МАХН  хуралдаж У.Барсболд гэдэг нарийн бичгийн даргаа намаасаа хассан. Энэ мэдээ олон улс төрчдийг айлгаж, бас заримыг нь баярлуулж байна. Н.Энхбаярыг цээжээрээ хамгаалагчдын нэг, бас түүний гол санхүүжүүлэгч гэгдэж байсан У.Барсболдыг намаас хөөх ажлыг гардан зохион байгуулагчаар УИХ-ын гишүүн О.Баасанхүү тодроод байна. У.Барсболд МАХН-д Удирдах зөвлөлийн гишүүн, намын нарийн бичгийн дарга, Засгийн газрын гишүүн зэрэг өндөр албан тушаалуудыг хашиж явсан хүн. Гэтэл түүнийг нам дотор хаалттай хэлэлцсэн нууц асуудлуудыг гадагш задалсан, орон нутгийн сонгуулиар намынхаа төлөө биш эсрэг намын төлөө ажилласан гэх мэт үндэслэлүүдээр буруутгасан. Тиймээс У.Барсболдыг түлхэж унагах, бас үүнийгээ баримтжуулахын тулд УИХ-ын гишүүн О.Баасанхүү тун их идэвхитэй ажиллаж байгаа гэнэ. О.Баасанхүү гишүүн У.Барсболдыгоо мөрдөж, мөшгиж, бүр камер бариад харанхуй шөнөөр баар ресторан хэсэж явдаг болж. У.Барсболдыг амралтын өдрөөр намынхантайгаа наргиж байхад нь УИХ-ын гишүүн О.Баасанхүү, МАХН-ын Чимэдцэрэн, Ангараг, Лхагвацэдэн нарын гурван нарийн бичгийн дарга нараа дагуулан орж ирэээд “Та нар Н.Энхбаяр даргыг ажлаас нь чөлөөлж оронд нь У.Барсболдыг сонгох хуйвалдаан зохион байгуулж байна” гэж дайржээ. Энэ байдлаас үүдэн  тэд хоорондоо хэрэлдэж, зодоон цохион дээрээ тулж бүр сүүлдээ цагдаа сэргийлэх дуудажээ. Нэг намын залуучууд  ийнхүү хагаралджээ.