Эрхэм хоёр гишүүний зодоон цохион олон хүний амны чилээг гаргаж, уйтгарыг нь үргээж, аяга цай, хундага сархадны хачир болон өрнөж хэд хонов.

Уг нь зодоон цохион ч юу байх вэ, ганц удаагийн  “ухамсрын шанаа” л юм. Эрчүүдийн хооронд болдог л нэг гар зөрүүлэлт.
Хачирхаад, ам хэлээ билүүдээд байх зүйл биш хэмээн олон хүмүүс үзэж буй ч Төрийн ордонд, тэр дундаа УИХ-ын эрхэм гишүүд гэдэг утгаараа ам хэлний бай болоод байгаа хэрэг.
Одоо сониуч зарим нь цааш хэрхэн үргэлжлэх өрнөлийг нь хүлээж, зохиолыг нь санаандаа хэдийнэ тэрлэчихээд байгаа. Хэрэгт дуртай нэг нь хэн хэнийг нь цахим хуудсаар турхирч ч байх шиг байна даа.
Иймэрхүү гар зөрүүлэх явдал ганц энэ удаа ч биш, урьд өмнө ч гарч л байсан. Монгол байтугай гадаад орны хууль тогтоогчид ч хувцсаа тайлж байгаад үзэлцэх л юм билээ.
Энэ хэрэг явдлын дараа УИХ-ын гишүүн У.Хүрэлсүх  фэйсбүүкээрээ дамжуулан ард иргэдээсээ  уучлалт гуйсан байна. Урьд нь ч тэр “тэвчээрт хязгаар байдаг юм байна “ хэмээн зүгээр ч нэг үг санамсаргүйхэн амнаасаа унагачихаагүй нь ойлгомжтой.
Ер нь эр хүний зангараг гэж нэг юм байдаг даа гэдгийг зодооныг өдөөчихөөд одоо хохирогчийн дүрд тоглон, цагдаа шүүх рүү өргөдөл гомдол нисгэн, өөрийгөө өмөөрүүлж хөгшдөөр хэвлэлийн бага хурал хийлгэн буй эрхэм гишүүн Г.Баярсайханд сануулмаар санагдаад байгаа юм. Эр хүн салаавч гаргаад сууж байх нь нэг л туниа муутай, арга ядсан арга л даа. Олон хүнд ингэж төсөөлөгдөх байх.
Монголын парламентад нэг харш юм бий. Тэр нь мөнөөх салаавч болой. Ц.Шинэбаяр гишүүн яг энэ салаавчны гайгаар Тагнуулын Ерөнхий газарт одоо ч шалгагдаж байгаа гэж дуулдсан. Ш.Сайхансамбуу гишүүн салаавчтайгаа хамт Их хурлыг орхисон.
Хэрэв энэ үүднээс нь авч үзвэл  зодсон, зодуулсан хоёр адилдаа адил, годилдоо годил гэгч болчих гээд байгаа юм. Хэн хэнээсээ ял асуултай биш. Энэ тохиолдолд У.Хүрэлсүхийн алганы амт хүртэх  өдөл сэдэл нь тэр салаавч болж таарнаа даа. Тэгэхээр босгосон овоон дээр шаазгай суугаад шагширч гарахаас өөр яах билээ.  Яаж ч бодсон Төрийн ордондоо, чуулганы танхимд, эрхэм гишүүнийхээ суудал дээр ангийн нөхрийнхөө өмнөөс салаавч гаргаад сууж байна гэдэг У.Хүрэлсүхийг гэхээсээ илүү төрт ёс руу илгээсэн доромжлол.  Хууль тагнуулынхан салаавчийг “үнэ хүргэн” шалгах шалтгааны нэг нь  энэ байж мэднэ. Гэтэл мөнөөх салаавч гаргасан нь  хууль шүүхэд  хандчихсан энхийн цагаан тагтаа болоод дэрвэж байгаа нь хачирхал төрүүлж байна.
Эрхэм гишүүн Г.Баярсайхан хоёр дахь удаагаа парламентад сонгогдож байгаа буурь суурь, тулх тулгууртай болбол болохоор л гишүүний нэг сэн. Өөрийнх нь ард Чингэлтэй дүүргийн  хэдэн мянган сонгогч байгаа. Сонгогчид нь ч гишүүнээ У.Хүрэлсүхээс өмөөрч бухимдахаас илүүтэй  төрийн түшээгийн ёс зүй, эр хүний зангарагийг нэхэж л таарна.
Монголын парламентад энэ мэт нударга зөрүүлэх явдал эцсийнх нь биш биз. Тэр тусмаа эсрэг талынхныхаа тэвчээрийн хязгаарыг тэмтэрч, эрчүүдийн биш эмс охидын араншингаар хэл амаа билүүдчихээд эцэст нь эцэг эхдээ эрхлэх бяцхан жаал аятай хушуу цорвойн гомдол мэдүүлээд хов зөөгөөд, хууль шүүхийн байгууллагад бичиг цаас шидэж гомдол гаргаад, яваад байвал гишүүдийн нэр төрийг сэргээхээс илүүтэй сэвтүүлж мэдэх юм. Ийм нэг зөвлөгөөг эрхэм гишүүн Г.Баярсайханд хаяглахаар шийдлээ. Ганц би ч биш, өөр бусад олон хүн түүнд энэ үгийг дайх хүсэлтэй байгааг цахим ертөнцөөр жиргэж буй залуус ч батлах биз ээ.

П.ДОРЖ