Баянзүрх дүүргийн шүүх өнөөдөр хүн хүчиндэж хөнөөгөөд, цогцсыг нь жорлонгийнхоо нүхэнд хаясан хэрэгт сэжигтнээр татагдсан Ж.Нэргүйг анхан шатны журмаар шүүж, 20 жилийн хорих ял оноолоо.

Өнгөрсөн оны зургадугаар сарын 19-нд Баянзүрх дүүргийн 19 дүгээр хороонд тус хорооны иргэн 23 настай эмэгтэй Э-ийн цогцос иргэн Ж.Нэргүй гэх айлын жорлонгийн нүхнээс олдсон юм. Талийгаач ор сураггүй алга болоод ес хоног болсон байв.

Улмаар тус дүүргийн Цагдаагийн хэлтэс Ж.Нэргүйг сэжигтнээр татан мөрдөн байцаалт явуулж эхэлсэн бөгөөд байцаалтын явцад Ж.Нэргүй “Хүчиндчихээд явуулах гэсэн чинь хүнд хэлнэ гэхээр нь алчихсан. Шуудайнд хийгээд жорлон руу шидэхэд дуу нь гарч байсан. Тэгээд өтгөнд цогцос нь далдлагдахгүй болохоор хашаандаа байсан үртсээр булсан” гэж мэдүүлсэн аж. Задлан шинжилгээний дүгнэлтээр Ж.Нэргүйгийн үрийн шингэн болох нь тогтоогдож, ховч ясыг хугалсан тул үхэлд хүргэсэн гэж гарсан байдаг аж.

Уг жигшүүрт хэргийн шүүх хурал өнөөдөр Баянзүрх дүүргийн Эрүүгийн хэргийн танхимд шүүх хурал таван цаг үргэлжилсний дараа Ж.Нэргүйд Эрүүгийн хуулийн 91.2.2-т зааснаар танхайн сэдлээр хүний амь нас хөнөөсөн хэмээн буруутгаж ялласан юм.

Хуралд даргалагч шүүгчээр С.Пүрэвсүрэн, шүүгдэгч Ж.Нэргүйгийн өмгөөлөгчөөр Н.Тунгалаг, Н.Эрдэнэбат, хохирогчийн өмгөөлөгчөөр Н.Сосорбарам, улсын яллагчаар Нийслэлийн прокурорын газрын хяналтын прокурор С.Алимаа, хохирогч, шүүгдэгчдийн ар гэрийнхэн оролцов.

Харин шүүхийн шийдвэрт гомдолтой, хэт хөнгөн ял оноолоо гэж үзэж байгаагаа хохирогчийн гэр бүлийнхэн хуралдааны дараа илэрхийлж, ойрын хугацаанд Ерөнхийлөгч Ц.Элбэгдоржид хандахаа мэдэгдэж байлаа.

Г.Билгүүн