Өчигдөр Нийслэлийн прокурорын газраас “Алтжин”-гийн Г.Алтанг МИАТ-ийн хэрэгт ямар ч холбогдолгүй гэсэн тайлбарыг өгч байх юм. Харин сэтгүүлч миний бие Г.Алтанг эл хэрэгт хардах нэлээд хэдэн үндэслэл байна.

Дайны эрсдэлийн даатгал нэрийн дор иргэдийн зорчих тасалбарын үнэ дээр  таван ам.доллар нэмж хураан авч, орлогыг нь  Япон, Хонконг улс  дахь “Вест вэлф” хэмээх даатгалын компанийн данс руу шилжүүлж, мөнгө угаасан  гэх МИАТ-ийн удирдлагууд, түүний гэр бүлийнхэн төдийгүй “Монголиан Эйр­лайнес” ачаа тээврийн компанийн удирдлагуудын хэрэгт холбоотой хүний тоо нэмэгдсээр байна.

Нэр бүхий есөн хүн өдгөө Цагдан хорих 461 дүгээр ангид саатуултагдаж  заримыг нь гадуур шалгасаар байгаа. Бидэнд ирсэн хамгийн сүүлийн үеийн мэдээллээр “Алтжин”-гийн Г.Алтан хатагтай  уг хэрэгт нэлээн гүн холбогдож эхэлсэн аж.  МАН-ыг ид мандаж явах үед Г.Алтан хатагтай “Ах” намынхаас хотын төвийн “А” зэрэглэлийн газарт  газар худалдан авч, “Бөмбөгөр” худалдааны төв байгуулсан.

Гэтэл тун удалгүй  эл худалдааны төв галд автаж олон хүний амьдралаар тог­лосон. Дээрх үйл явдал болж эхэлснээс хойш Г.Алтан нэлээд их хэмжээний  өрөнд орж хуучны бизнесийн хамтрагч нараасаа тусламж хүсч эхэлсэн аж. Тухайн үед түүний  бизнесийн үнэнч хамтрагч байсан  Б.Эрдэнэбилэгийг нутгийн ахаа­раа дамжуулан лобби­дуулж “МИАТ” компанийн захирлын суудалд суулгаж,  сүйхээтэй нэгэн гэдгээ харуулж амжсан. Энэ үеэс л улстөр, бизнесийн бүлэглэлийн хамтрагчид  “МИАТ”-ийн мөнгийг угааж эхэлсэн түүхтэй. Учир нь Б.Эрдэнэбилэг “МИАТ”-ийн захирлаар ажиллаж эхлхээс өмнө “Алтжин” компанид гүйцэтгэх захирлаар ажил­лаж байжээ.

Тухайлбал Г.Алтан  ху­дал­дааны төвөө шатсаны   дараа хохирогчдоос зугтаж,  Сингапур улсад  хэсэг хугацааны турш амьдарсан. Тэр үед нь  Б.Эрдэнэбилэг түүний данс руу удаа дараа их хэмжээний  мөнгө шилжүүлж  байсан тухай эх сурвалжууд  мэдээлж  байсан.  Гэтэл нэг хэсэг ажин түжин байсан  Г.Алтан  өнгөрсөн оны  аравдугаар сард  гэнэтхэн   “Бүтээн байгуулалтын банк байгуулах гэнэ» гэ­сэн мэдээлэл гарч, олныг шуу­гиулсан.

Тухайн үед банкны сал­барыхан энэ мэдээг сонсоод  Г.Алтанг  банк байгуулах  хэмжээний мөнгийг яаж олсон, мөн Монголбанкны өндөр шалгууртай босгыг хэрхэн давах гэж байгаа тухай сонирхож  байсан. Харин одоо учир мэдэх  зарим хүн  түүнийг “МИАТ-ийн мөнгөөр “Бүтээн байгуулалтын банк”  байгуулах гэж байсан  хэмээн хардах болжээ.

Ер нь л баячуудын хүрээнд нүнжигтэй, эртний эд эдлэлээрээ тэргүүнд бичигддэг Г.Алтан хатагтай өнгөрсөн жилийн Цагаан сараар алтан тоногтой, шүрэн товчтой, булган до­тортой дээлээр гангарч олны нүдийг хужирлаад авсан. Энэ бүхнийг  зөвхөн ард түмнээс луйвардаж авсан мөнгө байсан гэцгээх юм билээ.

Төрд нэг ч  удаа ажил хийж гавиагүй  Г.Алтан хатагтайн баяжсан түүхийг хэн хүнгүй л сонирхцгоодог. Одоогийн байдлаар 100  гаруй сая ам. доллар болчихоод байгаа уг хэрэгт өөрийгөө буруугуй гэж  хэвлэлд ярилцлага өгсөн Төрийн өмчийн хорооны дарга  асан Д.Сугарыг эл хэрэгт холбогдуулан хорих гэж байгаа тухай мэдээлэл ч  сонсогдох болов.

Ямартай ч “МИАТ” ХК-ийг тал талаас нь хэмлэж, дампууруулах үйл ажиллагаанд  оролцсон нөх­дийн араас  Г.Алтан хатагтайн нэр цохож явааг Б.Эрдэнэбилэгтэй холбон тайлбарлах олон хүн  бий  Ний­гэмд нэлээд дуулиан тарьж буй эл хэрэгт Г.Алтан ямар нэгэн хариу тайлбар хийгээгүй л  байна. Учрыг гадарлах  зарим хүн түүнийг  “МИАТ”-ийн хэрэгт хол­боотой гэдгээ баталж байна гэж ярих нь ч бий.

Ямартай ч Г.Алтан ха­тагтайн  “Бөмбөгөр” ху­далдааны төв нь шатсанаас хойш “Алтжин” ШТС-аа зараад сураг алдарсан. Гэхдээ түүнийг энд, тэнд бизнесийн санаа хайж, шинэ бизнес эхлүүлсээр яваа гэцгээдэг байсан.

Тэрбээр шатсан “Бөм­бөгөр”-ийн оронд шинийг барьж  метр квадратыг  нь Монголд байхгүй өндөр үнээр үнэлж байсан удаатай. Г.Алтан хатагтай нийт 70 сая ам.долларын хөрөнгөтэй  гэх бөгөөд үүнээс өөр олон саяар тоологдох ил, далд бизнес, хөрөнгө түүнд байдаг гэлцдэг юм. Тиймээс түүний  “МИАТ”-ийн хэрэгт  холбогдсон нь оргүй биш ортой бололтой. Түүний бидэнд барьсан сүүлийн бэлэг нь “МИАТ”-ийн хэрэг болж таарах нь. Цаг хугацаа харуулна гэдэг шиг МИАТ-ийн хэрэг хэрхэхийг харах л үлдэх шив дээ.

Мөнгө угаасан хэрэгт холбоотой учир битүүлэг эрхмүүдийг “МИАТ”-ээр дамжуулж ихээхэн хэм­жээний мөнгө угаасан гэж Эрүүгийн хуулийн 150.3 буюу эрх мэдлээ урвуулан ашигласан, мөн 166 буюу  мөнгө угаах гэмт хэргийг бүлэглэн үйлдсэн гэх заалтаар эрүүгийн хэрэг  үүсгээд байгаа. Олны анхаарлыг татсан эл  хэрэг он удаан жил үргэлжилж замхарах  вий дээ.

Өглөөний сонин