АТГ-ын дарга агсан Б.Дангаасүрэн одоогоос дөрвөн жилийн өмнө буюу 2007 оны аравдугаар сарын 25-нд Австралийн Сидней хотод зуурдаар нас барсан. Түүнээс хойш ах дүүсээс нь холбоогоо тасалсан хэмээгдэж байсан эхнэр Д.Урансанаа нь хэд хоногийн өмнө хоёр хүүхдээ дагуулан талийгаачийн газар нь очиж, буян үйлдэж, ном уншуулжээ. Хүүхдүүдээ дагуулан талийгаач нөхрийнхөө дүү нартай уулзаж “Та нар сонин хэвлэлээр янз бүрийн юм битгий яриад байгаач ээ. Ухаан суусан хүүхдүүдэд хэцүү байна. Том хүү маань юмны учир ойлгодог болоод, надаас “Миний аав ингэж нас барсан  юм уу” гэж уйлж асуугаад байна. Аавынх нь талаар хамаагүй зүйл битгий яриач” хэмээн гуйсан тухай ойрын эх сурвалж нь дуулгалаа. Талийгаачийн дүү Б.Дансал өнгөрсөн сарын 26-нд УЕП-т ахынхаа үхэлтэй холбоотой есөн зүйлийг дахин шалгуулахыг хүссэн хүсэлт хүргүүлсэн. Хүсэлтийн хариуг ирэх долоо хоногт УЕП-оос өгөх юм байна.