Төгсөлтийн баяр буюу хонхны баярууд ид үргэлжилж байна. Олон нийтийг хамарсан баяр үргэлжилсээр Цэргийн баяраар завсарлаж, Эх үрсийн баяртай золгох нь уу гэтэл үгүй юм аа. Хавар чинь ЕБС-ийн болон их, дээд сургуулийн төгсөгчдийн баяраар төгсгөл болдог юм байна.

Сургуульдаа сурч байх хугацаандаа магадгүй энэ л өдөр хамгийн гоё болцгоодог байх. Цэмцгэр хослол, хоолой бариу зангиа, гялалзсан гутал, шинэхэн дээл, гоёмсог даашинз, өндөр өсгийт, үс, зүс ярих юм биш харагдана. Үгүй энэ “Хонх”-ны баяраар хэдэн ч янзын хувцас өмсдөг юм бэ. Лавтай гурваас дөрвөн ээлжийн хувцас бэлддэг бололтой. Энэ олон янзын хувцас сольж Бээжин, Эрээнд орлого оруулж байхаар энэ мөнгөө дотооддоо шингээвэл яасан юм бол. Америк, Европыг дуурайж төгсөлтийн хувцас өмсөх юм. Үүний оронд үндэсний уламжлал ёсоор Монгол дээлээ өмсөөд “Төгсөлтийн баяр”-аа хийдэг бол санхүүгийн хувьд ч хэмнэлттэй, үндэсний өв уламжлалаа хүндэтгэсэн харагдах учиртай.

За зүс царай, гоёмсог засалттай толгой ч яамай. Харин хэр зэрэг тархиныхаа үрчлээг нэмэгдүүлсэн болоо гэдэг л сонин. Зарим нь шалгалтаа өгөөгүй дундуурхан баярладаг бол зарим нь төгсөлтийн шалгалтаа өгч, дипломоо хамгаалчихсан санаа зовох зүйлгүй сэтгэл дүүрэн баярлана аа. Аа бүр аль алиныг нь ч бодох зүйлгүй сэтгэл амар баярлах нэгэн ч бий шүү.

Төгсөгчдийн хонхны баярын өдөр том оврын автобусууд хөлхөлдөн баахан түгжрэл үүсгэж ажлаа гүйцэлдүүлж яваа нэгний уур цухлыг хүргэнэ дээ.  Ингээд л Гандангийн дэнж, Зайсан толгой, Сүхбаатарын талбай, баар, ресторанаар орж сэтгэлээ сэргээж аваад оройхон аль нэг амралтын газрыг эсвэл гадаадыг зорино. Бээжин, Хайнан, Утай гумбум, Дубай, Чэжү, Сингапур зэргээр аялдаг юмдаг уу даа. Баян айлын хүүхдүүд сурдаг сургуулийн төгсөгчид голдуу гадаадад аялж, амардаг гэнэ лээ. Сэтгэлгээгээ цэвэрлээгүй хүн хэрэглээг шүтдэг гэсэн үг ч байдгийг энд дурдъюу.

Амралтанд яваад согтуурах нь ч бүр ойгомжтой юм билээ. Хэрхэн согтуурахаас шалтгаалж тэр амралтын дурсамж тодорхойлогдоно доо. Зарим тохиолдолд найз нөхөд нэгэндээ агсам тавьж, аминд нь хүрсэн ч явдал гарсан. Ингээд хоёр, гурав хоноод ирмэгц шалгалт, диплом хамгаалалт эсвэл ажил, амьдралын их хаалганы аль нэг нь л хүлээж авна. Мэргэжилтэй, цол, зэрэгтэй бэлэн бүтээгдэхүүн болсон тэдэнд ахиад хоёр сонголт бий. Нэг нь ажилтай, нөгөө нь ажилгүй…

“Хонхны баяр” гэдэг нь угтаа төгсөлтийнхөө сүүлчийн хонхыг сонсоод цаашид  дэвшин суралцах, мэргэжилтэй ажилтан болж завсарлагааныхаа хонхыг сонсож суухгүй, ахин энэ танхимдаа суухгүй тул үдэлт л хийж байгаа юм. Үүнийг зарим нь нүсэр баяр болгон гүйцэлдүүлдэг. Баярлахын зэрэгцээ ээж, аавынхаа нуруун дээр овоохон том эдийн засгийн ачаа үүрүүлчихэж байгаа юм. Багаар бодоход сая төгрөгөөр тогтдоггүй байх шүү. Үр хүүхдээ бусдаас нь дутуухан харагдуулчихгүй юмсан, баярыг нь сэтгэл дундуурхан өнгөрүүлчихгүй юмсан гэсэн ээж, аавын сэтгэл яаж ийгээд болгоно доо. Цагаан сарын баяраа тэмдэглэн өнгөрүүлэх төсвөөс ч давчихдаг шүү.

Х.Заяа

Эх сурвалж: Шуурхай.мн