Монгол Улсын ерөнхийлөгчийн сонгуульд МАН-аас нэр дэвшигч Б.Бат-Эрдэнийн сонгуулийн сурталчилгааны нээлтийн ажиллагаа боллоо. Нээлтийн ажиллагаанд тус намын гишүүд, дэмжигчид, хөдөө орон нутгаас ирсэн төлөөллүүд хүрэлцэн ирж, СТӨ-нд уриа лоозонгоо барин оролцов.

Сурталчилгааны ажлыг эхлүүлж, тус намын дарга Ө.Энхтүвшин үг хэлсэн. Тэрбээр “Монголчууд бид улсын ерөнхийлөгч, төрийн тэргүүнээ сонгох нэн хариуцлагатай босгон дээр тулж ирээд байна. Энэ удаагийн сонгууль нэлээд амаргүй байх болно. Гэсэн ч манай нам улс эх орныхоо төлөө ихийг хийж бүтээсэн, Монгол Улсын даяар дуурсагдах, далай, даян, дархан аварга, цагдаагийн хурандаа, Хөдөлмөрийн баатар, УИХ-ын гишүүн Бадмаанямбуугийн Бат-Эрдэнэд итгэл үзүүлэн энэ удаагийн ерөнхийлөгчийн сонгуульд нэр дэвшүүллээ.

Түүнийг зүгээр нэг хурлаар хэлэлцээгүй. Бүх ард түмний санал асуулгаар сонгосон. Ингэхдээ жирийн малчин, Нарантуулын худалдаачин, барилгачин зэрэг эгэл жирийн ард түмний санал, хүсэлтийг авч байж энэ шийдвэрт хүрсэн. Тэр бол манай намын төдийгүй Монгол Улсын эрхэм хүний нэг. Тиймдээ ч эрх баригч намын хаана, бооно, хязгаарлана, цуцлана гэж, Ардчиллыг устгаж байгаа үйлдэл бүхнийг нь таслан зогсоохын тул түүнийг нэр дэвшүүллээ. Б.Бат-Эрдэнэ өөрийгөө дүгнэхдээ “Би амьтны амь таслахгүй, алт эрдэнэс ухахгүй, архи дарс гэхгүй, албан тушаалаараа онгирохгүй, хуулийг гууль болгохгүй, худлыг зөв болгохгүй, ард түмнийг алаг үзэхгүй, ардчиллыг дарангуйлал болгохгүй” хэмээн андгайлсан. Энэ бол жинхэнэ жудаг ёстой, эвийг эрхэмлэдэг хүний үзэл бодол” гэв.

Харин МАН-аас нэр дэвшигч Б.Бат-Эрдэнэ энэ үеэр “Манай намын гишүүд дэмжигчид, олон түмний санаа бодлыг харгалзан намайг Монгол Улсын ерөнхийлөгчийн сонгуульд өрсөлдөх, хүндтэй бөгөөд хариуцлагатай үүрэг хүлээлгэлээ. Миний гарал үүсэл, сэтгэл оюун, хөдөлмөр зүтгэл, сүлд хийморийг минь үнэлж, төрийн тэргүүнд нийцнэ хэмээн үзсэнийг нэр төрийн хэрэг хэмээн ойлгож байна. Монголынхоо төлөө, монгол хүнийхээ төлөө сайн үйлс бүтээж, хүртээхсэн гэж зорьж явдаг. Би монгол хүний ёс жудгийг чанд сахиж, зөв бодолтой, эрч тэмүүлэлтэй, шударга өрсөлдөх болно. Өнөөдөр манай улсад өсөн дэвжиж байгаа олон зүйл бий. Бидэнд цаг алдалгүй засч залруулах зүйлүүд ч байна. Хүн ардынхаа сайн сайхны төлөө засч залруулах зүйлсийг шийдвэрлэхэд намчирхал гэсэн том сааднаас болж, ард түмэн хуваагдаж, улс орон хүчгүйдэж байна. Ингэснээр ард түмний баялаг цөөхөн хүний гарт очиж, баян хоосны ялгаа нэмэгдэж байна.

Монгол Улсын газар нутгийн бүрэн бүтэн байдал сэтгэл эмзэглүүлж байна. Иргэдийн маань бодит орлого нэмэгдэхгүй байхад бараа бүтээгдэхүүний үнэ нэмэгдсээр байна. Шүүх хяналтын байгууллагууд ард түмэнд ялгаатай хандаж байна. Энэ бүхнийг зөв замд нь оруулах нь Монгол Улсын ерөнхийлөгчийн эрхэм үүрэг гэж ойлгож байна. Тиймээс “Эвийг эрхэмлэнэ. Зөвийг дэмжинэ” гэсэн уриатайгаар энэ удаагийн сонгуульд оролцож байна. Улс төр, нийгмийн бүхий л харилцаанд үүсээд байгаа үгүйсгэл, буруутгах гажуудлыг арилгана. Үндэсний баялаг бүтээгчдийг цаг ямагт дэмжинэ.

Хамгийн их анхаарал татсан асуудал бол авлигал хээл хахууль. Авлигал хээл хахуультай тэмцэхдээ энэ манай намынх, тэр өөр намынх, ах дүүс минь, анд нөхөр минь гэж ялгахгүй тууштай тэмцэнэ. Энэ авлигалтай тэмцэхдээ хүний өөрийн гэж ялгахгүй үндсээр нь тастан хаяна. Үндсийг нь тастаж хаяснаар авилгалын хөрс үгүй болно. Өнөөдөр улс төрийн орчин бохир байна, улс төрийн тогтолцоо нь өөрөө гажуудсан байна. Тиймээс оройгоос нь эхлэн ажлаа эхлүүлнэ” гэв.

Эх сурвалж: Shuurhai.mn