Хуртай, нартай энэ жилийн наадмын хурдан азарганы түрүүч айргийн таван морь барианд орсны дараахан баярын нулимс нь сул асгарсан нэгэн эрхэм морь барианы газарт олны анхаарлыг эрхгүй татсан нь Үндсэн хуулийн цэцийн гишүүн Д.Сугар байв.

Өнгөрсөн жилийн наадмын хурдан азарганы уралдаанд айргийн дөрвөөр барианд орж ТӨХ-ны дарга асан Д.Сугарын магнайг тэнийлгэж байсан хул азарга үнэнхүү хурдан буян гэдгээ нотолж өнөө жилийн улсын их баяр наадамд айргийн таваар барианд орлоо.

Ардын хувьсгалын 92 жилийн ойн их баяр наадмын хурдан азарганы уралдаанд 204 азарга гараанаас гарснаас Үндсэн хуулийн цэцийн гишүүн Д.Сугарын хул азарга дахин айргийн таваар барианд орж, сүүлийн хоёр, гурван cap АТГ-ын хараанд өртөн сэтгэлийн дарамттай яваа Үндсэн хуулийн цэцийн гишүүн Д.Сугарын сэтгэлийг нялхаруулж, сул асгарах нулимсыг нь сад тавиулсан нь ийм учиртай.

Төвийн бүсийн наадамд торгон жолоогоо өргүүлж байсан энэ хул азарга уг нь Монгол Улсын Тод манлай уяач Д.Ононгийн унаган адуу бөгөөд олон хоногийн хатуухан уяатай хул азарганы уяа сойлгыг нь Д.Онон Тод манлай хүү О.Батбилэгтэй хамтран тааруулдаг ажээ.

Ямартай ч АТГ-т хэзээ мөдгүй дуудагдаж магадгүй болоод байгаа Үндсэн хуулийн цэцийн гишүүн Д.Сугар улсын баяр наадамд хоёр удаа айрагдсан хул азарганыхаа буянаар тун удахгүй “Өвөрхангай аймгийн Өлзийт сумын харьяат Монгол Улсын манлай уяач” хэмээн цоллогдож, сул асгарах нулимсаа арчин зогсох бололтой.