“Гэгээн муза ” наадмын дуулиан шуугиан намжаагүй байна. Наадмын дараа эзнээ олсон, олоогүй, хийдүүлсэн гэх шагналын тухай олон шүүмж хөвөрдөг ч шилдэг сайн жүжигчнээ нэр дэвшүүлэлгүй орхичихдог сул тал бас байдаг бололтой. Жүжигчин, найруулагч Б.Навчаа “Гэгээн муза” наадмын драмын жүжгийн төрөлд нэр дэвшсэн “Хоёр ертөнцийн буудал” жүжигт бусдын төлөө гэсэн цагаан цайлган сэтгэлтэй үйлчлэгч эмэгтэйн дүрийг бүтээсэн. Гэхдээ яагаад ч юм уг наадамд нэр дэвшээгүй. Гэтэл манайхны олж хараагүй “эрдэнэ”-ийг олон улсын шүүгчид олоод харчихаж. “Хоёр ертөнцийн буудал” жүжгийг үзэж суухдаа үйлчлэгчийн дүрд тоглосон жүжигчин Б.Навчааг хараад “Энэ эмэгтэй яагаад нэр дэвшсэнгүй вэ? Энэ хүн туслах дүрийн шагналыг шууд авахаар байсан байна” хэмээн наадмын зохион байгуулагчдын амыг асууж, хэлэх үггүй болгосон гэдэг. Тэр ч бүү хэл “Гэгээн муза” наадмын дараа “Рамада” зочид буудалд болсон хүлээн авалтын үеэр нэгэн алдартай олон улсын шүүгч жүжигчин Б.Навчааг бусад жүжигчдийн өмнө сайшаан магтаж, гарын бэлэг дурсгасан бөгөөд хамтран ажиллах санал хүртэл тавьжээ. Төдий л олон хүнд мэдэгдэлгүй өнгөрсөн энэ явдлаас бид өөрсдөө чадвартай, авьяастай нэгнээ олж харж, үнэлж чадахгүй байна уу даа гэсэн бодол эрхгүй төрнө.

Б.Навчаа сайн жүжигчин, бас сайн найруулагч. “Хэцүү анги” олон ангит телевизийн цувралаараа үзэгчдийг байлдан дагуулж, бусад уран бүтээлчдийг ч мөн Солонгосын савангийн дууриас залхсан үзэгчдээ монгол сериалаар сэргээхэд уриалан дуудсан. “Рашаантын 18” уран сайхны кино нь чамгүй ашиг олж, басхүү магтаал, урмын үгийг ч харамгүй сонссон. Хэзээ мөдгүй дэлгэцэнд гарах гэж байгаа гэр бүлийн хүчирхийллийн эсрэг сэдэвтэй “Ларьдма” кино нь ч мөн чадварлаг уран бүтээлчдийг нэгтгэсэн, ихээхэн хөрөнгө мөнгө хаясан, тэсрэлт хийх бүтээл болох төлөвтэй байгаа. Ийнхүү кино урлагт инээдмийн, сэтгэлийн драм, сериал гээд бүхий л төрөл жанраар кино хийчихсэн түүнд одоо түүхэн кино бүтээл л үлдэв бололтой. Гэхдээ түүхэн кино хийхээр зориглосон уран бүтээлчид эхнээсээ түүхээ сайтар судлаагүйгээс ихээхэн шүүмжлэлд өртөөд байгаа. Харин найруулагч Б.Навчаа чадах болов уу?…

 Эх сурвалж:Shuurhai.mn