Сэтгүүлзүйн ертөнцөд сурвалжлагч жаахан охин шуугиан тарин гарч ирсэнийг мартах учиргүй. Тэр бол Л.Мөнхбаясгалан. Түүний хувьд анх ажлын гараагаа “Сэрүүлэг” сониноос эхэлсэн гэж 99,9 хувь хэлж болно. Талийгаач Монголын эх орончдын жинхэнэ нүүр царай болсон О.Дашбалбар агсантай нэр холбож бишгүй л муулуулсан сэтгүүлч бүсгүй 20-иод жил сэтгүүлзүйд хүчин зүтгэж байж нэг сонин, нэг телевиз байгуулсан нь сэтгүүл зүйн 100 жилийн ойн өдөр буюу энэ сарын 6-ны өдөр хаагдсан билээ. Үүнтэй холбоотойгоор Twitter, Facebook хуудсаар янз бүрийн байрь суурийг хүмүүс илэрхийлж байсан. Гэвч “Шонхор суваг” кабелийн телевизийн ерөнхий захирал, нийтлэлч Л.Мөнхбаясгалан өөрийн зүгээс ямар нэгэн тайлбарыг хийгээгүй өдий хүрсэн билээ. Тэрээр өдрийн сонины дугаарт ярилцлага өгчээ. Үүндээ “Шонхор суваг”-ийг ямар шалтгааны улмаас хаасан талаараа ийнхүү ярьжээ. ““Шонхор суваг”-ийг би   бусдаас сайн телевиз байсан гэж үнэндээ хэлж чадахгүй ээ. Уг нь ирэх сарын 13-нд байгуулагдсаны нэг жилийн ойтойгоо золгох суваг байсан. Техник, тоног төхөөрөмжийн хувьд үнэхээр муу. Тэрийг би хүлээн зөвшөөрөх ёстой. Юм шударга байх хэрэгтэй. Эгэлгүй мундаг телевиз байгуулчихаад тэрийгээ хаалгачихаад байгаа юм шиг ярьж болохгүй. “Шонхор суваг”-ийн тоног төхөөрөмж тааруу учраас дүрс,  дууны цацалт маш муу байсан. Тэрийг би хүлээн зөвшөөрөх хэрэгтэй.  Өмнө нь энэ бүхнийгээ  засах сарын хугацааг Харилцаа холбооны зохицуулах хорооноос өгсөн юм.  Харамсалтай нь нэг сарын дотор яагаад ч засч чадаагүй. Ийм богинохон хугацаанд бид эфирийн салаалагчийн төхөөрөмжийг л сольж амжсан. Телевизийн дүрс, дууны цацалт хийгээд камеруудаа солиход наад зах нь 500 мянган ам доллар хэрэгтэй. Надад энэ мөнгө байхгүй. Олж чадаагүй. Чадахыг ч хүсээгүй.  Энэ нь манай сувгийн хаагдсан эхний үндэслэл. Хоёрдугаар үндэслэл нь их сонирхолтой.  Би Ерөнхий сайдын зөвлөх Кёкүшюзан Д.Батбаяраас энэ телевизийг асар өндөр үнээр худалдаж авсан. Маш муу техникийг надад арав дахин өндөр үнээр зарсан. Би техникийг нь шалгаагүй авчихсан нь одоо миний буруу болж хувирсан.  Тусгай зөвшөөрлийг анх авахдаа Харилцаа холбооны зохицуулах хороотой гэрээ байгуулдаг юм  байна л даа. Тэр гэрээнд манайх ингэж сайн ажиллана, ийм ийм тоног төхөөрөмж манайд байгаа гээд түүнийгээ  хэмжилт хийлгэдэг юм байна. Гэтэл тэр бүгд нь хуурамч, худлаа  байсан. Ингэж би хуурамч, маш муу техникийг   асар өндөр үнээр авчихсан байна. Би тэр мөнгийг хүнээс зээлсэн.  Одоо би асар их зээлтэй үлдэж байна.  Гурав дахь үндэслэл нь тусгай зөвшөөрөлтэй компанийг зарж, үрж бусдад шилжүүлж болдоггүй байж. Би бас үүнийг тооцсонгүй. Надад хийе, бүтээе гэсэн уран бүтээлч сэтгэлгээ л байсан.  Түүнээс ийм нарийн  бизнес, хуулийн сэтгэлгээ яах аргагүй дутагджээ.  Би хувийн сонинтой болоод гурван жил болж байна. Гурав дахь жилийнхээ нүүрэн дээр л “Улс төрийн тойм” сонин өөрийн гэсэн байртай боллоо. Өнгөрсөн гурван жилийнхээ нэг жилд нь “Шонхор суваг”-ийг хөл дээр нь босгох гэж хичээлээ. Барсангүй. Гэхдээ энэ хооронд ямар ч байсан үйл ажиллагаагаа явуулаад, цалингаа, түрээсээ төлөөд  л байсан. “Улс төрийн тойм” сониноо дампууртал нь мөлжсөн. Гэвч үр дүн нь энэ.” гэжээ.
Дан ганц “Шонхор суваг”-аар Батбаяртан хулхидсан биш тухай зарим эх сурвалж хэлж байна. “Эх орон” хэмээх сайхан нэртэй телевиз байгуулж эхнэртээ бэлэглэж байсан ч эхнэр Баясгалан нь “Би мэргэжлийн хүн биш учраас телевизээ зарахаар шийдсэн”  хэмээгээд зарж л орхисон. Харин эхнэр нөхөр хоёрын зарсан хоёр телевизийн тоног төхөөрөмжийг яах аргагүй “Эх орон” телевиз Кёкүшү цамхагт нь үйл ажиллагаа явуулдаг учраас “Шонхор”-т зарсан төхөөрөмжөөсөө шинэчилсэн гэнэ. Анх тусгай зөвшөөрөл авахдаа тухайн хоёр телевизийн тоног төхөөрөмжийг нэг нэгнээр нь сэлбэж байж /нэг ёсондоо нүглийн нүдийг  гурилаар хууран/ авсан зөвшөөрлөө өндөр үнээр худалдаж орхижээ. Ингээд л “Шонхор”-ын уналтын үе сэтгүүлзүйн 100 жилийн ойн өдөр тохиочихож. Бүү гутар “Шонхор”-ынхоон. Далавчаа эрх мэдэлтэн, хөрөнгө мөнгөтөнүүдэд түр хугалуулавч эргээд нисэх цаг ирнэ.