“90 сая”-ын Б.Гансүх гэх хүний амьдралаас сэдэвлэн бүтээсэн “Бодлын хулгайч” кино өчигдөр Тэнгис, Өргөө кино театруудад нээлтээ хийлээ. Уг кино нь 90-ээд оны эхээр “Холливүүдийн алдартнуудтай хамтран кино хийнэ” хэмээн Монгол Улсын Ерөнхийлөгч П.Очирбатаас 90 сая төгрөг авч, улмаар ажил нь бүтэлгүйтсэнээс олон жилийн амьдралаа чанга дэглэмтэй хорих ангид өнгөрүүлсэн хүний бодит амьдралаас сэдэвлэсэн гэдгээрээ олон хүний анхаарлыг татаж байсан юм. Харин өчигдөр анхны үзэгчид нь тус киног үзээд “үнэхээр гайхалтай уран бүтээл” гэсэн дүгнэлтийг өгч байлаа. Энэхүү киноны гол дүрд “Уирдагч, Боолын гэрээ” зэрэг кинонуудад бүтээсэн дүрээрээ олны танил болсон СТА Б.Амарсайхан тоглосон нь найруулагчийн “нүдээ олсон сонголт” байсныг үзэгчид шагшиж байсан юм. Хүний амьдралын харуусал, зовлон, гуниг, ухаарлыг маш тодоор харуулсан уг киноны Ерөнхий найруулагч  Ж.Сэнгэдорж хэлэхдээ “Бидний энэ уран бүтээл монголын кино урлагт нэгэн том дэвшлийг харуулж чадсан кино болсон гэж бодож байна. Мөн манай үзэгчид цаашид ч энэ киноны талаар эргэцүүлж, нэгийг бодно гэдэгт итгэлтэй байна” хэмээсэн юм. Үнэхээр хүний амьдралд алдаа оноо дэнсэлж байдгийг, мөн амьдын хагацал, үхтэл үр харам гэдэг эхийн сэтгэлийг онцгойлон харуулсан уг киног үзсэнээрээ танхимд байсан үзэгчид ухаарч, уярч, уйлж байсан нь тус кино үнэхээр үзэгчдийн сэтгэлийн нарийн утсыг хөндөж чадсан бөгөөд монголын урлагт нэгэн шинэ дэвшлийг авчирч чадсан уран бүтээл болсоныг нотоллоо.

Н.Хувьзаяа www.secret.mn