Баригдсан байшин болгоны буланд PC тоглоомын газар, буудал, баар байрладаг хэмээн шүүмжилдэг ч зөвшөөрөлтэй,

зөвшөөрөлгүй нь мэдэгдэхгүй хувийн эмнэлгүүд олноор байдгийг тэр болгон хөндөж ярьдаггүй. Тэр олон хувийн эмнэлгүүдэд үр хөндөлт, хуурамч онош, залилан мэхлэх ажиллагаа цэцэглэн хөгжиж байсан нь олон удаагийн үйлдэл, муу муухай зүйлээр илэрсэн. Саяхан л гэхэд мэргэжлийн хяналтынхан шалгалт хийхэд хуудуутай үйлдэл олон гарч, зарим нэгийг нь торгоод өнгөрөхөөс хэтрээгүй. Улсын эмнэлэгт дугаарлахаас цөхөрсөн хэсэг нь үнэ өндөр байгааг нь үл харгалзан хувийн эмнэлэгт үзүүлэх болсон нь эмчийн сургууль төгссөн, ахиухан мөнгөтэй хүмүүсийн бизнес болж цэцэглэсэн. Үнэ өртөг “тэнгэрт хадсан” ч үзүүлж байгаа үйлчилгээ нь “жул” эмэгтэйчүүдийн эмнэлгийн асуудлыг энэ удаад хөндлөө.

Хувийн эмнэлгийн ихэнхи нь эмэгтэйчүүдийн эмнэлэг болон шүдний эмнэлэг байдаг. Нэг үеэ бодоход нийгэм хөгжиж тэр хэрээр ээж болох бүсгүйчүүд маань хүссэн мөнгийг нь төлөөд ч хамаагүй үр хүүхдээ эрүүл саруул бойжуулахад анхаарч, жирэмсэн болсон цагаасаа эмчийн хяналтад ордог болсон. Төрөлт ихсэхийн хэрээр төрөх эмнэлгийн үзлэг оношилгоо оочерт дарагдаж, ачааллаа дийлэхээ болиод байгаа. Харин энэ байдлыг овжин ашиглаж чадсан эрхмүүд хувийн эмнэлгийнхээ үйлчилгээнд эхийн ургийг 3D, 4D-гээр үзэх буюу оношлох үйлчилгээг нэмжээ. Гаднаа 3D-ээр үзэж оношилно гэсэн хаяг өлгөсөн ч ороод үзүүлэхэд энгийн эхо оношилгоо хийгээд өнгөтөөр үзсэн хэмээн мөнгө нэхдэг бизнес хувийн эмнэлгүүдэд их байдаг талаар нэг танил маань ярилаа. Энгийн эхонд эхийн ураг, доторхи гажиг, буруу хөгжил мэдэгдэхгүй бөгөөд үнэ хямд байдаг. Харин өнгөт эход дотор эрхтний өвчлөл, ургийн гажиг, хүйс нь бүгд харагддаг учраас төрөх эхчүүд ихээр үзүүлдэг нь тэдний бизнес санааг хэрэгжүүлэхэд “том өгөөш” болсон нь мэдээж. Учир мэдэхгүй хэсэг нь өнгөтөөр үзүүлчихлээ гээд дуугүйхэн гардаг бол нөгөө хэсэг нь хүүхдийнхээ хүйсийг тодорхойлуулах, ургийн гажиг байгаа эсэхийг мэдэх хүсэлтэй байгаагаа хэлж хэл ам таталдаг байна. Харин өнөөх нь эмч нь “Одоохондоо нууц байсан нь дээр. Хүүхдийнхээ хүйсийг мэдэх ямар хэрэг байна” гэж хэлсэн байгаа юм. Бараг л худалч хүнд хүйсийг нь эрт мэдэх нь муу гэх ухааны юм ярьж аргалж өнгөрүүлсэн гэдгийг танил маань хэлж байсан юм. 3D оношилгоонд үзүүлж чадаагүй 30 гаруй мянган төгрөг төлчихөөд гарсан тэрбээр санал гомдлоо Мэргэжлийн хяналтын газарт хүргүүлсэн ч таны хүсэлтийг хүлээж авлаа гэхээс оор дорвитой алхам хийгээгүй ажээ.

Эмнэлгийн үйлчилгээг бүрэн дүүрэн үзүүлж, авах төлбөрөө ч авчихдаг бол хэл ам татлаад явахгүй байсан болов уу. Гэвч нүглийн нүдийг гурилаар хуурсан, эмчилгээ оношилгоо үзүүлж байгаа нэр зүүсэн булан тохой бүрт байрлах хувийн эмнэлгүүдэд стандарт тогтоож, анхааралдаа авах цаг болсон бололтой. Хугацаа нь дууссан тариа хийж эмчлүүлэгчдээ хохироосон, хулгайгаар үр хөндөлт хийж хүний аминд хүрэх шахсан, хуурамч шинжилгээний бичиг хийж өгөөд мөнгө авдаг гээд сайнаасаа саарыг илүү дуулгадаг зориулалтын бус байранд байрлах эмэгтэйчүүдийн эмнэлгүүд жирэмсэн эхчүүдээр бизнес хийж байгааг салбар хариуцсан сайдууд нь анхаарч, гэнэтийн шалгалт хийж гэм бурууг нь тогтоовол ямар вэ. Нэг хүний гомдол, санал бус нэлээд хэсэг хүмүүсийн эрх ашиг хөндөгдөж байгаа учраас энэ асуудлыг анхаарлын гадуур орхиж боломгүй санагдлаа.

Б.Өнөртогтох