ШӨХТГ-ын дарга О.Магнай энэ сарын  дөрөвний өдөр сэтгүүлчдэд мэдээлэл хийж согтууруулах ундаа үйлдвэрлэгчидтэй хатуу тэмцэхээ мэдэгдсэн. Тэрбээр тус хэвлэлийн хурлынхаа үеэр “Өмнө нь архи, пиво үйлдвэрлэгчид хууль зөрчсөн тохиолдолд 250 мянгаар торгоод л өнгөрдөг байсан. Одоо бол тэгж зөөлөн хандахгүй. Архи, пивоны ил болон далд реклам явуулсан, согтууруулах ундаа сурталчилсан ямар ч байгууллагыг торгож болох хамгийн дээд хэмжээгээр торгоод, тусгай зөвшөөрлийг нь хураах хүртэл арга хэмжээ авна. Одоо архи, пиво үйлдвэрлэгчид далд реклам маш их явуулдаг. Далд рекламанд хэн ч хууртахаа больсон. Энэний ард архи байна, пиво байна гэж хүмүүс бүгд мэддэг. Тийм болохоор ямар нэгэн байдлаар ил болон далд реклам явуулахаа болих хэрэгтэй. Энэ журмыг тав хоногийн дараагаас буюу энэ сарын 9-нөөс эхлэн хэрэгжүүлж эхлэнэ. Энэ өдрөөс хойш хот болон хөдөө орон нутагт архи, пиво рекламдсан ямар ч самбар, сурталчилгаа олны нүдэнд харагдах ёсгүй” хэмээн ярьсан юм. Түүний энэ захирамж шийдвэр зарим газруудад маш том анхааруулга болж чадсан бололтой. Харин зарим нэг ТОМ компаний хувьд ёстой нөгөө нэг чихээр нь ороод нэг чихээр нь гарна гэдэг л болох шиг боллоо. Үүний тод бөгөөд том жишээ бол өнөөх л эрх ямба нь хэрээс хэтэрсэн АПУ компани юм. Тус компаний хувьд сүүлийн үед бараг телевизийн суваг бүхнээр “Нийслэл” пиво болон шинэ үйлдвэрийнхээ рекламыг явуулж байгаа. Өчигдөр буюу энэ сарын 10-ны өдөр ч уг реклам бүр их “идэвхижээ юү” гэлтэй бүр дамтамж нь ихэссэн харагдана лээ. Тухайлбал нэг нэвтрүүлгийн дундуур гарах нэг рекламны багцад уг реклам гурван удаа гарав. Ийнхүү хуулийг гууль болгосон эрхээ мэддэг ч үүргээ ухамсарладаггүй энэ том компанийг яавал зохилтой вэ. “АПУ”-гын хувьд Хан-Уул дүүргийн шүүхийг “худалдаад авчихсан” нь аль эрт олны нүдэнд ил болсон. Харин ШӨХТГ-ыг одоохондоо арай ч “атгачихаагүй” байлтай. Ямартаа ч ШӨХТГ-ын дарга О.Магнай “Энэ сарын 9-нөөс эхлэн миний нүдэнд нэг ширхэг архи, пиво үйлдвэрлэгчийн ил болон далд реклам харагдсан тохиолдолд тусгай зөвшөөрөлтэй нь ярина” хэмээн мэдэгдсэн. Тэгэхээр энэ удаад ШӨХТГ-аас АПУ компанид алганы амт үзүүлэх үү, аль эсвэл толгойг нь илээд өнгөрөх үү гэдгийг харах л үлдлээ.
Г.Мөрөн www.uls.mn