УИХ-ын гишүүн З.Алтай, Ш.Сайхансамбуу, З.Энхболд, Н.Батбаяр, Батж.Батбаяр нарын тогтмол оролцдог 25 дугаар суваг телевизийн “Дуусдаггүй яриа” нэвтрүүлэгт өчигдөр хоёр эрхэм зочлов. Нэг нь Монгол Улсын Ерөнхийлөгч асан Н.Энхбаяр, нөгөө нь БНН-ын дарга “Буян”-гийн Б.Жаргалсайхан. Эрхмүүд Сонгуулийн хуулийн талаар ярилцаж, сонгуулийн тогтолцооны сайн, мууг хэлэлцэв. Б.Жаргалсайхан сонгуулийн санал тооллогыг машинаар явуулахыг эсэргүүцэж “Манайхан чадахгүй юм биш, монголчлоод энд тэнд нь эрэг боолтыг нь янзалчихна л даа” гэлээ. Бас болоогүй “Нэг хүн УИХ-д гурав сонгогдоод л боллоо. Гурав сонгогдсон хүн бол дахиж УИХ-д суух гээд хэрэггүй. Жишээ нь, Батж.Батбаяр гишүүн гурван удаа суучихсан. Би тэгэхэд ганц суусан. Одоо та биш би суумаар байна шүү дээ” хэмээв. Түүнийхээр УИХ-ын сонгуулийн тухай хуульд “УИХ-д нэг гишүүн гурваас дээшгүй удаа сонгогдоно” гэсэн заалт оруулж болох ажээ. Ерөнхийлөгчийн сонгуульд гурав дахь удаагаа улиран сонгогдож болохгүй гэдэг шиг хязгаарыг УИХ-ын эрхэм гишүүдэд тавих ёстой гэж “Буян” Жаргалсайхан гишүүдэд “тулгав”.