Ардын болон уртын дууг орчин үеийн хэв маягтай хослуулан этник дуунуудаар олны танил болсон “Шуранхай” хамтлагийн уран бүтээл өдгөө зогсонги байгаа. Учир нь тус хамтлагийн дуучин Д.Үүрийнтуяа, Б.Эрдэнэчимэг нар нь урлагийн салбараас ханиа сонгож, хувийн амьдралаа төвхнүүлэхэд анхаарлаа хандуулах болсон. Харин Б.Номин-Эрдэнэ нь Улсын Филармонийн дэргэдэх уртын дуучин болсон билээ. Тус хамтлаг Б.Эрдэнэчимэгээс хойш хоёр ч уртын дуучин авсан. Гэсэн ч шинэ охидод авьяас чадвараас гадна уран бүтээлийн төлөө нойр хоолоо хугаслан байж зүтгэх сэтгэлийн тэнхээ, хөдөлмөрч чанар дутсан гэж тэд дүгнэдэг байна.

Өдгөө ганц бие Б.Номин-Эрдэнэ бүжигчин Б.Одсүрэн гэх залуутай үерхэж байсан ч хоёр тийш болоод байгаа юм билээ. Учир нь Б.Одсүрэн нь Германд уран бүтээлийн мөрөө хөөсөн сурагтай. Ийм ч учраас уртын дууч бүсгүй маань “Бие холдвол сэтгэл холдоно” гэдэг үгтэй эвлэрч, зорьсон зорилгодоо хүрч, төлөвлөсөн ажлаа хийж дуусгахын төлөө тэмүүлж байгаа учраас хэн хэнийгээ чөлөөлсөн аж.

Харин түүнд гэр бүлтэй эрчүүд уулзаж, учрах ч санал тавьдаг ч  “Тэр хүний ард надтай адилхан эмэгтэй хүн байгаа учраас ийм асуудлыг хэзээ ч хүлээн зөвшөөрч чадахгүй. Хэзээ нэгэн цагт би ч гэсэн, нөхөртэй болно шүү дээ. Тиймээс эхнэртэй эрчүүд утсаар ярихад сэтгэл бухимдаж, тэдний өмнөөс гутрах, ядрах гэх мэт муухай мэдрэмж төрдөг” гэжээ.

Эх сурвалж: Шуурхай.мн