Мартагдах шахсан аялгуу гэж бий. Тэгвэл мартагдах шахсан “хэргүүд” гэж бас  байнаа. Овоо босгоогүй бол шаазгай хаана суух билээ.

Олны өмнө тэрсэлдэн хэрэлдэж “Чи, би, чоно, нохой” дээрээ тултал хэрэлдсэн хүчит бөхчүүдийн маргаан сонгуулийн дүйвээнээр  нам дарагдав. Үндэсний бөхөд бугшсан даваа наймаалцах хэргийг  даруй илчлэх нь гэсэн иргэдийн мөрөөдөл замхрав бололтой.

Сэргээш хэрэг­лэсэн бөхөөр цоллуулсан улсын арслан Х.Мөнхбаатар, Үндэсний бөхийн холбооны тэргүүн Р.Нямдорж нарын маргаан нам дарагдсныг бөх сонирхогчид өөр өөрсдийн байр сууринаас тайлбарлаж байна.

Нэг хэсэг нь “Эд нар илчилж чадахгүй. Тэртээ тэргүй найраа хийдэггүй  бөх гэж байхгүй.  Хэн нь хэнийгээ илчлэх юм” гэнэ.  Харин нөгөө хэсэг нь “Ингэж байж л үндэсний бөх цэвэршинэ” хэмээн ам уралдуулна. “Найраа” хэмээх үг наадамд зодоглож эхэлснээс хойш  үндэсний бөхийн нэр хүнд шалдаа бууж, үнэ цэнэгүй болсон.

Үүнээс болж зарим нэг нь зодог тайлж зоргоороо амьдрах болов. Үндэсний бөхийн холбооны тэргүүн Р.Нямдорж  улсын арслан Х.Мөнхбаатарыг шүүхэд өгөхөө мэдэгдсэн. Үүний хариуд  Х.Мөнхбаатар мөчөөгөө өгөлгүй мөн л шүүх дээр уулзах тов илгээсэн. Тэдний хэлсэн үгнээ иш татвал, Х.Мөнхбаатар “Намайг дарамталж нүд үзүүрлэж байна.

2007 оны улсын наадмаар Н.Ганбаатар аймгийн арслан цолтой байсан. Харин би улсын заан цолтойгоор долоогийн даваанд барилдсан. Тэр үед Р.Нямдорж гуай над дээр ирж “За чи Ганбаатарыгаа дэмжээд заан болгочих. Би чамд 70 сая төгрөг өгье” гэсэн. Би тэр үед татгалзсан. Ард түмнээ хуурахыг хүсээгүй, шударга барилдахыг хүссэн болохоор татгалзаж Ганбаатарыг өвдөг шороодуулсан. Гэтэл “Чи яасан овоо хүүхэд вэ. Чамайг харна аа” хэмээн ярьсан юм.

Харин үүний хариуд  Р.Нямдорж “ Би Х.Мөнхбаатарыг мэднэ. Энэ бол Б.Бат-Эрдэнийн шавь . Хэд хоногийн өмнө надтай уулзсан. Тэр үед ийм байгаагүй. Гэтэл одоо гайхамшигтай зүйл яриад зогсч байна. Би чамд 70 сая төгрөг өгье гэсэн үү. Ийм юм яривал би чамайг шүүхэд өгнө. Монголын ард түмэн намайг мэднэ, Мөнхбаатар аа. Би чамаас юу гэж заан цол гуйх юм бэ.

Чамайг дэмждэг байсан. Харин одоо үзэн ядаж байна” хэмээн тунирхсан. Гэтэл өнөөдрийг болтол тэдний маргаан тэмдэглэлийн дэвтэрт бичигдснээс цаашгүй шоу байв уу гэх эргэлзээг төрүүлэв. Эл хэрүүлийн мөрөөр Авлигатай тэмцэх газрынхан  “амь” орж шалгалт хийх сураг чих дэлссэн юм. Харамсалтай нь хавтаст хэрэг ч нээж чадалгүй хаясан бололтой.

Б.Чанцал
Эх сурвалж: “Нийгмийн Толь”