МАХН-ын гишүүд намын дарга Н.Энхбаярыг нь цагаатгахгүй байгаа тул Засгийн газраас гарахаа мэдэгдэв. Энэ тухайгаа уржигдар орой хуралдан шийдвэрлэж, өчигдөр Ерөнхий сайдад бичгээр хүргүүлжээ. Гэхдээ Ерөнхий сайд өчигдөр өглөө эрт Киргизстаныг зорьсон тул тэдний илгээсэн бичгийг гар дээрээ аваагүй.

Ерөнхий сайдыг иртэл эл бичиг ширээн дээр нь хоёр хононо. Маргааш ирээд танилцах уг бичиг Ерөнхий сайдын хувьд 100 хоногийнх нь хамгийн том бэлэг болж таарлаа.
Ажлаа аваад 100 хонохдоо бараг л уулыг нурааж, усыг эргүүлчихсэн мэт сурталчилгаа хийн шоудаж байгаа түүний хувьд энэ бичиг хүндхэн цохилт боллоо. Үүнийг дагаад Засгийн газар задарвал хэнтэй нийлж, хэний аманд орчих вэ гэх зэргээр асуудал босно. Нам нь дотоод амбиц ихтэй, дээрээс нь найдваргүй эвсэлтэй ураг барилдсан гээд Киргизстанд яваа Ерөнхий сайдын толгойг өвтгөх асуудал ийнхүү хангалттай босч ирлээ.

Н.АЛТАНХУЯГ, Ц.ЭЛБЭГДОРЖ ХОЁРЫН РЕАКЦИАС АЙЛГАХ ТӨЛӨВЛӨГӨӨ ҮРГЭЛЖЛЭХ ЭСЭХ НЬ ТОДОРХОЙ БОЛНО
МАХН-ын удирдах байгууллагаас л Засгийн газраас татгалзах улс төрийн шийдвэр гаргасан болохоос сайд болоод байгаа Д.Тэрбишдагва, Н.Удвал, Ч.Улаан гурав гарах сонирхолгүй байгаа гэнэ. Иймээс ч эвслийг бүрдүүлсэн МҮАН-ыхныгаа тандан тэр талаа түшихээр шийдээд байгаа тухай яриа Төрийн ордноор хөвөрч байна. Үнэндээ Д.Тэрбишдагва намын дарга Н.Энхбаярынхаа асуудлаар Ерөнхийлөгчтэй зөвшилцөхөөр санаархсанаас болоод Н.Алтанхуягтай муудалцсан ч гэсэн Засгийн газраас гарах дээрээ тултал асуудлыг дэвэргэх бодолгүй байсных гэнэ. Түүгээр ч барахгүй намынхаа төв аппаратаас гаргасан эл шийдвэрийг хэрхэн зөв тийш нь залахаа мэдэхгүй байдалд ороод байгаа юм байх. Энэ хооронд МАХН-ыг тойроод үйл явдлууд өрнөж гурван сайдынхаа хяналтаас гараад байгаа ажээ. Намын дарга Н.Энхбаяр давж заалдах шатны шүүх хурлыг хойшлуулсан эл хугацаандаа өлсгөлөн зарлахаар биеэ бэлтгээд эхэлсэн гэнэ. Түүнийг дэмжиж З.Баянсэлэнгэ ч өлсгөлөн зарлана гэчихсэн гүйж яваа сурагтай. Энэ хоёр мэдээж хэрэг Н Алтанхуягийг ирсний дараа АН-ынхнаас гаргах реакцийг харж байгаад өлсөх эсэхээ шийдэх байх.

Мөн дайны хажуугаар дажин гэгчээр О.Баасанхүү, Э.Батшугар хоёр нийлчихсэн өчигдөржин Төрийн ордноор гүйлдэв. Тэр хоёр МҮАН-ын гишүүдийн үүдийг онголзуулан Засгийн газраас гарах тухай ухуулга хийцгээсэн ажээ. Мөн О.Баасанхүү “МАН-тай нийлээд бүдүүн бүлэг” байгуулсан ч яахав гэх үгийг унагаж явсан байна. Ийнхүү МАХН-ынхан Н.Энхбаяр даргаа суллахаар дээр дооргүй бужигнаж, түүнийх нь нөлөөгөөр Н.Алтанхуягийн Засгийн газар 100 хоноод л доргив. Гэхдээ мэдээж хэрэг “Засгийн газраас гарна” гэдэг мэдэгдэл нь Ардчилсан намын удирдлагуудыг, Ерөнхийлөгчтэй хамт айлгах төлөвлөгөө. Тэгэхээр Ардчилсан нам удтал хүлээн байж босгосон засгаа унагахгүй гэж үзээд Н.Энхбаярыг суллавал бүх зүйл хэвэндээ орно. Харин үүний цаана хууль гууль болох уу, улс оронд шударга ёс тогтох уу, үгүй юу гэх асуулт хариу нэхсээр үлдэх болно.

МҮАН ЗАСГААС ГАРАХГҮЙ
Засгийн газраас МАХН гарна гэснээс болоод эвсэл задрах эсэх тухай асуудал хөндөгдөх дээрээ тулаад байгаа. Угаасаа ч бялуу хуваалтын эхлэлээс Н.Энхбаяр, М.Энхсайхан хоёр муудалцаж, түүнийгээ ил тод зарлаад байгаагаас болоод “Шударга ёс” эвсэл задарна гэх яриа гурван cap орчим үргэлжилж байгаа. Гэхдээ хоёр том дарга нь муудалцсан ч эвслээ өнөөдрийг хүртэл хадгалсаар байгаа. МАХН засгаас гарахаа мэдэгдсэн энэ үед ч МҮАН хийхээр төлөвлөөд эхлүүлсэн ажлаа дуусгах нь зүйтэй гэсэн байр суурьтай байгаа. М.Энхсайхан л гэхэд “Нэг хүний асуудлыг үндэсний эрх ашигтай эн зэрэгцүүлж шийдвэр гаргах хүртлээ төөрөлдөж болохгүй шүү дээ. МҮАН-ын хувьд үндэсний эрх ашгийг тэргүүн зэрэгт тавина гэдэгт хатуу зогсоно гэж мэдэгдэв. УИХ-ын гишүүд нь ч яг л ийм байр суурийг илэрхийлж байсан.

М.Энхсайханы тухайд яг ийм тохиолдолд Засгийн газарт орохоор төрүүлж өсгөсөн намаа орхиж байсан жишээ бий. Тухайн үед ч М.Энхсайхан ба түүний нөхөд Засгийн газарт орохдоо “улс эх орныхоо сайн сайхны төлөө зүтгэх учиртай” гэсэн тайлбарыг л хэлсэн. Тэр чигээрээ ч зүтгэсэн. Энэ тохиолдолд ч түүх давтагдах нь гарцаагүй болоод байна. Тэгээд ч МАХН засагт эвсэл болж Хөтлөлцөж орсон МҮАН-даа гарах тухайгаа дуулгаагүй ажээ. Иймээс бүх зүйл өрнөөд эхэлчихсэн хойно одоо МАХН-тай нийлэн эл асуудлаар зөвлөлдөөд суухгүй гэсэн байр суурьтай байгаа юм билээ. Иймээс МҮАН үйл явдал цааш хэрхэн өрнөхийг зүгээр л хөндлөнгөөс харахаар шийдсэн байна.

АН ДОРДОХЫН ДОЛООГОО ХЭРХЭН БҮРДҮҮЛЭХ ВЭ
Ардчилсан нам эл тохиолдолд хайнааг хагална. Ерөнхийлөгч гүрийдгээрээ гүрийж авлигын загалмайлсан эцгийг яллана гэсэн сонгуулийн амлалтаа нэхэн сануулаад байвал МАХН-ынхныг тавьж явуулахаас өөр гарц үлдэхгүй. МАХН-ынхныг тавьж явууллаа гэхэд Засгийн газраа хэрхэн элэг бүтэн болгох тухай бөөн бодлого бодоцгоох нь тодорхой. Мөн тохироо, наймаа хийгдэнэ. Ардчилсан нам одоо парламентад 32 суудалтай. Засгаа дангаараа бүрдүүлэх гэхээр дордохын долоон суудал дутаад байгаа юм. Иймээс МҮАН-ын Д.Батцогт, Г.Уянга, Н.Батцэрэг, М.Сономпил, ИЗНН-ын С.Оюун, С.Дэмбэрэл нарыг нэмээд ч нэг суудал сох дутна. Энэ тохиолдолд Өвөрхангайн хоёрыг хурдхан тангараг өргүүлж тоогоо нэмэх, эсвэл бие даагчдад хандран талдаа татах гэсэн хоёрхон гарц байна.

Эсвэл сураагүй биш гээд МАН-тайгаа эвсэх. Гэхдээ энэ хувилбар яг энэ үед биеллээ олно гэдэг бараг л лөөлөө биз дээ. Энэ хоёр нам эвслээ гэхэд хоёулангийнх нь нэр хүндэд сөргөөр нөлөөлнө. Үүнийгээ ч өөрсдөө мэдэж байгаа. Харин Н.Алтанхуяг Киргизээс ирээд шууд Ерөнхийлөгчийн өрөө рүү зүглэж өөрөөрөө овоглосон Засгийн газрынхаа хувь заяаг хэрхэн хэлэлцэх нь тодорхой. Үүнээс нь ч хамаарч улстөрчдийн амралтын өдрүүдийн булангийн уулзалтууд, отон тоглолтууд ямар тактикт шилжих нь тодорхой болно.

М.МӨНХЧИМЭГ

Эх сурвалж: Өдрийн шуудан