“Анод” банкийг үүсгэн байгуулсан гурван эрхэм анхан шатны шүүхээс 5-6 жилийн ял сонсон 461 дүгээр хорих ангид хоригдож байгаа. Давж заалдах шүүх хурал энэ 17-нд болно. Банкны захирлууд үүнд их найдлага тавьж байгаа юм билээ. “Анод” банкны ТУЗ-ын дарга байсан Н.Давааг Иргэний хөдөлгөөний нам гэж гүйгээгүй, хоёр “ах” намын аль нэгэнд нь элсээд, томоохон хандив өгчихсөн бол өдийн урьдчилан хорих төвд биш, УИХ-ын танхимд сууж байгаа гэж олон хүн ярьдаг. Хоёр том намд тал тохой татдаггүй, мөрөөрөө явдаг “Анод” банкны захирлуудын эхэлсэн ажлыг “дээрээс” тас цохидог байсан гэдэг.

“Анод”-ын ТУЗ-ын дарга Н.Даваа “Замын-Үүдын хил дээр 40 шинэ микро автобус явуулахад эсрэгээр нь 200 ширхэг УАЗ 469 явуулж ажлыг нь бодлогоор тасалсан бол такси үйлчилгээний чиглэлд  1000 шинэ такси гаргахад, өөдөөс нь сөргүүлж, 5000 сэг оруулж ирэн угсраад тээвэрт явуулсан гэж  учир мэдэх хүмүүс хэлдэг. Нэгийг нөгөөгөөр цохиж унагана гэдэг л энэ байх. Оюутолгой, Олон овоот болон бусад том ордуудын лиценз “Анод” банкны барьцаанд байхад улс төрийн эрх мэдэлтэй байсан хүмүүс янз бүрээр оролдсоор байгаад байхгүй болгосон. “Аэремонголиа” компани Европоос дөрвөн онгоц оруулж бэлтгэл ажлаа хангаж санхүүгийн асуудлаа “Анод” банкнаар шийдүүлж байтал бас л байхгүй болгож “Аэремонголиа”компанийн үйл ажиллагаанд хүндрэл учруулсан гэдэг.

Ер нь “Анод”-ынханы үндэсний эрх ашгаа бодож хийсэн болгоныг нурааж, чөлөөт зах зээлийн ямар ч ойлтголтгүй нөхдүүд улсын эдийн засгийг дампууруулж, ард олныг сөхрүүлдэг нь нууц биш үнэн. Эрх мэдэлд хүрч эх орноо худалдсан нөхдүүдтэй харьцуулахад “Анод”-ынхон олон зүйл ярилгүй эрчүүд шиг байж, үндэснийхээ эрх ашгийн төлөө чадах бүхнээ хийж байсан” гэж  хуучин

“Анод” банкинд ажиллаж байсан ажилтнууд нь зүгээр ч нэг ярилцдаггүй болов уу.  Олон хүмүүс “Анод” захиралуудын бизнесийн түүхийг мэддэг. “Гацуурт”-ын Чинбат, УИХ-ын гишүүн “Мон уран”-ны Б.Наранхүү,”Монгол газар” Мянганбаяр зэрэг Монголын том бизнесүүд бүгд л“Анод” банктай харилцдаг байсан гэдэг. Тэд ч харилцаагаа нууж байгаагүй. Хөдөлмөрлөж босгосон бүтээж чадсан улс дотор биш үндэстэн дамансан олон улс хэмжээнд Монгол хүн ажиллаж чадна гэдгийг харуулсан. Байгаа бүхнээ алдахдаа дуугүй байсан. Чимээгүй тэвчээртэй хүлээж сурахыг цэргээс сурсан бэлтгэл офцер Н.Давааг суллачихаасай гэсэн хүмүүс олон байдаг. ШШГЕГ-ын харъяа 461 дүгээр ангид хар үс, ногтон сахлаа цайтал хоригдож байгаа Н.Даваагийн “төрийн хамгаалалтанд” хоригдож байх үеийн зураг. Хичнээн сайн эр ч төрийн дор гэж үнэн юм даа. Үнэхээр шударга шүүх Монголд ажилладаг бол 4 сарын 17-ны давж заалдах шатны шүүх хурлаар Н.Даваа суллагдах ёстой.

Эх сурвалж “Сэрүүлэг” сонин