Хотын “А” зэрэглэлийн буюу ний­тийн эзэмшлийн талбайд барилга барьж мөнгөө арвижуулдаг нөхөд УИХ-д бий. Тухайлбал “Хурд” компани бидний сайн мэдэх “Хүүхдийн урлан бүтээх төв”-ийн ха­шааны зүүн хэсгийг луй­вар­дан авч нэлээд хэрүүл шуугиан тарьж байсан.

Тиймээс нийслэлд   өд­гөө  “Хурд”  ком­панийн барилга  хаа сайгүй л сүндэрлэх болсон нь олон хүний анхаарлыг татсаар байгаа юм. Өнгөрсөн жил “Суруга Монгол” ком­панийн Япон захирлыг манай нөлөө бүхий улстөрчид хар тамхины хилс хэрэгт гүтгэж түүнийг “аавынд” илгээх дөхсөн.

Тэгвэл энэ удаа “Суруга монгол” компанийн эзэмш­лийн газрыг  “Хурд” компани өөрийн болгож олон давхар барилга барихаар иргэдтэй багагүй тэмцэл өрнүүлээд байна.

Хамгийн гол нь эл газрыг ямар арга замаар авсныг оршин суугчид болон иргэд гайхаж  байна. Уг нь хэл ам таталж буй Япон хорооллын газар нь хоёр улсын хооорондох хэлэлцээрээр  хийгдсэн гэсэн.

Гэтэл  чухам яагаад тус компанийн  мэдэлд орчихсон нь ийнхүү хүмүүсийн гайх­ширлыг төрүүлж олны анхаарлыг татаад байна. Эл газрын асуудлаар Хан-Уул дүүргийн XV хороо­ны нутаг дэвсгэрт орших “Дөрвөн улирлын цэцэрлэг”  хорооллын оршин суугчид  өнгөрсөн баасан гарагт “Хурд” ХХК-тай багагүй мар­гаан дэгдээжээ.

Тодруулбал “Хурд” ХХК  тус  хорооллын  замын урд талд байдаг бусдын эзэмш­лийн талбайд 22 давхар бүхий 10 мянган айлын орон сууцны барилгын ажлыг эхлүүлэхээр нүсэр том тех­никүүдийг  хэдийнээ оруулж оршин суугчдын тав тухыг алдаг­дуулж эхэлжээ.

Дээрх хорооллыг барьсан “Суруга Монгол” компани  анх оршин суугчдад байраа зарахдаа “Зураг төлөвлөлтөд байгаагаар байрны эргэн тойронд   ямар ч  өндөр ба­рилга байгууламж барих­гүй. Ха­рин газар  хөд­лөлтөөс урьдчилан  сэргийлж тал­байд зөвхөн намхан байр буюу хауснууд барина” гэсэн зураг төсөлтэй байжээ.

Гэтэл өдгөө дээрх  зураг төлөвлөлт өөрчлөгдөж 22 давхар орон сууц  сүндэр­лэхээр болжээ. Оршин суугчид тус хо­рооллын  байрыг  худалдаж авахдаа орчин нь чөлөөтэй, агаар нь харьцангуй цэвэр, байгалийн үзэсгэлэнт дүр зургийг  л чөлөөтэй харж  байх гэж худалдаж авсан юм гэж хэлж байсан юм.

Гэтэл одоо “Хурд” компанийн 22 давхар байр ашиглалтад орвол  оршин суугчдад юу ч хараг­дахгүй болох аж.  Иймд оршин суугчид эсэргүүцэж Нийслэлийн Засаг дарга Э.Бат-Үүлд албан тоот илгээж тус барилгын ажлыг зог­соож өгөхийг хүссэн байна.

“Хурд”-ыг чухам ямар замаар энэ их хэмжээний газрыг гартаа оруулав гэдэг нь хачирхалтай. Уг асуудлын талаар тус хорооллын оршин суугчдтай уулзахад “Манай хотхон жижигхэн гурван байртай. Та бүхний харж байгаа уг газарт зөвхөн хаусууд босох төлөвлөгөөтэй байсан юм.

Гэтэл манай хорооллыг барьсан “Суруга Монгол” компанийн захирал “Хурд” компанид ийм том хэм­жээний газар зарсан байна. Анх бид уг хорооллын бай­рыг  худалдаж авахдаа ор­чин, үзэгдэх харагдах бай­дал гээд олон талаас нь судалж байж сонгож  авсан.

Бид  өнгөрсөн   долоо хоногт Хотын дарга Э.Бат-Үүлд   албан  бичиг  явуу­лахдаа нэг л зүйлийг анхаа­рахыг хүссэн. Түүндээ “Бидний амьдарч буй хо­­­рооллын анхны төлөв­лөлтийг өөрчлөхгүй хэвээр хадгалан, оршин суугчдын амьдарч буй орчны чанарт сөргөөр  нөлөөлөх ямарваа нэгэн үйл ажиллагаа  явуу­лахыг хориглож, улмаар тус хорооллын анхны тө­лөв­­лөлтөөс өөр барилга бай­гууламж барихыг таслан зог­соож өгөөч”  гэж хүссэн.

Харин бидний явуулсан санал  гомдлыг хотын дарга хүлээж аваад “Хурд” ком­­­­панийн барилгын үйл ажиллагааг өнөөдрөөс / өчиг­дөр/ эхлэн түр хугацаа­гаар зогсоох шийдвэр гаргасанд оршин суугчид бид баяртай байна. Манай хороолол газар хөдлөх хам­гийн  ма­гад­лалтай,  аюултай бүс гэгддэг.

Гэтэл “Хурд” компани иргэдийн аюулгүй байдлыг хангах биш зөв­хөн өөрсдийн халаасанд орох гэж буй өндөр үнийг иргэдээс дээ­гүүрт тавьж болохгүй бай­маар юм.

Мөн Хан-Уул дүүргээс УИХ-д сонгогдсон Лу.Болд, Ц.Оюунгэрэл нар сонгогдсон тойргийн иргэдэд нь ийм хүнд асуудал тулгараад бай­хад өдий болтол мэдээгүй байна гэж баймааргүй юм.

Анх бидний саналыг авахдаа иргэдтэйгээ ойр ажил­лаж санаа бодлыг нь сонсож хамтарч ажиллана гэж байсан. Гэтэл  өнөөдөр харагдах ч үгүй байгаад ха­рамсч байна. Нөлөө бүхий улс­төрч хүний барилга гэ­хээр хэнд ч захирагдахгүй байдаг нь харагдаж байна.

Тухайлбал хотын даргын захирамж нь гараад төрийн цагдаа ирж барилгын ажлыг зогсоох гэхэд “Бидэнд тэр хууль,  хотын   даргын шийд­вэр ха­маагүй” гэж хэлээд ажлаа үргэлжлүүлээд байх юм билээ. Нэмэлт цагдаа нар дуудсаны хүчинд ажлаа зогсоолоо шүү дээ.

 Тэгээд ч эл газрыг Япон захирлаас бараг л дээрэмдэж авсан тухай олон хүмүүс ярих юм билээ. Бид уг газартай хол­боотой баримтыг заавал илрүүлэх болно. Үүнд бидний үр хүүхэд болон амьдрах таатай орчин гээд олон зүйл нөлөөлж байгаа учир  бид тэмцэж байгаа юм.

Ер нь “Суруга Монгол” ком­панийн захирал “Хурд” компанид урд газрыг зарсан ч юм уу дээрэмдүүлсэн  үгүйг хэн ч хэлж мэдэхгүй шүү дээ.   Тиймээс л тус ком­панийн ажилчид “Бид өөрсдийн худалдаж авсан газраа юу хийх нь бидний дур”  гэж аашилж байгаа нь хуульд хэр нийцтэй юм бол доо.

Бид ямартай ч эцсээ хүртэл энэ газрын төлөө тэмцэнэ. Анх бидэнд үзүүлж байсан төлөвлөлтөөрөө л байх ёстой гэдгийг дахин хэлмээр бай­на” гэлээ.  Ер нь “Хурд” компани барилгын  ажлыг  эхлүүлэх­дээ ямар ч зөвшөөрөлгүй эх­лүүлдэг  олон  баримт  бий.

  Яг энэ жишгээр тус хо­рооллын урд талбайд сүндэр­лэх гэж буй барилга нь ямар ч зөв­шөөрөлгүй  байсан гэд­гийг оршин суугчид хэлж байсан юм. Энэ мэтчилэн  “Хурд”-ын барил­гатай хол­боотой олон таагүй  явдлуудын  нэг  нь  барь­сан барилга нь тогтоосон метр квадратдаа  хүрдэггүй, байнга 2-5 метр квадрат дутуу байдгаас болж худалдан авсан иргэд хохирсоор бай­­­­гаа.

Төв цэнгэлдэхийн ойрол­цоох “Рапид харш” гэ­сэн гоё нэртэй барилгууд ашиг­лалтад ороод удаагүй байхдаа тааз, булан тохой нь мөөгөнцөрдөж, дээврээс нь дусаал гоожих зэргээр оршин суугчдын тав тухыг алдагдуулж байсан нь саяхан.

Зарим эх сурвалжийн мэ­дээлж буйгаар “Суруга Монгол”-ын их хэмжээний  газрыг эртнээс манай нөлөө бүхий улстөрчид авахыг санаархаж  Япон захирлыг нь янз бүрээр дарамтлаж байсан аж. Тиймээс энэхүү  газрыг өнгөрсөн жил өөрс­дийн болгож авсан тухай мэдээлж байсан.

Тэгэхээр   томоохон ар талтай гэгдэх “Хурд” компанийн даварсан үйлдлийг  зогсоох эрх дарх­тан Шинэч­лэлийн Зас­гийн газарт бай­на уу.  Бид дараагийн дугаартаа  “Хурд” компани  ямар нэр бүхий улс­төрчидтэй нийлж тус газрыг хэрхэн авсныг эрэн сурвалжилж  да­раагийн дугаартаа  баримт­тайгаар дурдах болно.