“Оргил” бөөний худалдааны төв хэмээн хэдэн жилийн өмнө хорооллын эцэст байгуулагдаж байсан төв өдгөө Нийслэлд

зургаан том салбартай, хичээлийн хэрэгслийн худалдаа эрхэлдэг гээд үйл ажиллагаа нь чамгүй өргөжсөн билээ. Бүх барааг захын болон бөөний үнээр зардаг гэх тус дэлгүүрийнхэн хямдруулсан үнээ иргэдэд үйлчилсэн бүхэл мөнгөнийхөө хариултаас өлхөн босгочихдог бололтой.

Өчигдөр л гэхэд Тусгаар тогтнолын ордонд байрлах тус дэлгүүрийн салбараар үйлчлүүлсэн иргэдэд задгай мөнгө байхгүй гэсэн нэрийдлээр хариултын 10, 20 төгрөгийг өгөөгүй аж. Өдөрт 100 хүн үйлчлүүлсэн гэж бодоход ойролцоогоор 2000 төгрөгийн хариултыг тус дэлгүүр өгөөгүй болж таарна. Энэ мөнгө зарим хүмүүст юу ч биш боловч харин хэрэгтэй үедээ хэнд ч их мөнгө юм.

Жишээ нь, “Оргил” худалдааны төвөөс худалдан авалт хийсэн хүний мөнгө 20 төгрөгөөр дутвал тэд хэзээ ч таны мөнгө дутуу ч гэсэн “Бид бараагаа өгнө” гэж хэлэхгүй нь тодорхой. Тэгсэн атлаа хэрэглэгчдэд болохоор хариулт мөнгийг нь өгөхгүй байдал ганц өчигдөр ч биш ер нь байнга тохиолддог байна. Үүний хажуугаар тус худалдааны төвийн ерөнхий захирал Ж.Ганбаатар нь эрэгтэй ажилчдаа “Орой хүртэл ажилсангүй” гэж өрөөндөө дуудаж зодох тохиолдол хэд хэдэн удаа гарсан гэнэ. Тусгаар тогтнолын ордонд байрлах салбарынх нь зохион байгуулагчид 20 төгрөгний хариултын тухай гомдол гаргахад “Иймхэн юмнаас болж зарга хийдэг хүн байхгүй, байдаг ч үгүй” хэмээн хэрэглэгч рүүгээ дайрч давшилжээ. Үйлчилгээний соёл гэдэг зүйл манайд нэг ёсондоо унасан байдалтай байгаа. Үүнийг хянадаг, шалгадаг хүн ч байхгүйн дээр хэрэглэгчдээс бага багаар мөнгө хумсалдаг супермаркетуудыг горимонд нь оруулмаар юм. Задгай мөнгө байхгүй гэдэг нэрийдлээр хэрэглэгчдээс илүү мөнгө авах нь үйлчилгээний ёс зүйд байж болохгүй санагдана.
С.Ганганмаа (www.wikimon.mn)