Аймаг, сум, дүүргийн Иргэдийн төлөөлөгчдийн хурлын сонгууль боллоо.

Орон нутгийн сонгуульд сонгогчид анх удаа иргэний цахим үнэмлэхээр саналаа өгч,  иргэдийн саналыг автомат машинаар тоолсон. СЕХ-ны дарга Ч.Содномцэрэн өчигдөр сонгуулийн саналын ирц, үйл ажиллагааны талаар мэдээлэл хийсэн юм.

Орон нутгийн сонгуульд сон­гогчдын нэрийн жагсаалтад 1.851.103 хүн бүртгүүлжээ. Сонгогчид долоон нам, хоёр эвсэл, бие дааж нэр дэвшсэн 19400 хүнээс сонголтоо хийсэн. Улсын хэмжээнд 24903 хүн зөөврийн хайрцгаар саналаа өгөх хүсэлт гаргаснаас 23399 нь саналаа өгсөн байна. Сонгуулийн дүнг аймаг, сум, дүүргийн сонгуулийн хороод нэгтгэж хэлэлцээд тав хоногийн дотор СЕХ-нд өргөн барих хуультай аж.

Сонгуулийн Ерөнхий хо­рооноос мэдээлснээр өчиг­дөр 12:00 цагийн байд­лаар орон нутагт сонгогчдын саналын ирцийн дундаж 18 хувьтай байсан бол нийслэлийн дүүргүүдэд 12 хувьтай байлаа. Энэ дүн нь 2008 оны орон нутгийн сонгуулийн 12:00 цагийн дундаж ирцтэй харь­цуулахад нийслэлийн дүүр­гүүдийн сонгогчдын санал гурван хувийн өсөлт­тэй гарчээ. Аймгуудын сонгуулийн ирцийг 12:00 цагийн байдлаар Сүхбаатар, Завхан аймаг тэргүүлж байсан бол Увс аймгийн хувьд ирц хамгийн багатай нь байв.

Харин 16:00 цагийн байдлаар 39.22 хувь болж өссөн байв. Нийслэлийн хэмжээнд Багахангай, Налайх, Багануур дүүргийн иргэд саналаа идэвхтэй өгсөн гэх дүнтэй байсан. Гэтэл хотын төвийн дүүргүүдийн иргэдийн саналын ирц харьцангуй бага байна гэсэн үзүүлэлттэй байлаа.

СЕХ-ны 20:00 цагийн мэдээллээр улсын хэмжээнд саналын ирцийн дундаж 52.9 хувьтай байв. Аймгуудын хувьд иргэдийн саналын ирц 60 гаруй хувьтай байлаа. Харин  дүүргүүдэд 45.6 хувьтай гэсэн урьдчилсан мэдээлэл өгсөн юм.

Сонгуулийн өглөө Ховд, Завхан, Говь-Алтай, Сэлэн­гэ, Баянхонгор, Өвөр­хан­гай аймгуудад 0-3 мм цас орсон байна. СЕХ-ноос  сонгуулийн өдөр орон нутагт цаг агаар ямар байх талаарх мэдээллийг сарын өмнө авч, цас ихтэй, зам, даваа хаагдаж болзошгүй аймгуудын сонгогчдод тээв­рийн хэрэгслээр үйлчлэхэд зориу­лан 180 сая төгрөг төсөв­лөсөн. Тухайлбал, цас ихтэй аймгуудад 10-16 сая төгрөг хуваарилсан юм. Үүний үр дүнд хөдөө орон нутагт саналын ирц хангалттай байсан гэдгийг СЕХ-ны дарга Ч.Содномцэрэн онцолж байв.

Сонгуулиар автомат машины ажиллагааны тухайд төдийлөн бэрхшээл гар­сангүй.  Учир нь, сон­гуулийн нэг хэсэгт 2-3 авто­мат машин ажилласан болохоор нэг нь эвдэрэхэд нөгөөд нь саналын хуудсыг уншуулах боломжтой байсан аж.

Харин цахилгаанаас болж нэг машин саатсан аж. Үүнийг орон нутагт ажиллаж буй даамлууд тэр даруйд нь зассан байна. Мөн сонгуулийн нэг хэсэгт сонгогч саналын хуудсаа уншуулахдаа бүрэн уншуулалгүй буцааж татсаны улмаас гацаасан тохиолдол гарчээ.  Санал тоолох дүн, тогтоол гарсны дараа аймаг, дүүргийн сонгуулийн хороод сугалаа сугалж, хоёр хэсгийн хороонд хяналтын тооллого хийх юм байна. Нэг ёсондоо автомат машинаар тоолсон саналын дүнг гараар тоолсон дүнтэй харьцуулж үзэх гэнэ. Хяналтын тооллогыг нийтдээ иргэдийн санал авах 60 байранд явуулахаар болжээ.

УИХ-ын сонгуулиар гадаадад сурч буй иргэд саналаа өгсөн бол орон нутгийн сонгуулийн хуулиар тэд санал өгөх боломжгүй байлаа. Мөн СЕХ-ны зүгээс хөдөө орон нутгийн харьяа­лалтай оюутнууд санал өгөх боломжгүй учир иргэдийн саналын ирцээс хойш татсан хэмээн мэдэгдлээ.

Эх сурвалж: “Өглөөний Сонин”