Өнгөрсөн жил хөдөө орон нутгийн зам дээр нийт  371 осол аваар гарсан байна. Харин он гарсаар эхний 4 сарын байдлаар нийт  67 осол гарч 69 хүн амиа алджээ. Үүний 21 тохиолдол нь мотоциклтой холбоотой гарсан байна. Холбогдох байгууллагаас эдгээр ослын шалтгааныг шалгаж үзэхэд дийлэнх тохиолдол нь Хятад мотоциклтой холбоотой байгаа нь тогтоогдсон байна.

Сүүлийн үед хөдөө орон нутгийн иргэд Хятад мотоциклийг мал хөсгөө хариулах, хот хөдөө явах зэргээр ашиглаж байгаа. Гэтэл энэ мотоцикл нь аминд хүрэх аюултай, чанарын шаардлага хангадаггүй байна. Тухайлбал Хятад мотоцикл нь хайлшин хаймраар хийгддэг,  дан хигээстэй байдаг бөгөөд зөвхөн хар зам дээр явах зориулалттай. Гэтэл малчид хад, чулуу ихтэй газраар унаж ашигладаг. Улмаар зориулалтын бус газраар унаснаас болж хаймар нь задарч гэмтсэн, хигээс нь далийсан зэргийг анзаардаггүй, согтууруулах ундааг хэрэглэсэн үедээ жолоо барих мөн гэмтэлтэй, хигээс нь далийсан дугуйгаа бүрэн бүтэн эсэхийг нь шалгахгүй замд гардаг, оройн цагаар гэрэл нь шатсан мотоциклотой хэрнээ асаагуурын чийдэнг ашиглаж хөдөлгөөнд оролцож байгаа зэрэг нь осол аваар гарах гол шалтгаан болдог байна.

Иймд хөдөө орон нутгийн зам дээр  осол аваар их гарч байгаатай холбогдуулан Замын цагдаагын газраас энэ 5 сард Мотоцикл-Хамгаалах малгай гэсэн аяныг өрнүүлээд дуусаж байгаа юм байна. Аяны хүрээнд бүх аймгуудын замын цагдаагийн тасагтай хамтран ажиллаж иргэдийг хамгаалах малгай хэрэглүүлж сургах, мотоциклийг нь улсын дугаартай болгон бүртгэх, жолооч нарыг нь үнэмлэхжүүлэх зэрэг ажил хийжээ.

Эх сурвалж: Шуурхай.мн