МАН-ын Чингэлтэй дүүргийн намын үүрд хамаарах 250 гишүүн өнөөдөр МАХН-ын гишүүнчлэлээ сэргээж, батлахаа гардлаа. Намын батлахыг МАХН-ын ерөнхий нарийн бичгийн дарга Г.Шийлэгдамба гардуулж, “Бид бүгдээрээ хамдаа шударга ёсыг цогцлоох үүрэгтэй. Шударга нийгмийн төлөө МАХН-тайгаа хамтран зүтгэхээр ирж байгаа гишүүддээ баярлалаа” гэсэн юм. Дашрамд сануулахад, хоёр долоо хоногийн өмнө МАН-ын 300 гаруй гишүүн мөн МАХН-ын гишүүнчлэлээ сэргээсний дотор Монголбанкны ерөнхийлөгч асан Л.Пүрэвдоржийн хүү П.Хангал багтаж байв. 2012 оны сонгуульд МАН ялагдал хүлээснээ намынх нь дарга хүлээн зөвшөөрч, албан тушаалаасаа чөлөөлөгдөн, үүрэгт ажлаа УИХ-ын гишүүн Ө.Энхтүвшинд шилжүүлэн өгч орон нутгийн сонгуулиас эхлээд ялалт байгуулах ёстой шүү гэсэн үүрэг өгсөн ч уг сонгууль болохоос урьтаад МАН 200, 300-гаар нь гишүүдээ МАХН- руу алдаад байна.