Цагдаагийн ерөнхий газраас өчигдөр Эрүүл мэндийн сайд асан Н.Хүрэлбаатарыг эрэн сурвалжилж буй талаар мэдээлсэнтэй холбогдуулан түүний бие төлөөлөгч MN-мэдээллийн төвд хэвлэлийн бага хурал хийлээ.

Энэ үеэр тэрээр эрүүл мэндийн сайд асан, АУ-ны доктор, профессор  Н.Хүрэлбаатарын мэдэгдэлийг хүргэлээ. Энэхүү мэдэгдэлд “Хууль, хяналт болон цагдаагийн байгууллагаас намайг ямар нэг хэрэгт холбогдуулан албан ёсоор дуудсан зүйл өчигдөрийг хүртэл байсангүй. Хэрвээ  намайг  эрэн сурвалжилж байсан бол надад болон  манай гэр бүлийнхэнд энэ тухай албан ёсоор мэдэгдэх ёстой. Гэтэл өчигдөр цагдаагийн ерөнхий газраас намайг эрэн сурвалжилж байгаа талаар хэвлэл, мэдээллийнхэнд мэдэгдсэн байна.

Ийм учраас миний бие цагдаагийн газраас өчигдөр хийсэн мэдээллийг хүлээн авч, эндэх ажлаа орхин маргааш эх орондоо очихоор боллоо. Миний бие ямар нэг хэрэгт холбогдож, Монгол улсын хууль зөрчсөний улмаас гадаад улс руу яваагүй бөгөөд Сингапур улсад болсон “Ахмад настанд эрүүл мэндийн тусламж үйлчилгээг чанартай хүргэх нь” сэдэвт олон улсын хуралд илтгэл тавин оролцож, Сингапур, Гонконг, Малайз зэрэг улсуудад ахмад настнуудын эрүүл мэндийн болон нийгмийн асуудалыг хэрхэн шийдвэрлэж байгаа талаар газар дээр нь биечлэн танилцаж, судласан юм” хэмээн мэдэгдэлдээ бичсэн байна гэв.

Эх сурвалж: Шуурхай.мн