Zaluu.com сайдад ажиллаж буй  сэтгүүлч Б.Отгонбаярт УИХ-ын гишүүн Н.Номтойбаяр эрүүгийн хэрэг үүсгүүлжээ. Өнгөрсөн онд Н.Номтойбаярын бие хамгаалагч, туслахаар долоон жил ажилласан Б.Батзориг нь түүний гэмт  үйлдлүүдийг интернетээр цацсан байлаа. Энэхүү мэдээлэлд үндэслэн “Авлигатай тэмцэх сэтгүүлчдийн клуб” төрийн бус байгууллагын тэргүүн, сэтгүүлч Б.Отгонбаяр  тэдгээр үйлдэл тус бүрийг  эрүүгийн хуулийн заалтуудтай харьцуулан анализ хийж, “Номтойбаяр  113 жилийн ял авахаар юм байна” хэмээн тухайн үед  хошигнож байжээ. Тэгээд  “Дорнодын ийм тэнэг юм уу, эсвэл ингэтлээ залилуулав уу” гэсэн ёгт нийтлэлдээ бичиж зарим хэвлэлд тавьсан байв. Б.Батзоригийн анх тоочиж зарласан хэргүүд нь нийтдээ арван найман төрлийн гэмт үйлдэл байжээ.  Сэтгүүлч Б.Отгонбаяр уг хэргүүдийг  шалгуулахаар холбогдох газруудад хүсэлт тавьсан боловч одоо болтол шалгаагүй байгаа аж. Тиймээс сэтгүүлч Б.Отгонбаяр  нь Н.Номтойбаяртай холбоотой  Б.Батзоригийн мэдээлэл болон бусад  хэргүүдийг дахин  шалгуулахаар Авлигатай тэмцэх газар, Цагдаагийн ерөнхий газарт  хандахаар болжээ. Мөн УИХ-ын Ёс зүйн  дэд хороонд  гомдолоо  уламжилж, Н.Номтойбаярын  хууль бус  үйлдлүүдэд  дүгнэлт  хийлгэх, хариуцлага тооцохыг хүссэн байна.  Б.Отгонбаяр  өөрт тохиолдсон  явдлын  талаар өгүүлэхдээ “Н.Номтойбаяр ичсэндээ л надад эрүү үүсгүүлж байна” гэжээ.

О.Баяр