Өнгөрсөн жилийн сүүлчээр өнөөх гайхал Шинэ жилийг угтсан шоу арга хэмжээнүүд ар араасаа цуварч, тасралтгүй урилга, заллагад дарагдсандаа ядарсан поп хатагтай Сараа алжаалаа тайлахаар гурван хүүхэд, төрсөн дүүгээ дагуулан явж Солонгос улсад Шинэ оноо угтжээ.

Жил жилийн Шинэ жилийн баярууд дөхмөгц хамтлаг, дуучдын нүд нь сэргэж, энд тэнд очиж халтуур хийн хөөрхөн хэдэн цаас халаасалдаг боловч сүүлийн үед монгол түмний зүрх сэтгэлийг байлдан дагуулсан сайхан дуунууд тэр болгон төрөхгүй байгаа нь нууц биш.

Аугаа С.Гончигсумлаа, Ж.Бадраа нарын зохиосон “Цалин мөнгөн тэнгэртээ цасан угалз наадуулсан…” хэмээх үгтэй дуу өдгөө 52 дахь жилдээ эгшиглэж байгаа бол хөгжмийн зохиолч Г.Энхбаяр, яруу найрагч Л.Мягмарсүрэн нарын бүтээсэн “Шинэ жилийн шөнө сайхан аа” дуу мөн 28 дахь жилдээ олны хүртээл болжээ.

Эдгээр дуунуудыг гүйцэж гарах дуу одоохондоо мэндлээгүй байгаа бөгөөд дээрх хоёр дууг анх дуулсан дуучдаас нь илүү хүмүүсийн зүрх сэтгэлд хоногшуулан хүргэсэн хүмүүс ч хараахан алга. “Шинэ жилийн шөнө сайхан аа” дууг анх МУГЖ Э.Бүрнээбаяр дуулсан бол хожим нь поп хатагтай Б.Сарантуяа хөгжмийн зохиолчийн хүсэлтээр орчин үеийн хэмнэлд оруулсан хувилбарыг нь Монголын үндэсний телевизийн студид бичүүлж дуулан тухайн үедээ энд тэнд халтууранд явж 500 төгрөгөөр дуулж өгч байсан гэдэг.

Энэ дууны аранжировкийг поп хатагтай шинэчлэн, хүү Эрхэмбилэгийнхээ аав Л.Болдхуягтай Германд хамт амьдарч байхдаа Европын нэгэн мэргэжлийн студид дахин бичүүлж дуулснаас хойш 10 гаруй жилийн нүүрийг үзжээ. Энэ сайхан дууг оны өмнөхөн “Мотив” хамтлагийн залуус өөрсдийн найруулгаар шинэчлэн дуулахаар хөгжмийн зохиолч, УГЗ Г.Энхбаярт хандан гуйсанд тэрбээр зөвшөөрсөн ч поп хатагтай Сараа дургүйцэн “Мотив”-ынханд “Та нар намайг байхгүй болсны дараа энэ дууг дуулаарай” хэмээн зад томорчээ. Эх сурвалж www.wikimon.mn