Сүхбаатар дүүргийн IV хороо, Чин ван Ханддоржийн гудамжинд буюу ОХУ-ын Элчин сайдын яамны баруун талын зам

дагуу орон сууцны хоёр байрны дунд талын аркийг таглан барьсан “Сарнайх” гоёлын студи гэж бий. Зургаан давхар энэ саарал барилга бол Авлигатай тэмцэх газрын дэд дарга Б.Хурцын эхнэр Ү.Сарнайн эзэмшлийнх. Угтаа Б.Хурцынх гэсэн үг. Түүний эхнэр нь энэ барилгад гоо сайхны салон, үсчин, маникюр, педикюр, цэцгийн дэлгүүр ажиллуулдаг. Баригдаад таван жил орчим болж байгаа энэ барилгыг гаднаас нь харахад осолдохгүй дээвэр, хаалга, цонхтой “дөрвөлжин сав”.
Дөрвөлжин сав гэсний учир нь арк байсан зайг ашиглаад, хажуу талын хоёр байртай залгуулан барьсан. Уг нь энэ аркаар өмнө нь авто машин чөлөөтэй орж, гардаг байлаа. Тэр хавийн орон сууцанд амьдардаг иргэд ч замаа товчилж явдаг байж. Харин одоо машин явах зам нэгэнт үгүй болж, хоёр хүн зөрж өнгөрөх төдий аюултай нарийхан хонгил үлдээсэн байна. Байрны оршин суугчид энэ харанхуй хонгилоор нэвтрэхээ ч больжээ. Осолдохгүй өдрийн цагаар л орж,гарахаас биш харанхуй болсон хойно үүн рүү зүглэх зоригтон үгүй гэнэ. Аркийг таглаж барилга барьснаар тойроод байгаа орон сууцнууд руу гал, түргэн тусламж, цагдаагийн машин шуурхай очих боломжгүй болжээ. Холуур тойрч, хугацаа алдаж очих ашиггүй боломжийг Б.Хурц бий болгосон байна.

Шинээр барилга барихдаа барилгын норм ба дүрэмд зааснаар тухайн барилгын суурь болоод өндөр нь зэргэлдээх барилгуудтай адилхан байх ёстой. Гэтэл Б.Хурцын энэ барилгын хувьд хажуу талын хоёр орон сууцнаас хоёулангаас нь өндөр юм.

Б.Хурц өлөн нүд гаргаж, хэсэгхэн зайг ч олж цэвэрхэн гэгч нь дээрэмджээ. Уг нь Улаанбаатар хотод явган хүн, хөгжлийн бэрхшээлтэй иргэд болон авто машин, дугуйтай хүн явж болох газруудыг хааж барьсан барилгыг цэгцлэн, улмаар дүрэм журамд харшилсныг нь нураах тухай ч яригдаж байгаа. Хэрвээ энэ тушаал, захирамж хэрэгжвэл Б.Хурцын ард иргэдээс цэвэрхэн гэгч нь дээрэмдэж авсан энэ аркийг таглаж боссон саарал байшинг нураах ёстой. Тэгээд ч барилга ашиглалтын дүрэмд зааснаар аливаа барилга авто машин болон явган хүний зам, талбайн хөдөлгөөнийг хаах зэргээр бусдад саад учруулахгүй байх ёстой. Мөн ус, дулаан, эрчим хүчний алдагдал гаргах, инженерийн шугам сүлжээнд хэт ачаалал өгөх ёсгүй.

Гэтэл Б.Хурцын цэвэрхэн аргаар дээрэмдэж авсан газар дээрээ босгосон энэ байшин хажуу хавийнхаа хуучны барилгуудын ус, дулаан, эрчим хүчнээс “хумсалж” байгаа юм. Цаасан дээр бичигдсэн энэ мэт дүрэм журам ноён Б.Хурцад хумсын чинээ ч хамаагүй бололтой. Хөрөнгө, орлогын мэдүүлгээс нь харахад Б.Хурц “Сарнайх” ХХК-ийг 100 хувь эзэмшдэг. Энэ компанийн нэлээд хэдэн үл хөдлөх хөрөнгө буюу барилга хотын энд тэнд бий. Бараг бүх барилгаа хууль, дүрэм зөрчиж босгосон тухай хэвлэлүүдээр бичдэг билээ.

Ц.Шижир

Эх сурвалж :”Өдрийн шуудан”