Өнгөрөгч сонгуулийн маргаан өнөөдрийг хүртэл эцэслэн шийдэгдээгүй байгаа учраас өдгөө УИХ 74 гишүүнтэйгээр үйл ажиллагаа явуулж буй. Өвөрхангай аймаг, Сонгинохайрхан дүүргийн сонгогчид төрд төлөөлөх элчээ жинхэнэ утгаар нь сонгож чадаагүй байна. Тиймээс энэ сарын 14-ний өдөр буюу ням гаригт Сонгинохайрхан дүүрэгт дахин санал хураалт явуулах юм. Дахин санал хураалтын өмнө хоёр нэр дэвшигч сурталчилгаа хийх нь хуулиар хориотой. Гэтэл АН- аас нэр дэвшигч Л.Эрхэмбаяр ил далд сурталчилгаа хийн, удаа дараа хууль зөрчив. Намынх нь удирдлагуудын зүгээс ч ийм явдлыг хөхүүлэн дэмжжээ. Анхнаасаа “мордохын хазгай” болсон Л.Эрхэмбаяр сонгуульд ялагдал хүлээснээ эс зөвшөөрч удаа дараа шүүхээр заргалдсаар өнөөдрийг хүрсэн. Түүний ийнхүү шүүхээр заргалдаж байгаа асуудлыг ямар ч үндэслэлгүй гэдгийг удаа дараа хууль хяналтын байгууллага тогтоож өгсөн. Учир нь тэрбээр Ерөнхийлөгчийн зөвлөх хэмээх нэр зүүдэгтээ эрдэж, шүүх эрх мэдлийг гартаа хийсэн Ц.Элбэгдоржид ихээхэн найдлага тавьж байсан бололтой. Орон нутгийн сонгуулийн дараа Сонгинохайрхан дүүрэгт МАН ялалт байгуулж, харин АН ялагдал хүлээсэн. Тиймээс тус дүүргийн АН-ыг 10 гаруй жил завсаргүй удирдаж 2004, 2008, 2012 оны орон нутгийн сонгуулиудад удаа дараалан ялагдуулсан учир дүүргийнх нь Ардчилсан намынхан Л.Эрхэмбаярт хариуцлага тооцож, хуралд оролцсон гишүүдийн 96,4 хувиар огцруулсан ч мань эр тамга тэмдгээ аваад зугтаасан билээ. Уг нь Сонгинохайрхан дүүргийн дахин санал хураалт эрт явагдаж, сонгиночууд төрд төлөөлөх элчээ аль хэдийнэ сонгох байлаа. Гэтэл хэзээний тахимаа өгөх дургүй Л.Эрхэмбаяр Ц.Элбэгдоржийг өмнөө барин хууль хяналтын байгууллагаар гүйсээр өнөөдөртэй золгов. Уг нь нийслэлийн Захиргааны хэргийн шүүх АН-аас нэр дэвшигч Л.Эрхэмбаярын нэхэмжлэлийн зарим шаардлагыг хүлээн авахаас татгалзаж, үлдсэн хэсгийг хэрэгсэхгүй болгон шийдвэрлэсэн байна. Өөрөөр хэлбэл, Захиргааны хэргийн давж заалдах шатны шүүх нэхэмжлэгчийн итгэмжлэгдсэн төлөөлөгчийн гомдлоор уг хэргийг хянан хэлэлцээд, Л.Эрхэмбаярын нэхэмжлэлийн шаардлагыг бүхэлд нь хэрэгсэхгүй болгож байв. Ийнхүү үнэнч шударгаар өрсөлдөхөөс халган удаа дараа шүүх, хууль хяналтын байгууллагаар гүйж, Ц.Элбэгдоржоос дэмжлэг хүссэн ч олны хараанаас мултарч чадаагүй учир арга буюу дахин санал хураалтад оролцох болж, ийнхүү хууль зөрчиж явна. Л.Эрхэмбаярт суудал авч өгөхийн тулд эрх баригчид ч улайрсаар байна. Тэгэхээр сонгиночуудын хувьд ирэх ням гаригт удаа дараа хууль зөрчсөн Л.Эрхэмбаярын төлөө саналаа өгөхгүй нь мэдээжийн хэрэг. Өөрөө хууль сахиулах дээд байгууллагад иргэдээ төлөөлөхөөр сонгуульд оролцох гэж байж ийнхүү хууль зөрчиж байгаа нь түүнийг “өвдөг шороодохоос” өөр аргагүй болголоо. Эсвэл иргэд сонгогчдоо тэнэгт тооцсон хэрэг үү. Харин өчигдөр МАН-ын нарийн бичгийн дарга Ц.Мөнх-Оргил, Сонгинохайрхан дүүргийн МАН- ын хорооны тэргүүлэгч гишүүдээс хэвлэлийнхэнд энэ тухай мэдээлэл хийж тодорхой баримтуудыг дэлгэсэн юм. Тиймээс олныг үл нуршин энэхүү баримтыг бүрэн эхээр нь хүргэж байна.

Баримт-1. Ардчилсан намын дарга, Ерөнхий сайд Н.Алтанхуяг “Шинэчлэлд сэтгэл хэрэгтэй” нэртэй уулзалтыг 13-ны өдөр Буянт Ухаа дахь спорт цогцолборт хийхээр төлөвлөөд байгаа тухайгаа Сонгинохайрхан дүүргээр тараагаад байна. Уг уулзалтдаа Сонгинохайрхан дүүргээс 300 төрийн жинхэнэ албан хаагчийг өөрсдийн үзэмжээр сонгон оролцуулахыг намынхаа ажилтнуудад даалгасан байна. Энэ нь маргааш нь буюу 14- ний өдөр болох дахин санал хураалтад нөлөөлөх гэсэн оролдлого гэж үзэхээр байна.

Баримт-2. УИХ-ын гишүүн Л.Эрдэнэчимэг хороодын бүх хэсгийн ахлагчдыг өнөөдөр, маргааш гэсэн хоёр өдөрт хуваан Төрийн ордонд дуудан зоог барьж, Есөн хөлт цагаан туганд мөргүүлэх зар тараагаад байна. Энэ үеэрээ хороодын ахлагч нарын нийгмийн асуудлыг сонсох, цалинг нь нэмэх санал авах, нийгмийн даатгалд хамруулах гэсэн гурван асуудлаар ярилцана гэсэн зар түгээгээд байна.

Баримт-3. Өнөөдөр 10,00 цагаас Нийслэлийн захирагч бөгөөд Улаанбаатар хотын Засаг дарга Э.Бат- Үүл Сонгинохайрхан дүүргийн 7,8,9,10,28 дугаар хорооны иргэдийг Нийслэлийн иргэний танхимд дуудан уулзаж ухуулга хийх зар тараасан. Уг уулзалтаа “Хотын дахин төлөвлөлт” гэсэн гоё нэрээр халхавчлаад байна. Сонгуулиас хойш сураггуй байсан дарга нар гэнэт Сонгинохайрхан дүүрэгт хандсан үйл ажиллагааг бөөнөөр нь дахин санал хураалт явах өдрийн өмнө хийж байгааг зохион байгуулалттай иргэдийн саналд хүчтэй нөлөөлөх гэсэн оролдлого гэж үзэж байна.

Баримт-4. Ардчилсан нам дахин санал хураалтад оролцогч байж 26 дугаар тойргийн нутаг дэвсгэрт Ардчилсан намын 23 жилийн ой гэсэн зурагт самбар байрлуулсан.

Баримт-5. Сонгинохайрхан дүүргийн хороодын өрхийн эмнэлгүүдээр УИХ-ын гишүүн Л.Эрдэнчимэгийн хувийн компани болох “Монос”-ын витаминжуулалтын аян нэрийн дор Л.Эрхэмбаярын сурталчилгааг байнга хийж байгаа.

Баримт-6. Хороодын өрхийн эмнэлгүүд үнэгүй үзлэг хийх нэрийн дор бүх айлуудаар орж, эмч ажилтнууд нь шууд Л.Эрхэмбаярыг сонгоорой хэмээн сурталчилгаа хийж байгаа.

Баримт-7. Сонгинохайрхан дүүргийн 21 дүгээр хорооны нутаг дэвсгэрт морины уралдаан зохион байгуулсан. Энэ үеэр мөн л Л.Эрхэмбаярын сурталчилгааг хийсэн.

Баримт-8. РМ101,7-гоор өчигдөр буюу 10-ны өдрийн оройн 18,30 цагийн орчим улаан цайм сурталчилгааны нэвтруүлэг явууллаа. Эл нэвтрүүлгээрээ манай нэр дэвшигчийн нэр төрд халдан “Монголчууд бөхөд саналаа өгөхгүй” гэх мэтээр ярьж суртал ухуулга хийлээ.

Баримт-9. Сонгинохайрхан дүүргийн 1, 2 дугаар хороодын өрхөөр гуравдугаар сард Ардчилсан намын өмнөх сонгуулийн сурталчилгаанд явж байсан эмэгтэй ороод гарахдаа нарийн судалгаа авч, эргэж холбогдохоо хэлжээ. Гэтэл өнөөх эмэгтэй энэ сарын 9- ний өдөр судалгаа авсан айлуудтайгаа холбогдон 25 кг-ын гурил, хоёр кг цагаан будаа, 00-ын цаас, талх, угаалгын зэргийг торонд хийн 87-50 УНН улсын дугаартай ногоон өнгийн “Старекс”, 88-29 УБН улсын дугаартай ногоон өнгийн “Хьюндай” маркын машинуудаар тараалаа.

Баримт-10. Сонгинохайрхан дүүргийн газрын албаны нэр бүхий ажилтан сонгуулийн сурталчилгаа хийсэн, нэн ядуу иргэдэд үзүүлэх халамжийн үйлчилгээний төрөл болох үнэгүй хүнсний талоныг Ардчилсан намын төлөө санал өгүүлэхээр иргэдэд өгсөн.

Баримт-11. ”ЭЙЧ ЖИ ЭС ЭМ” компанийн “Хашчулуун” нэртэй сувилалд өдөрт л 30 хүнийг үнэгүй эмчилж, үйлчилж байгаа. Энэ ажиллагааг дүүргийн Халамжийн газраас зохион байгуулж, Л.Эрхэмбаяр эмчлүүлж байгаа мэтээр ухуулга хийж байна.

Баримт-12. Энэ сарын 6-ны өдрийн 16 цагийн орчим 14, 15 дугаар хорооны нутаг дэвсгэрт Л Эрхэмбаярыг дэмжээрэй хэмээн ухуулга хийж явсан Ардчилсан намын гишүүн Цэдэн-Ишид сануулга өгсөн иргэн Р.Отгобаярын толгой уруу цохиж танхайрчээ. Мөн тус дүүргийн бүх хороодод Ардчилсан намын шат шатны дарга нар хавтгай архидалт зохион байгуулж байгааг иргэд мэдээлсээр байна.

Баримт-13. Дүүргийн Боловсролын хэлтсийн дарга Одонтунгалагтуул сургуулийн захирал, цэцэрлэгийн эрхлэгч нартай хамт багш, ажилчдад Л.Эрхэмбаярыг дэмжин санал өгүүлэх тухай үүрэг өгсөн. Энэ үүргийг үл биелүүлбэл ямар нэгэн байдлаар хариуцлага тооцохоор дарамталжээ.