Эрүүл мэндийн сайд асан Н.Хүрэлбаатарыг өчигдөр орой эх орондоо ирэх үеэр нь нисэх буудлаас Улсын мөрдөн байцаах газрынхан албадан саатуулжээ. Тэрбээр өчигдөр орой 22.15 цагт “Korean Air” компанийн Сөүл-Улаанбаатар чиглэлийн нислэгээр эх орондоо ирсэн юм. Түүнийг УМБГ-ын ажилтнууд албадан саатуулж, ИНЕГ-ын харьяа Цагдаагийн хэлтэст түр саатуулж байгаад шөнийн 01.40 цагийн орчимд Цагдан хорих 461 дүгээр анги руу авч явсан байна. Эх сурвалжийн мэдээлснээр тэрбээр хэрэгтэйгээ танилцаж, зарим нэг тайлбар өгчээ. Ар гэрийнхнээс нь түүний эхнэр ирсэн байсан бөгөөд Монгол Ардын намын журмын нөхдөөс нь нэг ч харагдсангүй. Н.Хүрэлбаатар  нэлээд турсан, сандарч тэвдсэн байдалтай, ядруу царайтай байсан гэдгийг эх сурвалж мэдээлж байна.

Хүүгийнх нь гэрээс алдагдсан сейфтэй их хэмжээний мөнгөний хэрэгтэй холбоотойгоор түүнийг Интерполоор эрэн сурвалжилж байсан юм. Харин өнгөрсөн пүрэв гаригт Н.Хүрэлбаатарын бие төлөөлөгч мэдээлэл хийж, Сингапурт олон улсын хуралд оролцож байгаа, зургадугаар сарын 7-нд эх орондоо ирнэ хэмээн мэдэгдсэн билээ. Сайд асан Н.Хүрэлбаатарын уламжилсан мэдэгдэлд “Хууль,хяналт болон цагдаагийн байгууллагаас намайг ямар нэг хэрэгт холбогдуулан албан ёсоор дуудсан зүйл байсангүй. Хэрвээ  намайг  эрэн сурвалжилж байсан бол надад болон  манай гэр бүлийнхэнд энэ тухай албан ёсоор мэдэгдэх ёстой. Гэтэл Цагдаагийн ерөнхий газраас намайг эрэн сурвалжилж байгаа тухай хэвлэл, мэдээллийнхэнд мэдэгдсэн байна. Ийм учраас миний бие цагдаагийн газраас өчигдөр хийсэн мэдээллийг хүлээн авч, эндэх ажлаа орхин, зургадугаар сарын 7-ны өдөр эх орондоо очихоор боллоо” гэсэн юм.