Улсын начин Б.Одхүү бөхийн ногоон дэвжээнээ гарч аздтай одтой барилдаан үзүүлэхээсээ илүүтэйгээр бааранд хүн зоддогоороо алдартай. Тэрээр ээлжит зодооноо хийж  Монгол Улсын хөдөлмөрийн баатар, олимпийн аварга Н.Түвшинбаярыг өнгөрсөн баасан гаригт зодсон хэрэг гарчээ. Уг хэргийн талаар Н.Түвшинбаярын ойрын эх сурвалжаас тодруулахад “Энэ сарын 14-нд буюу өнгөрсөн долоо хоногийн баасан гаригт хэсэг бөхчүүд Хан-Уул дүүргийн 17 дугаар хорооны нутаг Япон хороололд байрлах “Garden” ресторанд архи уусан. Тэгтэл Б.Одхүү начин олимпийн аварга Н.Түвшинбаярыг хэл амаар доромжилж эхэлсэн гэнэ.  Мэдээж олимпийн аварга хүний хувьд дуугүй суулгүй урдаас нь хэдэрлэсэн. Гэтэл Б.Одхүү начин Н.Түвшинбаяр аваргыг цохиж унагаагаад, бүр хутга шөвөгтөө тулгаж “ална, тална” гээд дайрсан. Энэ зодоонд Төв аймгийн Баян-Өнжүүл сумын харьяат ШШБЕГ-ын Сүлд спорт хорооны дарга Улсын заан Ц.Баярсайхан өртөж, мөн л улсын начин Б.Одхүүд зодуулсан. Одоогоор Н.Түвшинбаяр аварга толгой, хавиргандаа бага зэрэг гэмтэл авсан. Өөр мэдээлэл өгөх боломжгүй” гэж ээ.
Харин энэ хэргийн талаар Хан-Уул дүүргийн цагдаагийн хэлтэсийнхэн  “Хэргийг шалгаж байгаа.  Гэснээс өөр мэдээллийг одоогоор өгөөгүй байна.
Улсын начин Б.Одхүүгийн хувьд 2004 онд “Muse” бааранд, 2005 онд Баянгол дүүрэг дэх “Аяз” бааранд, дараа нь мөн Тэрэлж дэх “Гурван түрэг” амралтын газарт Английн иргэн Налон Корбитт болон Б нарыг зодсон хэрэгт шүүхээс хорих ял сонсч байсан юм байна.
Тэгвэл Багануурын хорихоос суллагдсаны дараа буюу хоёр жилийн өмнө “River sound” бааранд боксчин Э-г зодож танхайрч байсан талаар мэдээлэл цацагдаж байжээ.