Гадаадын хөрөнгө оруулалтын хуулийг шинэчлэн баталснаас хойш хоёр сар өнгөрлөө.

Гадаадаас Монголд орох мөнгөний урсгалд тавьсан элдэв саадыг энэ хуулиар арилгасан хэмээн Лондонд болсон хөрөнгө оруулагчдын чуулганаар Эдийн засгийн хөгжлийн дэд сайд О.Чулуунбат онцлон тэмдэглэж байлаа.

Өөрөөр хэлбэл, хилийн чанадаас мөнгө үүцэлж ирсэн бизнесмэнүүдийн 49 хувийн хөрөнгө оруулалтыг төрийн компани биш л бол парламентаар авч хэлэлцэж, хугацаа алддаг жишгийг халсан юм. Шинэ хууль дөнгөж “мэндэлсний” дараа Ерөнхийлөгчийн сонгууль эхэлсэн. Хэдхэн хоногийн дараа монголчууд Төрийн тэргүүнээ сонгоно.

Бас үндэстэн дамнасан томоохон корпорациуд, хөрөнгө оруулалтын сангууд “алтан өндөг” дарах үүрээ зэхнэ. Хөрөнгө оруулалтын хууль шинэчлэгдэхээс өмнө ч, одоо ч гадаадынхны мөнгөний сонирхлыг татах цэг нь Монгол мөн хэвээр байгаа юу гэсэн асуулт байна.

Хилийн цаанаас Монголыг зорин урсан орж ирсэн мөнгөний 80-аас илүү хувийг уул уурхайд хаягласан байлаа. 2010 онд манай улсад орж ирсэн гадаадын хөрөнгө оруулалт 1,6 тэрбум доллар байсан. Харин 2011 онд 4,6 тэрбум болж өссөн ч өнгөрсөн жил бараг нэг тэрбум “ногоон”-оор буурчээ. Одоогоор энэ тоо хангалттай өөрчлөгдөөгүйг эх сурвалж хэлж байна.

“Ерөнхийлөгчийн сонгууль гадаадын хөрөнгө оруулагчдыг хүлээлтэд оруулаад байна” хэмээн “Ройтерс”-ийн мэдээнд дурдсан байв. Харин эх сурвалж “Гадаадын хөрөнгө оруулагчид дахиад Монголд итгэх нь юу л бол. Хэдийгээр хууль өөрчлөгдсөн ч улстөржилт нь хаа хүргэхийг тэд одоо хэр нь тодорхой мэдэхгүй байгаа шүү дээ” гэсэн юм.

Зууны мэдээ