“Мобиком”-ын 9911… дугаартай алтан хэрэглэгч хүний нутагт амаараа шороо үмхэх шахсан түүх олон

хүнд хамаатай учраас хэвлэлд бичихээс аргагүйд хүрэв. Хэдхэн хоногийн өмнө ийм явдал боллоо. Монголд үүрэн утас гээч үйлчилгээ орж ирсэн цагаас хамгийн түрүүн шахам худалдаж авсан дугаараа өнөө хүртэл барьж буй хэрэглэгч Монголоос нисээд Москвад буух үедээ гар утсаа суйлуулав. Олон улсын түвшинд амжуулах маш чухал гэрээ хэлэлцээрээр яваа, гартаа байгаа дөрвөлжин төхөөрөмжид хамаг амьдралаа базаад явж байсан хун түүнийгээ хулгайд алдмагц хамаг хэрэг бүтэхгүйдээ тулаад ирж. Юуны өмнө дансаар нь мөнгө орж ирэх ёстой, түүнийг цахимаар харж зохицуулалт хийх ёстой. Гэтэл гар дахь электрон банк нь хулгайчийн гарт. Сандрахдаа хамт явсан хүнийхээ утсаар гэр рүүгээ, эхнэр рүүгээ мессеж бичжээ. Утсаа алдсан, миний дугаарыг яаралтай хаалгаарай гэв.

Эхнэр ч түргэн авч “Мобиком”-д хандлаа. Тэгсэн дугаарыг нь хааж өгдөггүй. Тэр эхнэрт ийм хүсэлт тавих эрх байхгүй гэж. Яагаад гэхээр дугаар өөр эмэгтэйн нэр дээр 20 жил болж байхад юун өөр эмэгтэй залгаад хаа гээд байгаа юм гэжээ. Түрүүчийн эхнэрээс салаад 10 жил болж байгаа, хос эдүгээ хамт амьдраад мөн олон жил болж байна, батлуулаагүй л болохоос гэж хамаг амьдралаа он дарааллаар нь тайлбарлахад хүрчээ. Тэгээд ч нэмэр болсонгүй. Утсаа алдсан хүн интернэтээр өөрийнхөө хаягаас “Мобиком”-ын хаягаар хэрэглэгчийн байр сууринаас хандаж захидал илгээвэл хулээж авч дугаарыг хааж болно. Нөгөө нэг хувилбар нь шинэ эхнэр нь, шинэ нөхрийнхөө (хамт амьдраад бараг арваад жил болж буй) хуучин эхнэрээсээ салсан тухай шүүхийн шийдвэрийг “Мобиком”-д авчирч харуулж, өөрийнхөө зүс царайг үзүүлж бараг л камерт зургаа даруулж байж дугаарыг хаалгах шаардлага тавьжээ. Яаралтай арга хэмжээ авахгүй л бол хүний газар хувхай хоосон, гахай явган болсон нөхрийнхөө хөөцөлдөж яваа ажил хэргииг бодоод аргагүйн эрхэнд хуучин эхнэрээсээ шүүхийн шийдвэрээр салсан тухай баримтыг дараа өдөр нь барьж очиж дугаарыг нь хаалгажээ.

Бүсгуй үгээ хэлж байна. “Мобиком” 9911 дугаартай алтан хэрэглэгч гэж “хошгируулаад” хамаг мөнгийг нь саахаас өөрөөр алтан ч байна уу, мөнгөн ч байна уу хэрэглэгчдээ яаж дээдэлж  эрхэмлэж байгаа юм. Хулгайчид утсаа аддаад байна, цахим ертөнцөд муу бүхэн байдаг болсон өнөө цагт хувь хуний хэрэглэгчийнхээ эрх ашгийг яаж хамгаалж байгаа юм. Ямар их хүнд суртал, ямар бүдүүлэг. нервтэй үйлчилгээ болоо вэ. “Мобиком” чинь гэр бүл бүртгэх товчоо биш биз дээ, арай ч дээ. Тэгээд ч хүний хувийн нууцад хэтэрхий эрээ цээргүй нэвтэрч байгаа юм биш үү гэх зэргээр бухимдав.

Мөн энэ бүсгүйд өмнө нь энэ компанитай. үйлчилгээтэй нь холбоотой бас нэгэн явдал тохиолдож байж. Өөрийнх нь утас охиныхтой нь зэрэгцээд байж байх үед утас нь дуугарахад хартал  охиных нь дугаар орж ирэв гэнэ. Гэтэл охины утас байсан газраа анир чимээгүй хэвээр. Эдний гэр   бүлийнхэн мэл гайхаж цэл хөхрөөд “Мобиком” руу залгаж учрыг лавлахад “Манай техникийн ажилтнууд л мэднэ дээ. Ямар нэгэн алдаа гарсан юм болов уу даа, уучлаарай. Дахин ийм явдал гарахгүй байх аа” гэж тайлбарлажээ. Үнэхээр л тэгсэн юм байх гэж бодоод тэр үед дуугүй өнгөрсөн аж. Үүнийг бас юу гэж ойлгох вэ.

Нэг гэр бүлийн хэрэглэгчдэд хоёр жилийн хугацаанд ийм ноцтой зөрчил гарсан байхад бусад хэрэглэгчдэд юу эс тохиосон байж таарах вэ. “Мобиком” арай ч дээ. Хэрэглэгчдэд үйлчилсэн шиг үйлчлэхгүй байж өч төчнөөн мөнгө авахын зэрэгцээ элдэв хөөрөгдсөн мессеж байн байн явуулж залхаадгаа хэзээ болих юм бол. Тэгээд болоогүй элдвээр реклам цацна. Юун алтан хэрэглэгч, тэр чинь амьдаараа авсанд орохоос наагуур байлаа.

ЭХ СУРВАЛЖ:ӨДРИЙН ШУУДАН