Шадар сайд Д.Тэрбишдагва нэгэнтээ “Нас чацуу Н.Энхбаяр, Ө.Энхтүвшин хоёр зэрэгцээд сууж байхыг харахад олон насны зөрүүтэй хүмүүс шиг харагдаж, өөрийн эрхгүй  хоолой зангирсан”  хэмээж билээ.
II эмнэлэгт эмчлүүлж байсан МАХН-ын дарга Н.Энхбаярыг МАН-ын дарга Ө.Энхтүвшин эргэж очсоныг  харж зогссон Шадар сайдын энэ үг өнгөрсөн оны онцлох ишлэлээр тодорч, хүмүүсийн самсааг шархируулж байв.
Монголын улстөрд 20 шахам жил салалгүй хамт явж, МАХН-ыг удирдалцаж явсан хоёр “Э”-гийн хувьд ёстой л “Салъя гэж салаагүй, салаа замын эрхээр салсан” гашуун эмзэглэл  одоо ч тэдний сэтгэлийг  сэмхэн нэгтгэж байдаг нь нууц биш. Хоёулаа  л бичиг номын мөр хөөж яваад МАХН-ыг хүндхэн цагт нь бараадсан.

Харин улстөрд хүрэх өнөөдрийн өндөрлөгөө  хамтдаа явж бүтээсэн хоёрт бусдын мэдэхгүй “хүн чанар”-ын нөхөрлөл өнөөдрийг хүртэл амь бөхтэй оршсоор байгааг МАН-ын дарга Ө.Энхтүвшингийн хагас сайн өдрийн гэнэтийн айлчлал нотлон харууллаа.
2012 оны зургаадугаар сард “Н.Энхбаяр даргын эрүүл мэндэд Монголын төр, засаг анхаарлаа хандуулах ёстой” хэмээн мэдэгдэж байсан МАН-ын дарга Ө.Энхтүвшин хагас сайн өдөр МАХН-ын байранд хүрэлцэн очиж даргыгаа суллуулахаар өлсгөлөн зарласан зургаан эмэгтэйтэй уулзсан нь олон асуулт араасаа дагуулж байна.
“Энэ хүний эрүүл мэн­дийн талаар Монгол Улсын Ерөнхийлөгч, УИХ, Засгийн газарт асуудал тавина” гэсэн. Түүний энэ үгийн цаана ирэх зургаан сард болох Ерөнхийлөгчийн сонгуульд  Ө.Энхтүвшин дарга нэр дэвшиж, түүнийг  МАХН дэмжиж ажиллах нь гэсэн хардлага явж байгаа юм.

Хэдийгээр  ороо бус­гаа цагийн эрхээр нэг уг­шил­тай ч хоёр өөр намыг тол­гойлж яваа Н.Энх­баяр, Ө.Энх­түвшин нарын дунд ямар яриа хэлцэл яваг­даж, хэн нь хэндээ өртэй хоцорс­ныг мэ­дэх аргагүй ч хагас сайн өдрийн гэнэтийн айлчлал тэдний дунд далдхан нэгэн сэжим оршсоор байгааг но­тол­лоо.

Харин тэр нь “Зовох цагт нөрийн чанар ха­руул­сан айлч­лал байсан уу, зо­рил­го дагуул­сан албан то­ми­лолт бай­сан уу” гэдгийг цаг хугацаа л харуулах биз ээ.

Эх сурвалж: “Өглөөний сонин”