Хэдэн өдрийн өмнөөс л чуулганыг хуралдуулах хэрэгтэй, төрийн ажил цалгардууллаа хэмээн АН-ынхан хоолойгоо сөөтөл хашгирсан. Ийнхүү хүсэн хүлээсэн чуулган эхлэх гэтэл АН- ынхан чуулганы хуралдаандаа орж ирэхгүй удав. Чуулган эхлэх товоос хойш бүтэн цагийн дараа гишүүд суудалдаа заларч гишүүдийн 42 хувийн ирцтэйгээр хуралдаан эхэлсэн юм.

УИХ-ын чуулганы нэгдсэн хуралдаанаар Монгол Улсын 2013 оны нэгдсэн төсвийн тухай хуулийн төсөл болон түүнтэй холбогдох хуулийн төслүүдийн хоёр дахь хэлэлцүүлгийг хийхээр байнгын хороодын санал дүгнэлтийг “бөөндөж” танилцууллаа. Хэлэлцүүлгийн шатанд УИХ- ын гишүүн Су.Батболд хөрөнгө оруулалттай холбоотой асуудлыг чухалчлан хөндсөн.

Ингэхдээ сайдтай аймгийн хөрөнгө оруулалт сайдгүй аймгуудынхаас хэд дахин илүү байгааг шүүмжилж сайд нарыг хариулт өгөхийг шаардав.
Тодруулбал, Архангай аймгаас Эдийн засгийн хөгжлийн сайд Н.Батбаяр сонгогдсон бол Үйлдвэр, хөдөө аж ахуйн сайд Х.Баттулга Баянхонгор аймгаас сонгогдсон. Ирэх жил Архангай аймагт 42 тэрбум төгрөгийн хөрөнгө оруулалт хийхээр төсвийн хуульд төлөвлөсөн бол Баянхонгор аймагт 32 тэрбум төгрөгийн хөрөнгө оруулалт төсөвлөгджээ.

Мөн Су.Батболд гишүүний асуултад Сангийн сайд “Хөрөнгө оруулалтын төлөвлөлтийг Сангийн яам хариуцахаа больж, Эдийн засгийн хөгжлийн яаманд шилжсэн. Тиймээс Сангийн яамны хувьд хөрөнгө оруулалтын дотоод бүтцийг тохироод явж байгаа. Хөрөнгө оруулалтыг тусгахдаа объект барих бэлтгэл нь бүрэн хангагдсан шаардлагыг харгалзаж үзсэн. Бэлтгэл хангагдаагүй хөрөнгө оруулалтыг хойшлуулсан” гэлээ.

Харин Эдийн засгийн хөгжлийн сайд Н.Батбаяр “Ирэх жил нийт 1.5 их наяд төгрөгийн хөрөнгө оруулалт хийхээр төлөвлөснөөс 300 нь шинээр барих объект. Харин 100 нь өмнө эхлүүлсэн объектод хамаарах хөрөнгө оруулалт” хэмээн товчхон тайлбарыг өгөв. Ийнхүү гишүүд асуулт асууж чуулган үргэлжилсэн. Энэ үеэр УИХ-ын гишүүн Н.Энхболд Ерөнхий сайдад хандан жижиг дунд үйлдвэрийн талаар Монгол Ардын Намын гишүүдийн өргөн барьсан хуулийн талаар тодруулсан боловч Ерөнхий сайд маань асуултаа ойлгосонгүй юу, мэдэн будилсан уу тэс өөр зүйл яриад явчихав.

Ингэхдээ УИХ- аас авах гэж зүтгээд байгаа 50 тэрбум тргрөгөө юунд зарцуулах гэж буй талаараа цухас дурдлаа. Тэрбээр “50 тэобум төгрөгийг хүүхдийн цэцэрлэг барих, явган хүний зам барих гээд зарцуулах олон зүйл байна. Цааш хийх ажлаа хэлээд байвал их олон. Яс юман дээр 50 тэрбум төгрөг юу ч биш шүү дээ” хэмээн ам алдав. Ийнхүү чуулганы хуралдаан багш нарт олгох тэтгэмжийг ямар шалтгааны улмаас танасан тухай үргэлжиллээ.

Үүнийг Сангийн сайд тайлбарлахдаа “Анх Боловсролын тухай багц хуулийн төсөл өмнөх УИХ-аар хэлэлцэх шатанд 3.7 тэрбум төгрөгийн эх үүсвэр шаардаж байсан. Энэ нь алслагдсан бүсэд багш нарыг тогтвор суурьшилтай ажиллуулах зорилготойгоор тавигдсан эх үүсвэр. Гэвч хууль батлагдах шатанд боловсролын салбарыг нийтэд нь хамарсан.

Хуулийг ирэх жилээс хэрэгжүүлж эхэлснээр төсөвт 160 орчим тэрбум төгрөг суулгах шаардлагатай ч ийм хэмжээний эх үүсвэрийг төсөвт суулгах бололцоогүй. Тийм учраас үе шаттайгаар авч үзье. Хуулийг хэрэгжүүлэх хугацааг 2014 оноос эхлүүлье. Ингэхдээ алслагдсан сум суурин газрын багш нарыг хамруулъя гэсэн санал боловсрогдоод явж байгаа. Эхний ээлжинд нийт 13 тэрбум төгрөг шаардана” гэлээ.

Д.Мягмарсүрэн
Эх сурвалж: “Монголын Үнэн”