Өнөөдөр  Монголын ардчилсан хөдөлгөөний удирдагч, МоАХ-ы анхны ерөнхий зохицуулагч, Дэд бүтцийн сайд, УИХ-ын

гишүүн асан С.Зоригийн  амиа алдсан өдөр.  Уг өдрийг тохиолдуулан С.Зориг агсны хөшөөнд Монгол Улсын Ерөнхийлөгч Ц.Элбэгдорж, Ерөнхий сайд, АН-ын дарга Н.Алтанхуяг, Нийслэлийн Засаг дарга бөгөөд Улаанбаатар хотын захирагч Э.Бат-Үүл, УИХ-ын гишүүн, ИЗНН-ын дарга, Байгаль Орчин, Ногоон хөгжлийн сайд  С.Оюун тэргүүтэй хүмүүс цэцэг өргөсөн юм.

Энэ үеэрЕрөнхийлөгч Ц.Элбэгдорж:  С.Зоригийн маань амь насыг зэрлэгээр хөнөөсөн эзнийг илрүүлэх ёстой гэсэн байр суурийг би  баримталдаг. Жилийн өмнө үндэсний аюулгүй байдлын зөвлөлийн хурлаар С.Зоригийн амь насыг хөнөөсөн хэрэгтэй асуудлыг авч хэлэлцсэн. Ерөнхийлөгч болоод энэ асуудлыг анхаарч ирлээ. Ер нь ажиглаж байхад энэ хэргийг шалгаж байсан мэргэжлийн хүмүүсийн үйл ажиллагаанд дэмжлэг үзүүлэх ёстой юм байна. Яг жилийн өмнө улсын ерөнхий прокурорын саналыг сонссон. С.Зоригийн амь насыг хөнөөсөн хэргийг анхнаас нь шалгаж байгаа хүмүүсийн санал дүгнэлтийг сонссон байгаа. Ингээд их хурлын тодорхой байгууллагуудын зүгээс шийдэх шаардлагатай ажлууд байгаа. Засгийн газрын зүгээс анхаарах шаардлагатай ажлууд байгаа. Өмнө нь энэ хэрэг дээр ажиллаж байсан хүмүүсийг санаатай санаандгүй өөр тийш нь томилсон зүйл байгаа. С.Зоригийн хэрэг дээр ажиллах хэсгийнхэнд санхүү болон бусад шаардлагатай асуудлууд дээр хойрог хандсан зүйл байсан.  Харин одоо энэ бүх зүйлийг шийдсэн байгаа. Энэ хэргийг шалгах үйл явц дээр ахиц дэвшил гарна гэдэгт итгэлтэй байна. ” хэмээн өгүүлэв.

Сонирхолтой нь 1998 онд болсон гашуудлын цуглаан дээр “С.Зоригийг М.Энхсайхан алсан” хэмээн өгүүлж байсан Б.Билэгт өдгөө ЦЕГ-ын даргаар ажиллаж буй билээ.

С.Сарнай

sonin.mn