МАХН-ын дарга Н.Энхбаяр өнгөрсөн наймдугаар сарын 2-нд Сүхбаатар дүүргийн шүүхээс дөрвөн жилийн хорих ял сонссон.

Гэвч тэрээр наймдугаар сарын 17-ноос хойш биеийн байдал муу хэмээн Сайд нарын гэгдэх хоёрдугаар эмнэлэгт хэвтэн эмчлүүлж байгаа юм. Эмнэлэгт хүргэгдэн ирэхдээ тэргэнцэртэй ирсэн түүний ямар өвчин туссан нь одоо хэр тодорхойгүй.
Эрүүл мэндийн сайд Н.Удвалын хэлснээр, Н.Энхбаяр монголд байхгүй эмгэг туссан гэдэг. Гэвч үүнийг нь эмчлэгч эмч нарын зүгээс үгүйсгэсэн. Өмнө нь Н.Энхбаярыг өлсгөлөн зарлаж байх үед биеийн байдал нь ямар байгаа, ямар өвчин туссан тухайд цаг алдалгүй мэдээлж байсан. Харин одоо бол энэ нь хаалттай сэдэв болоод байна. Харин Н.Энхбаяр үүнийг нь ашиглан, эмнэлэгт ялаа өнгөрүүлсээр.
Н.Энхбаярыг анхан болон давж заалдах шатны шүүхээс гэм буруутай хэмээн ял сонсгоод байгаа. Тэгэхээр түүний ялын тогтоолыг гардуулбал тэрээр хорих анги руу хуваарилагдана. Гэвч тэрээр биеийн байдал муу хэмээн эмнэлэгт хэвтсээр байна.
“Долдугаар сарын 1”-ний хэрэгт буруутгагдаад буй цагдаагийн экс дарга нарын биеийн байдал нь муу байхад тэргэнцэр, дамнуургатай нь шүүх хуралдаанд оролцуулж байсан. Тухайлбал, генерал Ч.Амарболд хавдар боох хагалгаанд, О.Зоригт хурандаа зүрхний хагалгаанд ороод хагалгааны оёо нь ч аниагүй наркозтой байхад нь. Мөн сахарын хэмжээ нь ихэсч, хөл гаргүй боллоо гээд улсын эмнэлэгт хэвтүүлэх хүсэлт тавьсан ч Нийслэлийн шүүх хүлээж аваагүй, татгалзсан хариу өгсөн байдаг.
Гэтэл МАХН-ын дарга Н.Энхбаярын биеийн байдал хэр байгаа, ямар өвчин туссан нь мэдэгдэхгүй байхад түүнийг эмнэлэгт хоёр сар хэвтүүлж байна. Цаашид ч ялыг нь эмнэлэгт эдлүүлэх нь хэмээн иргэд хардаж байгаа. Энэ талаар ШШГЕГ-ын албан тушаалтнаас тодруулахад, “Одоо бидний мэдэх асуудал биш. Эмчийн дүгнэлтээс шалтгаална. Эмч биеийн байдал гайгүй гэвэл хорих анги руу авч явна” гэв. Мөн Нийслэлийн шүүхийн албан тушаалтан ч ийм хариу өгөв. Тэгэхээр эмч нар биеийн байдал нь муу гэсэн дүгнэлт гаргаад байвал Н.Энхбаяр ялаа эмнэлэгт өнгөрүүлэх боломжтой бололтой.
Харин цагдаагийн экс дарга нарын биеийн байдал тааруу гэж байсан ч ялтан хэмээн улсын эмнэлэгт шилжүүлэхгүй хорихын эмнэлэгт хэвтүүлсээр. Хэдийгээр МАХН-ын дарга Н.Энхбаяр төрийн тусгай хамгаалалтад байдаг ч тэд адилхан хоёр шатны шүүхээс ял сонссон хүмүүс. Гэтэл Н.Энхбаярт хууль арай өөр үйлчлээд байх шиг.
Энэ мэт Н.Энхбаяр өмнө нь гарч байгаагүй шинэ шинэ үзэгдэл, үйл явдлын эзэн болсоор. Анх удаа төрийн өндөр албан тушаалтанд шүүхээс хорих ял оноосон, шүүх хурлыг нь анх удаа телевизээр дамжуулсан. Мөн анх удаа Монголд байгаагүй эмгэгтэй болсон. Ялын биелэлтийг хоёр сарын хугацаанд эмнэлэгт өнгөрүүлсэн гээд Н.Энхбаярын шинэ бүхний эхлэл болсоор.

http://khulangoo.miniih.com/index.php/home/post/2886