Орчин үед бүхий л зүйлс “ухаалаг” болж хүний хөдөлмөрийг хөнгөвчилж, цаг хугацаа хэмнэдэг болжээ. Харин техник технологи ухаажихын хэрээр хүмүүс минь ухаангүй тэнэг болоод байх шиг.

Саяхнаас манайд ухаалаг үнэмлэх гээчийг нэвтрүүлж, иргэдийн нэр ус, хаяг гээд бүхий л зүйлсийг түүнээс авч болдог боллоо гэцгээж байв. Мөн сонгуулийн саналыг автомат машинаар тоолж, бүх улс орон даяарх саналын мэдээг минутын дотор шилжүүлж болно гээд сурталчилаад байв даа.

Гэхдээ техник ухаажсан ч хүмүүс маань ухаангүй болсон бололтой. Ухаалаг үнэмлэх нь алдаа гаргаж, хаана ч амьдардаггүй, хаяггүй хүн Монгол улсад нэлээд олон болов. Сонгуулийн дүнг хүлээж ядсан иргэд минут тоолон зогсоод бүтэн цаг өнгөрөхөд нэг ч мэдээ ирсэнгүй.Угтаа бол интернэтээр мэдээллээ явуулж, бүх мэдээллийг хэдхэн минутад нэгтгээд гаргах чадалтай автомат машин байгаа хэдий ч ажиллуулж дөнгөх хүн харин Монгол улсад олдохгүй байгаа бололтой.

Бүтэн 24 цаг өнгөрсөн ч саналын тоог нэгтгэж гаргаж чадахгүй нь гээд СЕХ мэдэгдсэн. Хуучны сайхан цагт бол шөнөжингөө гараараа тоолоод өглөө нь хариу гардаг байлаа.