2013 онд болох Монгол улсын Ерөнхийлөгчийн сонгуульд АН-аас Ерөнхийлөгч Ц.Элбэгдорж дахин нэр дэвших нь тодорхой.
Парламентад суудалтай өөр нэг субьект болох МАХН, МҮАН-ын “Шударга ёс” эвслийн хувьд  АН-тай дөрвөн жилийн турш хамтарч ажиллах, чингэхдээ бүх шатны сонгуульд хамтран оролцох гэрээ хийсэн, нөгөөтэйгүүр нэр дэвших магадлал хамгийн өндөртэй Н.Энхбаяр ял сонсон шоронд хоригдож буй тул МАН-аас ямар нэр дэвшигч тодрох нь л хамгийн их сонирхол татаж буй.

МАН-аас Ерөнхийлөгчийн сонгуульд нэр дэвших хамгийн их магадлалтай хүнээр нэн түрүүнд Ерөнхий сайд, МАН-ын дарга асан  С.Батболдын нэр дуулдах болсон.
Үүнийг ч батлах гэсэн мэт тэрээр Социнтерний Дэд Ерөнхийлөгчөөр сонгогдсон юм.
Гэтэл улс төрийг бүрмөсөн орхисон гэгдэж асан Ерөнхий сайд асан С.Баяр Ерөнхийлөгчийн сонгуульд хүч үзэх төлөвлөгөөтэй байгаа тухай яриа гарах болжээ.

Канадад амьдарч буй С.Баяр  зургаан хоногийн Монголдоо ирсэн бөгөөд тэрээр элэгний мэс заслаас гадна зүрхний эмчилгээ хийлгэсэн аж.
Тодруулбал :
АНУ-ын Сиетл хотод зүрхний титс судсанд төмөр цагираг суулгаж, өндөрсгөх мэс ажилбар хийлгэсэн байна.
Үүнийхээ өмнө тэрээр өөрийн Сиетл хотын Куйн Энн дүүргийн Кондо хорооллын “WA 981193” тоот байшингаа нэг сая ам.доллараар зарж, ихээхэн хэмжээний бэлэн мөнгөтэй болсон аж.
Тэрээр ирсэнийхээ маргаашнаас эхлэн л намын удирдлагуудтайгаа уулзаж эхэлсэн бөгөөд “Бие эрүүл саруул болсон. Бүрмөсөн илааршлаа” гэсэн мессежийг удирдах зөвлөлийнхөндөө нисгэх болжээ.
Ийнхүү С.Батболдод Ерөнхий сайдын албаа шилжүүлж байсан С.Баяр энэ удаад өөрөө Ерөнхийлөгчийн сонгуулийн өрсөлдөөнд орох санаатай байгаа бололтой.

Э.Мягмардорж

sonin.mn