Өнгөрсөн дөрвөн жилд Монгол Улсын их хуралд нам гүмхэн суусан цөөхөн хэдэн хүний нэг бол Увс  нутгийн тэргүүн бизнесмэн Б.Чойжилсүрэн гишүүн. Түүнийг учир мэдэх хүмүүс мэнгэт сайдын хэтэвч нь болж явсаныхаа хүчинд төрийн өндөр суудалд суусан гэлцдэг. Үнэн ч байж магадгүй юм.

Ц.Нямдорж дарга, Б.Чойжилсүрэн гишүүн хоёрын мэдлийн олон зуун том оврын нүүрс тээвэрлэлтийн автомашин Өмнөговь аймгийн газар нутгийг сүйдэлж, байгаль экологид их хэмжээний хохирол учруулж байгааг хэвлэл мэдээллээр зөндөө л бичсэн санагдана.

Б.Чойжилсүрэн гишүүн монголчуудыг сүүний гачаалд орсон үед орос үхрийн шар сүүгээр ханатал нь угжиж боломжийн хөрөнгөтэй болсон гэдэг. Ингээд тэр Улаанбаатар хотын аль өнгөтэй, өөдтэй газруудыг худалдан авч барилга байшингууд сүндэрлүүлэх болсон. Энэ нь түүнд мэдээж чамлалттай санагдсан биз ээ.

Нутгийн иргэдийн хэлж байгаагаар хоёр гишүүн Дорноговь аймгийн Хангал суманд томоохон нүүрсний орд газартай болсон бөгөөд тэндхийн нүүрс коксны агуулгаараа тэргүүлж байгаа гэнэ шүү. Бараг 80 хувьтай юм байх. Ойролцоохь сумын төв хүртэл 75 километрийн зайтай байдаг тэр тал нутагт өдгөө эрхэм гишүүдийн мэдлийн 20 орчим эксковатор, 100 тонны даацтай 100 гаруй автомашин үйл ажиллагаа явуулж эхэлжээ. Чанга харуул хамгаалалттай тэдний кэмп аргагүй л экс Хууль зүйн сайдын мэдлийнх гэсэн шиг дэг журам сайтай байдаг аж. Удахгүй хоёр гишүүн Монголын тэргүүн баячуудын эгнээнд бичигдэх сурагтай.
Х.Балт (www.wikimon.mn)