“Засаг задрах нь” гэх яриа өнгөрөгч долоо хоногийн дундуур гарч улстөрийн хүрээнийхэн болон  улстөрчид ёстой л

“…орчилдон тэмцэлдэж байхад…” харин нийт масс үүнээс өөр зүйлд сэтгэл чилээж байсан гэхэд болно. Тэдний сэтгэлийг өвтгөсөн эл яриа бол “арванхоёрдугаар сарын 21-нд болно” гээд байгаа “Дэлхий сүйрнэ, сүйрэхгүй юмаа гэхэд гурван өдөр нар үзэхгүй, хүйтний эрч -70 хэмд хүрнэ” гэх хуудуутай мэдээлэл байв. Даяаршил нэрийн дор сүлжээний дайнд нэрвэгдээд байгаа энэ цаг үед  олон мянган хүнийг “мунхруулж” “Орифлейм”-ын сүлжээнд татан оруулж зэгсэн баяж­сан Г.Оюунгэрэл гэгчийн амаа мэдэхгүй, эх адаггүй бурсан нь ийн олныг айдаст автуулсаар л байна.
Нийгмийг цочирдуулсан энэ яриаг Монголын эрдэмтэн судлаачид няцаасан ч “бурмал эмэг­тэй”-н ярианд эмзэглэж, эргэлзсээр л. Түүнийг ийн дэмийрэхийн зэрэгцээ ОБЕГ-аас улсын нөөцөд гэр худалдаж авна хэмээн тендер зарласан нь “Дарин дээр давс нэмэв” гэгч  болсон юм.
Гэхдээ дээрх хоёр асуудлын аль аль нь  экс ерөнхийлөгч Н.Энхбаярын хүү Э.Батшугарын томилгооны сенсацид дарагдсан гэхэд болно. Өдгөө 25 настай тэрбээр Монголын “хамгийн хамгийн” гэх тодот­голд багтаж байгаа нэгэн. Тод­руулбал,хамгийн залуугаараа томоо­хон  албан тушаалд тохоон томи­логдсон нь олны анхаарлыг татахын сацуу экс ерөнхийлөгчийн ямар тоглолт хийх гэж байгаа нь одоо­хондоо “Татаатунгаа” хэвээр л байна.
Харин “Засаг задрах нь” гэх яриа­ны тухайд М.Энхсайханы хэлсэн хэдхэн үгнээс болсон хэрэг гэж улстөр судлаачид үзэж байгаа.
Сангийн сайдын суудалд тухлах байх гэсэн годьдлогыг мань хүн сэтгэл­дээ тээж нийтээрээ ч тийн харж байтал “жийгдэж” орхисон тэрбээр бөөрөө нийлүүлж байсан “экс Ерөнхийлөгчийн хийсэн ажил” хэмээн үзсэн. Иймдээ ч “Миний хувьд экс Ерөнхийлөгчийг хэл­мэг­дүүлж байна гэж бодохгүй бай­гаа” хэмээн хэлсэн. Энэ нь шууд утгаараа “Та нартай цаашид мөн хамтарч ажиллах байх даа” гээд хэлчихсэн гэхэд болно. Гэхдээ түүнийг АН, МҮАН хоёрыг  хам­тат­гах ажлынхаа эхлэлийг тавь­сан гэдгийг  улстөрийн хүрээнийхэн аль хэдийн олоод харчихсан байгаа.
Үүнийг нь ч батлах гэсэн мэт УИХ-ын гишүүн Ц.Цолмон намын нөхөддөө ч хэлэлгүй МАХН-д элссэн явдал юм. Тэрбээр парламентад тангараг өргөхдөө “Шударга ёс” эвслийн жагсаалтаар орж ирсэн ч үндсэндээ МҮАН-ын квотыг эзэлж байсан. Тиймээс засагт эвссэн эвсэл дотооддоо зөрчилдөж байгаагийн нэр илрэл болсон.
“МАН-аас 500 гишүүн МАХН-д элсэх гэнэ. МАХН, МАН хоёр эвсэх нь” гэх яриа гарч байсан ч мөн л Монголбанкны дэд ерөнхийлөгчөөр томилогдсон Э.Батшугарын тухай ярианд нам  болсон юм.
Эдгээртэй зэрэгцэн УИХ-ын гишүүн эмэгтэй гадаад улсад албан ажлаар явахдаа хүний амь аварсан гэх мэдээ гарсан нь чихэнд чимэгтэй бай­лаа. Үүнийг тодруулбал, сүүлийн үед адтай, одтойгоороо дуу­даг­дах болсон эрхэм гишүүн З.Баян­сэ­лэнгэ.
Тэрбээр улсаа төлөөлөн Японд “Хүн ам хөгжлийн асуудлаарх Азийн 28 дахь парламентчдын уул­залт”-д оролцож  байхдаа  Ин­до­не­зийн парламетын гишүүн ухаан алдаж унахад нь анхны тус­ламж үзүүлж, хиймэл амьсгаа хийн,  түр­гэн тусламж ирэхэд нь хүлээл­гэж өгсөн аж. Түүний энэ үйл­дэлд Токио­гийн онцгой байдлын ал­банаас талархал илэрхийлж, мөн Шинэ Зеланд улс жуух бичгээр шаг­насан.
Хорих ангийн сувилагчаас, хо­рооны Засаг дарга, УИХ-ын гишүүн гэх албан тушаал хашиж яваа энэ эмэгтэйн тухай таагүй мэдээ­лэл байдаг ч түүнийг энэ удаа хүний амь аварч Монгол Улсын төр түшилцэж яваа эрхмүүд нэг иймэрхүү мэдлэг чадвартай гэдгийг дэлхий нийтэд харуулж чадсан тул одоо “Шударга журам”-аар шагнана хэмээн мон­голчууд багагүй бахархасан юм.
Өнгөрөгч долоо хоногт улстөрд өрнөсөн эдгээр үйл явдал УИХ-ын дэд даргыг гишүүн С.Ганбаатар Оюу­толгойн гэрээний асуудлаар дуэльд дуудаж С.Баярцогт гишүүн саналыг нь хүлээн авснаар өндөр­лөсөн.
Улстөр гэх нэгэн ертөнцөөр ийн дуулиантай  байхад  ургацын асуудлаар ч бас чихэнд чимэгтэй мэдээ сэлт нэлээдбайсан.
Улсын хэмжээнд ургац  ху­раалтын ажил 60 хувьтай яваг­даж байгаа  бөгөөд  212 мянган тонн үр тариа, төмс 212.2,  хүнсний ногоо 33.7, малын тэжээл 8.7 мянган тонн хүнс­ний ногоо, 33.7 мянган тонн малын тэжээл, 8.7 мянган тонн тосны ургамал хураасан байна.
Мөн Засгийн газрын хурал­даанаар  улаан буудайн мөнгөн урам­шуул­лыг хоёр дахин нэмэхээр болж  улаан буудай үйлдвэрлэгч иргэн, аж ахуйн нэгжээс дотоодын  гурилын үйлд­вэр, тариалан эрхлэлтийг дэм­жих санд нийлүүлсэн  нэг тонн хүсний буудайд олгох мөнгөн урам­шуул­лыг 100 мянган төгрөг болго­сон нь чихэнд чимэгтэй мэдээллүүдийн нэг бай­сан юм.

Эх сурвалж:”Өглөөний Сонин”