Нийслэлийн ИТХ-аас гаргасан “Улаанбаатар хотын нутаг дэвсгэрт гадна зар сурталчилгааны байгууламж байрлуулахад дагаж мөрдөх” журмын дагуу хотын гудамжинд байрлуулсан рекламны самбаруудыг буулгах ажиллагаа эхэлсэн. Гэвч нуухыг нь авах гээд нүдийг нь сохлохын үлгэр болж эхэллээ. Хамгийн энгийн жишээ гэхэд л Баянзүрх дүүргийн нутаг дэвсгэрт байрлуулсан самбаруудыг буулгахдаа бие нь загатнасан үхэр хашаа шөргөөгөөд нураачихсан мэт болгож байна. Тэнд байрлуулсан самбар бол угтаа хэн нэгэн хүний, компанийн өмч байлтай. Гэтэл буулгалт, ачилтын компаниуд хүний өмчтэй зүй бусаар харьцаж, лантуугаар цохиж, жижиглэн эвдэж байгаа нь харамсалтай. Үүний дээр ачилтын компани нь самбарын өөрийн өртгөөс даруй 10 дахин илүү үнээр тээвэрлэж байгаа. Гэтэл зөөвөрлөж байгаа ачаатайгаа зүй бусаар харьцаж дахин ашиглагдахгүй болгож байгааг юу гэж ойлгох вэ.

Нөгөө талаар нийслэлийн ИТХ-аас тодорхой байршилд байгаа самбаруудыг буулгах шийдвэр гаргасан. Баянзүрх дүүргийн хувьд Арслантай гүүрнээс Зүүн дөрвөн зам хүртэлх самбаруудыг буулгах шийдвэр байгаа. Гэтэл Баянзүрх дүүргийн Засаг дарга Д.Пүрэвдаваа дур мэдэн шийдвэр гаргаж шинэчлэл нэрийн дор шийдвэрт багтаагүй газруудын самбарыг буулгаж байна. Үүний нэг илрэл бол Нарантуул худалдааны төвийн урд Нарны зам дагуух самбаруудыг буулгаж эхэллээ.
Баянзүрхийн Засаг дарга Д.Пүрэвдаваа та хэний эрх ашгийн төлөө ийм үйлдэл хийж байна вэ. Хэн нэгний эрх ашгийн төлөө ийм үйлдэл хийж байгаа бол ядаж хүний өмч хөрөнгөд хүүдэгнэхгүй байвал дээргүй юу.