Арванхоёрдугаар сарын 22-ны өдөр жамаараа болж, нар манддагаараа мандлаа. Энэ өдрийг үзэж чадахгүй байх вий гэсэн битүүхэн айдас олон хүний сэтгэлд хургасан байсан. Арванхоёрдугаар сарын 20-ны өдөр буюу сүйрлийн өмнөх өдөр маш олон хүн хотоос гадагш гарч байлаа. Мөн нийтийн орон сууцанд амьдардаг иргэд гэр хороолол бараадаж, хот тойрсон амралтын газрууд захиалгад харагдав. Цаашлаад хүнсний дэлгүүрүүдийн лангуун дээрх нарийн боов, талх, гурил,будаа гэх мэт өргөн хэрэглээний хүнсний барааг хүмүүс хамж зарим нэг дэлгүүрийн хүнсний лангуу бараг л хоосорчихсон байсан. Энэ бол дэлхийн сүйрлийн тухай зөгнөгчдийн хөдөлмөрийн үр дүн. Тэд бүтэн жилийн турш дэлхийн сүйрлийн тухай ярьж, бичиж зарим нэг нь бүр энэ сүйрлийг зөгнөн харсан хэмээн анхааруулсны үр дүнд хүмүүс ийнхүү түгшүүрт автсан юм.

Энэ зөнчдийн эхэнд Орифлеймийн Г.Оюунгэрэл байсан. Тэрбээр “Би олон жил судалгаа хийсэн хүн. Энэ судалгаанаас үзэхэд арванхоёрдугаар сарын 21-ний өдөр дэлхий сүйрэх нь гарцаагүй” хэмээн хэвлэл мэдээллийн хэрэгслүүдээр мэдэгдсэн. Энэ сүйрлийн тухай яриа маяачуудтай холбоотой. Тийм ч учраас Г.Оюунгэрэлийг манайхан “Маяа Оюунгэрэл” хэмээн авгайлдаг болсон байв. Манай Маяа өнгөрсөн хугацаанд чамгүй олон дагалдагчтай болж, өөрийн судалгааны номоо ч цөөнгүй хувь борлуулсан гэсэн. Гэтэл 21-ний өдөр түүний зөгнөсөн шиг харанхуй болсонгүй, дэлхийн сүйрлийн тухай бол дурсах ч хэрэггүй. Жирийн л нэгэн өдөр болсон. Иймд дэлхийн сүйрлийг зөгнөж байсан зөнч Г.Оюунгэрэл маань юу хэлэх бол гэсэн хүлээлт олны дунд бий болсон байсан. Харин манай Маяа сураггүй болсон гэнэ. Хааччихсан юм бүү мэд. Зарим нэг нь Энэтхэгт байгаа л гэнэ. Магадгүй түүний хувьд дэлхий үнэхээр сүйрчихсэн ч байж мэдэх юм. Ямар ч байсан дэлхийн сүйрэлд итгэсэн итгэлтэйгээ хамт алга болчихлоо. Аль эсвэл гоо сайхан ертөнцийг аварна гэдэг шиг Г.Оюунгэрэл гуай өөрийн гоо сайхнаар энэ дэлхийг аварсан юм болов уу. Аягүй бол удахгүй гарч ирээд “Би өөрийн хүчээр дэлхийн сүйрлийг хойшлуулж чадлаа. 2013 онд дэлхий сүйрнэ. Тиймээс надад итгэ” гээд гараад ирж ч мэдэх л юм.