Монголчууд нэг үеэ бодвол гэртээ хооллохоос илүү гадуур хооллохыг эрхэмлэж, гадаадын янз янзын ресторануудыг зорих болсон билээ.

Гэвч тэдгээр ресторанууд ямар ч чанарын шаардлага хангадаггүй гэдэг нь Мэргэжлийн хяналтын байцаагчдын удаа дараагийн шалтгалаар илэрсээр байгаа. Тодруулбал саяхан нэгэн хятад ресторанд шалгалт хийхэд хоолны хачируудаа ваннандаа хийдэг байсан нь тогтоогдсон.

Тодорхой хэлбэл өөрсдийнхөө биеийг угаадаг ваннандаа хоолныхоо хачируудыг хийжээ. Тэрхүү хачируудаа хэдэн долоо хоногоор хамаагүй хадгалж байгаад ресторандаа үйлчлүүлсэн үйлчлүүлэгчиддээ  өгдөг байсан нь тогтоогдсон.

Тэгвэл өнөөдөр тэдгээр ресторануудын нэг болох “Мама” солонгос ресторан маш ноцтой алдаа гаргасан байна. Энэ ресторан бараг л дүүрэг бүрт салбартай бөгөөд байс гээд л чанарын шаардлага хангадаггүй талаар чих дэлсдэг байсан.

Харин энэ удаа үйлчлүүлэгчээ амьд жоомоор “дайлжээ”. Хорооллын “Түмэн плаза”-гийн өөдөөс харах тус рестораны салбарт өнөөдөр 4 үйлчлүүлэгч үйлчлүүлжээ. Тэдний хоёр нь эхэлж ороод  хоолоо идээд дуусч байтал сүүлийн хоёр нь орж ирээд хоолоо захиалсан байна.

Удалгүй сүүлийн үйлчлүүлэгчийн хачир иртэл дотроос нь жоом гарч иржээ. Бүр амьд шүү. Үйлчлүүлэгчид тэр дороо эздүүдэд нь хэлж, гал тогоонд нь ортол шалан дээр нь үхсэн жоом хэд хэдээрээ байсан байна. Түүгээр ч барахгүй ариун цэврийн наад захын шаардлага хангахгүй, булан тохой бүр нь тоостой, хэрэглэсэн сав нь хүртэл бохир заваан байжээ.

Бухимдсан үйлчлүүлэгчид газар дээр нь Мэргэжлийн хяналтынханыг дуудсан байна. Рестораны эзэд энэ талаар ямар нэгэн тайлбар хийж чадахгүй байсан бөгөөд яг одоогийн байдлаар тус ресторанд мэргэжлийн хяналтын байцаагчид шалгалт явуулж, үйл ажиллагааг нь зогсоох эсэхийг шийдвэрлэж байгаа юм байна.

chuhal.mn