг ёсондоо “брэнд“ нэр л дээ. Тийм учраас “ноён Quiza” ирэх сонгуульд өрсөлдөхдөө энэ нэрээрээ л явсан нь дээр байх аа. Пиараа хийхэд ч бас амар шүү дээ. Бас их содон сонсогдоно. Бод доо, “УИХ-ын сонгуулийн тэддүгээр тойрогт Ардчилсан намаас нэр дэвшигч Quiza” гээд л. Олон нийтийг цуглуулаад өөрөө дуулаад, үглэчихвэл ч үглэчихнэ. Харин УИХ-д хэрвээ гараад ирчихвэл парламентын сэтгүүлчид түүнийг “Quiza гишүүн ээ, нэг яриа авах гэсэн юм” гээд л хөөцөлдөөд байх болж дээ. Парламентад маань нэг ч болов гадаад нэртэй хүн сууж байвал зүгээр ч юм уу.